¹ Mba Mboaze wayile ku chikolo cha chihunda yatwamako. Hashimbu likepe, mwe usoko wa ha muchima yoze Mboaze hamuvuluka yapalika. Mbaoze yamba kuli iye, " Mukwetu, tweya kuno utwame hano." Yoze lunga yeza yatwama . ² Mba Mboaze yatongola kumi lya malunga hakachi kamakulwana a chihunda nyi kwamba ngwo, " Twamenu hano." Chocho atwamine. ³ Mboaze yamba kuli usoko wa ha muchima, " Noemi, Yoze wakatuka ku Moape, kanalanjisa chihanda cha munda chize chapwile cha usoko wetu Elimeleke. ⁴ Keshika namba ngwami , ' Uchilande kumeso ja wano anatwama kuno, nyi kumeso ja makulwana ja atu jami. ' Nyi muchikula, kulako. Alyoze nyi kuwazangile, ngulweze, nguchinyingike, mumu wakuhi helu lya yena wa kuchikula shina yena, nyi yami ngunakuhate. "Mba yoze lunga yakumbulula, " Munguchikula. " ⁵ Mba Mboaze yamba ngwenyi , " Tangwa lize mulanda munda ku kwoko lya Noemi, nawa ukambate Lute ka Moape, twamishi wa mwe mufu, hanga ukahilwise jina lya mufu ha chihinga chenyi. " ⁶ Mba usoko wa ha muchima yamba ngwenyi, " Chahashile kuchikula yami mwene kuchina mungulumbula chihinga cha yami mwene. Chiyulo chami cha kukula chitambule yena mwene, mumu chahashile kuchikula. " ⁷ Mba ndako yino apwile nayo kushi mu Yizalele hakutwala ku kukula hanji kulanda. kukolesa yuma yeswe, umwe lunga wazulile luhaku nyi kuluhana kuli mukwo; chenacho chapwile chikuma chakukolesa mu Yizalele. ⁸ Chocho usoko wa ha muchina yamba kuli Mboaze, " Chilande hali yena mwene, " mba iye wazulile luhaku lwenyi. ⁹ Mba Mboaze yamba kuli makulwana nyi kuli atu eswe, " Enu nuli yela musono ami ngunalande ku kwoko lya Noemi cheswe chapwile cha Elimeleke nyi cheswe cha Chilione nyi Malone. ¹⁰ Hamwe nyi Lute ka Moape, twamishi wa Malone, akapwe pwo lyami, mukulindulula jina lya mufu ha chihinga chenyi, kuchina jina lya mwe mufu mulikajimuka hakachi ka ana - akwo nyi ayayo muchikolo cha chijima chenyi. Enu nuli yela musono! " ¹¹ Atu eswe apwile mu chikolo nyi makulwana yamba ngwo, "Tuli yela. Yehova apwise yono pwo unanjila muzuwo lye ngwe Lakele nyi Liya, wano aali asangwile munyachi wa Yizalele; ukawahe mu Efulata nawa ukafumane mu Mbeteleme. ¹² Zuwo lye likapwe ngwe zuwo lya Peleze, Yoze Tama wasemene kuli Yunda, hakutwala kuli ana Yehova makwaha kuli yono mwana- pwo. " ¹³ Chocho Mboaze yambata Lute, yapwa pwo lyenyi. Wanjilile kuli iye mba Yehova yamwaha kwaka, yasema mwana walunga. ¹⁴ Mapwo yamba kuli Noemi, " Yehova akafumane, se musono kakuhichikile kushi usoko wa ha muchima, mwana yono. Jina likafumane mu Yizalele. ¹⁵ Kumakapwa kuli yena mukwa kuhuzululamwono kanda mukwa kukuhoka mu ushinakaji we, mumun tembwa - mwane, yoze wakuzanga, kuli yena kanahyana chipwe shimbyali ana a malunga. " ¹⁶ Noemi yamba mwe mwana, yamusa mwe mukondo, yapwa ndeji yenyi. ¹⁷ Chocho mapwo a chifuchi chize yamwaha jina, ngwo, " Noemi hasema mwana. " Yamuvuluka ngwo Opete. Iye tato ya Jese, Yoze unakapwa tato ya Ndawichi. ¹⁸ Asemukine kuli Peleze wano: Peleze iye yasema Hazelone, ¹⁹ Hazelone yasema Lama, Lama yasema Aminandambe, ²⁰ Aminandambe yasema Nasone, Nasone yasema Salamone, ²¹ Salamone yasema Mboaze, Mboaze yasema Opete, ²² Opete yasema Jese nawa Jese yasema Ndawichi.