¹ Mwanami, nyi hiwasa nbongo je ngwe chikwachilo kuli mwenyembo we, nyi inakamwaha chilakenyo ha chifungo kuli mutu yoze wa nyi ngikine, ² chekwamba hiwalyalila muheto yena mwene kuyilakenyo ye nawa hiwalihisa kumaliji ja mukanwa ke. ³ Muze hakuhisa nyi malijij je, mwanami, linga chino hanga ulilamwine, yena mwene, muze hiwaholokela mumoko ja mwenyembo we; yako uye uli kehese yena mwene nyi kutwala mulonga we kuli mwenyembo we. ⁴ Kanda wecha meso je aye tulo kanda unwongoka. ⁵ Lilamwine yena mwene ngwe chize akulinga kayi muze anachina chinyanga, ngwe kajila kufuma mu muheto wa mukwa kumutela. ⁶ Tala kuli tungenyengenye, ena chilenda, uzewule ndako jenyi, ulilongese mana. ⁷ Keshi mwata, kasongo, chipwe mukwa kuyula, ⁸ alyoze kakulifupila yakulya yo mu nonga nyi wola yakucha kakutulika mbuto yize makalya. ⁹ Wola muka mupomba ha muhela, ena chilende? Shimbu muka muhinduka kama? ¹⁰ "Nguchipombe kama chikehe, nguchinwongoke kama chekehe, nguchilisusuminye kama nguhwime" - ¹¹ Alyoze uswale we mwiza ngwe mwiji nyi kufupa che ngwe muswale uli nyi uta wenyi. ¹² Mutu wa mokomoko - mutu wa chingulungulu - kakutwama nyi kuhajika mahuza, ¹³ kukenya kenya meso, nyi kuli wondwonda kuyilyato yenyi nyi kuli nyeka minwe yenyi. ¹⁴ Kakushinginyeka manyonga api mukachi kambunge yenyi, kweswako akuya kakuneha vunda. ¹⁵ Kashika luyinda lwenyi meza susumuku, mukashimbu kakehe makamakwoka nyi kwawuka ka. ¹⁶ Yuma yisambano yize Yehova akwivwilamo kupiha, yuma shimbiali yapwa ya chizolyekeso kuli iye: ¹⁷ meso amutu kakulizelula, nyi limi lya ku lyonga, moko waze akumwanga manyinga ja atu akuhona mulonga, ¹⁸ nyi mbunge yauhenya, nyi molu akutambuka aye nyi kulinga yipi, ¹⁹ nyi chela yoze wakulamikiza akwo milonga nyi mutu yoze wakuneha vunda mukachi ka madumbu. ²⁰ Mwanami, lama shimbi ja tatenu kanda uvulyama longeso lya moko. ²¹ Funga maliji jo mukachi ka mbunge ye; akashilile mukota ye. ²² Muze munwenda, munusongwela; muze mupomba, munufunga; nyi muze muhindwika, manulongesa. ²³ Mumu shimbi jili ndeya, nyi ulongeso we pangu; ku kanjisa chize cha kwiza nyi longeso ye njila ya mwono. ²⁴ Muchihasa kufunga kuma pwo api walimi lya kupyepyeka kwa pwo wandako ipi. ²⁵ Kanda wivwa usolo wa upeme wenyi nawa kanda umutayiza kukukwata nyi yikenyi kenyi ya meso jenyi. ²⁶ Ndando ya chikoyi yapwa hamwe nyi ndando ya mbolo, mba pwo wa lunga ukuwika katonda mwono wupema. ²⁷ Mutu matela kumbata kahya hapambo lyenyi kwakuhona kwocha mazalo jenyi nyi? ²⁸ Mutu matela kwenda hamakala akahya kwakuhona kuwema muchilyato? ²⁹ Chimuwika nawa nyi mutu yoze maya kuli pwo mwenyembo wenyi nyi; mamukwata kechi kaya kwakuhona kumumwesa lamba. ³⁰ Atu kanda kalelesa mwiji muze meya kuzanga kuliwahisa chize mazanga mumu kanevu zala. ³¹ Mba nyi mamukwata, iye mafweta shimbiali ya yize eyanga; iye unatela kuhyana yeswe nyi kulita nyi yuma yize yili muzuwo lyenyi. ³² Yoze malinga utanji keshi nyimalijekela; yoze malinga chino kalyenyeka mwene. ³³ Mbandwu nyi sonyi chamutamba nyi kumulelesa chichi kahwa hali iye. ³⁴ Mba chipululu chakupwisa mutu ufwatulo; kechi kusolwesa keke hatangwa lya kukala. ³⁵ Kechi katayiza ndando neye kechi kamulanda, chipwe munumwaha ya wana yinji.