¹ Руҳ аниқ айтяптики, охирги замонларда баъзилар алдовчи руҳларга ва жинларнинг таълимотига қулоқ солиб, имондан қайтадилар. ² Шу алдовчилар ўз виждонларида гўё қизиган темир билан куйдирилган бўлиб, риёкорлик билан ёлғон сўзлаб, ³ уйланишни ман этадилар ва ҳақиқатни билиб олган имонлилар миннатдорчилик билан ейишлари учун Худо яратган овқатлардан тийилишни буюрадилар. ⁴ Аммо Худонинг яратган барча нарсалари яхшидир. Агар миннатдорчилик билан қабул қилинса, ҳеч нарса рад этилмаслиги керак, ⁵ чунки булар Худонинг Сўзи ва ибодат билан муқаддасланади. ⁶ Биродарларга буларни эслатиб, сен эргашган ўша соғлом таълимот ва имон сўзлари билан озиқланиб, Исо Масиҳнинг яхши хизматкори бўласан. ⁷ Яроқсиз афсоналар ва кампирларнинг уйдирмаларидан эса юз ўгириб, диёнатли бўлишда машқ қилгин. ⁸ Чунки жисмоний машқдан фойда оз, аммо диёнат ҳозирги ва келажакдаги ҳаётнинг ваъдасига эга бўлиб, ҳамма нарса учун фойдалидир. ⁹ Бу сўз тўғри ва тўлиқ қабул қилинишга муносибдир. ¹⁰ Айнан шунинг учун ҳам биз меҳнат қилмоқдамиз ва ҳақоратларга бардош бермоқдамиз, чунки ҳамма одамларнинг ва, айниқса, имонлиларнинг Нажоткори бўлган барҳаёт Худога умид қилмоқдамиз. ¹¹ Буни воизлик қилгин ва ўргатгин. ¹² Сенинг ёшлигингга ҳеч ким менсимаслик қилмасин, лекин имонлилар учун сўзда, юриш-туришда, севгида, руҳда, имонда, покликда намуна бўлгин. ¹³ Мен келгунимча, Сўзни ўқиш, насиҳат қилиш ва таълим бериш билан машғул бўлгин. ¹⁴ Сенга пайғамбарчилик воситаси билан жамоабошилар кенгашининг бошингга қўл қўйиши билан берилган инъомга бепарво бўлмагин. ¹⁵ Буларни онгингда фараз қилиб, ўзингни буларга бутунлай бағишлагин, токи сенинг муваффақиятинг ҳаммага ошкор бўлсин. ¹⁶ Сен ўзингга ва таълимотга диққат қилгин. Булар билан доимо машғул бўлгин, чунки шундай ҳаракат қилиб, ўзингни ҳам, сени тинглаётганларни ҳам қутқариб қоласан.