¹ Шундай қилиб, энг аввало шуни илтимос қиламан: барча инсонлар, подшоҳлар, ҳамма ҳокимлару бошлиқлар учун ибодатлар, илтижолар, шафоатлар қилинглар ҳамда миннатдорчилик билдиринглар, ² токи биз ҳар қандай диёнат ва покликда тинч ҳамда осойишта ҳаёт кечирайлик, ³ чунки Нажоткоримиз Худога бу яхши ва маъқулдир. ⁴ У барча одамларнинг нажот топишларини ва ҳақиқатни билиб олишларини хоҳлайди. ⁵ Зеро Худо ягона ва Худо билан инсонлар орасидаги Воситачи ҳам ягонадир, яъни инсон Исо Масиҳ. ⁶ У барча инсонларни тўлов билан қайтариб олиш учун Ўз жонини фидо қилди: ўз вақтида бу ҳақида берилган гувоҳлик шундай эди. ⁷ Мен эса бу гувоҳликнинг воизи, ҳаворийси ҳамда (ёлғон гапирмай, Масиҳда ҳақиқатни айтаман) мажусийларга имон ва ҳақиқатни ўргатадиган устоз этиб тайинландим. ⁸ Шундай қилиб, эркаклар муқаддас қўлларини ғазабсиз ва шубҳасиз ҳолда кўтариб, ҳар ерда ибодат қилишларини истайман. ⁹ Шунингдек, аёллар ҳам одобли кийимда, орият ва иффат билан юриб, ўзларини ўрилган сочлари ҳамда олтин, марварид ва қимматбаҳо кийимлар билан эмас, ¹⁰ балки ўзини диёнатга бағишлаган аёлларга мувофиқ хайрли ишлар билан безатсинлар. ¹¹ Хотин жим бўлиб, ҳар қандай итоаткорлик билан таълим олсин. ¹² Бироқ хотиннинг эрига таълим беришига ҳам, унинг устидан ҳукмронлик қилишига ҳам рухсат бермайман. Хотин жим бўлсин. ¹³ Чунки аввал Одам-Ато, кейин эса Ҳавва яратилган, ¹⁴ ва Одам-Ато эмас, балки хотин алданиб жиноят қилган. ¹⁵ Лекин агар имонда, севги ва иффат билан муқаддасликда ҳаёт кечирса, у бола туғиши орқали нажот топади.