¹ Қуллик бўйинтуруғи остида бўлганлар ўз хўжайинларини ҳар қандай ҳурматга муносиб, деб ҳисобласинлар, токи Худонинг номи ва таълимоти ҳақорат қилинмасин. ² Хўжайинлари имонли бўлган қуллар, хўжайинлари энди биродарлари бўлганлари учун уларни менсимай қўймасинлар. Аксинча, улар яхшироқ хизмат қилишлари керак, чунки улар имонлилар, севиклилар ва даромадга шериклардир. Буни ўргатгин ва насиҳат қилгин. ³ Ким бошқа нарсани ўргатса ва бизнинг Раббимиз Исо Масиҳнинг соғлом сўзларига ҳамда диёнат ҳақидаги таълимотга эргашмаса, ⁴ у мағрур ва ҳеч нарсани билмайдиган одамдир. У талашиш-тортишиш ва баҳслашиш касаллигини юқтиргандир. Бу нарсалардан фақат ҳасад, низо, туҳмат, ёвуз гумонлар содир бўлади. ⁵ Шунингдек, диёнат гўёки даромад орттириш учундир, деб ўйлайдиган, ҳақиқатдан йироқ ва онги бузуқ бўлган одамларнинг орасида пуч баҳсларни пайдо қилади. Бундай одамлардан узоқлашгин. ⁶ Диёнат эса қаноат билан бирга буюк даромаддир. ⁷ Чунки биз бу дунёга ҳеч нарса олиб келмадик, ундан ҳеч нарса олиб кета олмаслигимиз ҳам аниқдир. ⁸ Шунинг учун озиқ-овқат ва кийим-кечакка эга бўлсак, шу билан қаноатланайлик. ⁹ Бой бўлишни истаганлар эса васвасага, тузоққа ҳамда одамларни вайроналик ва ҳалокатга ботирадиган кўп фаросатсиз, зарарли ҳирсларга йўлиқадилар. ¹⁰ Чунки ҳамма ёвузликларнинг томири – пулпарастликдир. Баъзилар бунга берилиб, имондан оғиб кетдилар ва ўз-ўзларини кўп азобларга дучор қилдилар. ¹¹ Сен эса, эй, Худонинг одами, булардан қочгин. Аксинча ҳақлик, диёнат, имон, севги, сабр-тоқат ва мулойимликнинг пайидан бўлгин. ¹² Имоннинг яхши жанги билан жанг қилгин. Абадий ҳаётни ушлаб тургин, чунки сен шунга даъват этилгансан ва яхши эътирофни кўп гувоҳлар олдида эътироф этгансан. ¹³ Ҳамма нарсага ҳаёт берувчи Худонинг олдида ва Понтий Пилат ҳузурида яхши эътироф билан гувоҳлик берган Исо Масиҳнинг олдида сенга буюраман: ¹⁴ Бизнинг Раббимиз Исо Масиҳ зоҳир бўлгунча, амрни бенуқсон ва беғубор сақлагин. ¹⁵ Ягона муборак Парвардигор, подшоҳларнинг Подшоҳи ва эгаларнинг Эгаси ўз вақтида Масиҳни намоён қилади! ¹⁶ Ёлғиз У ўлмасликка эгадир, У яқинлашиб бўлмайдиган нурда истиқомат қилади. Уни инсонлардан ҳеч ким кўрмаган ва кўра олмайди ҳам. Унга ҳурмат ва абадий салтанат бўлсин! Омин. ¹⁷ Бу дунёда бой бўлганларга шундай буюргин: улар кеккаймасинлар ва бевафо бойликка боғланмасинлар, балки завқланишимиз учун бизга ҳамма нарсани мўл қилиб берадиган тирик Худога умид боғласинлар. ¹⁸ Улар хайрли ишларга бойиб, сахий ва ҳаммага улфат бўлиб, яхшилик қилсинлар. ¹⁹ Шундай қилиб, келажакдаги яхши пойдевор бўладиган шу хазинани абадий ҳаётга эришишлари учун ўзларига тўпласинлар. ²⁰ Эй, Тимўтий! Сенга топширилганни сақлагин, ярамас пуч гаплардан ва сохта “билим”, деб аталадиган баҳслашувлардан узоқлашгин. ²¹ Баъзилар буларга берилиб, имондан оғиб кетдилар. Иноят сен биландир! Омин.