¹ Noemi, naye-weno, yamba kuli iye, " Mwanami te kuchangutambile kukufupila uhwimino, hanga chikapwe kanawa nyi yena? ² Nyi yono Mboaze, ena walinganga ngamba jenyi a mapwo, hi usoko wetu ko nyi? Talenu, mba musono ufuku mafuza sevanda yenyi ha chizungwilo. ³ Keshika, sana, ulikwichile maji, ukazale mazalo apema, mba ukaye kuchizungwilo. Alyoze kanda ulisolola kuli mwe lunga ndo hamana kulya nyi kunwa. ⁴ Alyoze muze hapomba, tala kanawa muhela uze anapombo hanga ukaye kuli iye, ukafukule ilyato yenyi, ukapombeko. Mba iye makulwe chize chakutamba kulinga. " ⁵ Lute yamba kuli Noemi, " Yeswe unambe mungulinga. " ⁶ Chocho yapalumuka ku chizungwilo, yalinga chizechene naye-weno amwambanga. ⁷ Muze Mboaze halya nyi kunwa yevwa kuwaha mu mbunge yenyi, yaya yapomba ku songo lya mulumba wa mbuto. Mba mwe pwo yeza makoke, yafukula ilyato yenyi, yapomba. ⁸ Ha muchima ufuku lunga yoze yakasumuka. Yalumuka, kumanyi pwo kana pombo kuyilyato yenyi! ⁹ Yamba ngwenyi, " Yena iya? "Pwo yakumbulula, " Yami Lute, kavumbi kenu. Nungufuke kama yami kavumbi kenu nyi hina lyenu, mumu nuli usoko wetu. " ¹⁰ Mboaze yamba ngwenyi, "Mwanami, Yehova akuwahise. Utu we wa kusula hiwahyana utangu, mumu kuwa kawile amwe ma kweze, apwe yiswale apwe pichi. ¹¹ Halyapwila, mwanami, kanda wivwa woma! mungukulingila yeswe unechi, mumu atu eswe amu chihunda kananyingika ngwo uli pwo wamwenemwene. ¹² Chamwenemwene nguli usoko, alyoze kwali umwe wangukumba. ¹³ Twama hanohene ufuku wuno, mba chimenemene, nyi malinga milimo ya usoko wa ha muchima hali yena, chipema, alinge. Alyoze nyi kalingile milimo ya usoko kuli yena, mba mungulinga, nyi mwono wa Yehova . Pomba ndo chimene." ¹⁴ Chocho wapombele kuyilyato ndo chimene. Alyoze wahindukile shimbu te umwe kahashile kumona mukwo chinyingi. Mumu Mboaze wambile ngwo, " Kanda achinyingika ngwo pwo wezanga kuchizungwilo. " ¹⁵ Mba Mboaze yamba ngwenyi, " Teleza hina lize unazala. Muze hachilinga, yalitela mba yamuzongwela njongo jisambano ja sevanda yamutwikajo chocho iye yaya ku chihunda. ¹⁶ Muze Lute yahiluka kuli naye-weno, yamba ngwo, " Yika wamonanga, mwanami? " Mba Lute yamulweza yeswe yize yoze lunga amulingila. ¹⁷ Yamba ngwo, " Jino njongo jisambano ja sevanda je angwahanga, mumu wahanjikile ngwenyi, ' kuchakutambile kuya kuli nako - weno mokomoko. " ¹⁸ Mba Noemi yamba ngwenyi, " Twama hano, mwanami, ndo mumona chize chuma chino muchipwa, mumu yono lunga kechi kuhwima ndo hamana chuma chino musono. "