¹ Бу сўз тўғри: агар ким Жамоатнинг нозири бўлишни истаса, хайрли ишни истаган бўлади. ² Лекин нозир бенуқсон, битта хотиннинг эри, ҳушёр, ақли соғлом, одобли, меҳмондўст, таълим беришга қобилиятли бўлиши керак. ³ Шунингдек, у майхўр, урушқоқ, ғаразгўй, жанжалкаш эмас, балки мулойим, пулпарастликдан йироқ, ⁴ ўз хонадонини яхши бошқарадиган, ўз фарзандларини бутун обрўйи билан итоатда сақлайдиган одам бўлсин. ⁵ Чунки агар одам ўз хонадонини қандай бошқаришни билмаса, унда қандай қилиб Худонинг Жамоатига ғамхўрлик қилади? ⁶ Нозир эндигина имонга келганлардан бўлмаслиги керак, токи мағрурланиб, иблис билан бирга маҳкум бўлмасин. ⁷ У ёмон гап-сўзга ва иблиснинг тузоғига тушмаслиги учун Жамоатдан ташқаридагилар томонидан ҳам яхши гувоҳликка эга бўлиши керак. ⁸ Шунингдек, Жамоат хизматчилари ҳам обрўйли, иккиюзламачи бўлмаган, шаробга эҳтирос қўймаган, беғараз ва ⁹ имон сирини пок виждонда сақлайдиган одамлар бўлсинлар. ¹⁰ Бундайларни эса аввал синаб кўриш керак, агар бенуқсон бўлсалар, шундагина хизматга тайин қилиш керак. ¹¹ Уларнинг хотинлари ҳам обрўйли, туҳмат қилмайдиган, ҳушёр ҳамма нарсада садоқатли бўлишлари керак. ¹² Жамоат хизматчилари ҳам битта хотиннинг эри, ўз фарзандларини ва хонадонини яхши бошқарадиган бўлишлари керак. ¹³ Чунки яхши хизмат қилганлар ўзларига олий мартаба ва Исо Масиҳда бўлган имонда буюк жасорат тайёрлайдилар. ¹⁴ Мен сенинг ёнингга яқинда боришни умид қилиб, сенга буни ёзяпман, ¹⁵ токи агарда ушланиб қолсам, унда сен Худонинг уйида қандай ҳаракат қилиш кераклигини билгин. Худонининг уйи – барҳаёт Худонинг Жамоатидир, ҳақиқатнинг устуни ва пойдеворидир. ¹⁶ Диёнатнинг сири эса эътирозсиз буюкдир: Худо танада зоҳир бўлди, Ўзининг ҳақлигини Руҳда тасдиқлади, фаришталарга Ўзини кўрсатди, халқлар орасида воизлик қилинди, дунёда имон билан қабул қилинди, шуҳрат билан кўтарилди.