¹ Mwanami, funga maliji jami nyi kufunga shimbi jami muli yena mwene. ² Lama shimbi jami upwe nyi mwono, funga shimbi jami ngwe katumba ka liso lye. ³ Uyi kashile haminwe ye; uyi soneke hambunge ye. ⁴ Tongola mana ngwe, "uli ndumwami," nyi kusanyika malinjekela ngwo uli usoko wami, ⁵ yikafunge kuli pwo wautanji, kuliji lyenyi. ⁶ Ku njanela lya zuwo lyami natalile ku chisakala. ⁷ Namwene hakachi ka ana amalunga umwe mukweze keshi mana. ⁸ Yoze mukweze kanapalika ha tapalo hakamwihi nyi mbango, yaya ku zuwo lyenyi. ⁹ Ha kujila cha tangwa, mu chingoloshi, mushimbu lya ufuku nyi mu milima. ¹⁰ Mba kwatakanyine nenyi umwe pwo. Kanazala ngwe chikoyi, nyi mbunge ya makuli. ¹¹ Iye mukwa zungo nawa mukwa pami; molu njenyi katwamine mu zuwo lyenyi. ¹² Halyapwila mu majila, mba muyitanda, nyi muma mbango eswe iye kakuswaminyina. ¹³ Chocho yamu kwata nyi kumwaha mbenju, nyi ha meso heshi sonyi yamba kuli iye ngwenyi, " ¹⁴ musono nahananga yitapo ya milambo ya sambukila nguli nayo, nahetesa chilakenyo chami, ¹⁵ keshika hinatuhuka nyi kukutakana, nyi kuzanga ku tonda huma lye. ¹⁶ Hinala muhela wami, nyi mahina afwifwima kufuma ku chifuchi cha Engitu. ¹⁷ Hinasa pwila muhela wami nyi maji a vumba lipema, yilombo, nyo kanela. ¹⁸ Tweya, tuye tukalikuchise nyi zango. ¹⁹ Mumu lunga lyami keshi mu zuwo lyenyi; hanayi hanayi ungeshi usuku. ²⁰ Haya nyi pakumuna lya mbongo; mba meza nawa hakakweji wa kuunduka." ²¹ Nyi ulembekese wenyi wunji yamukumba; yamushinjila nyi kupyepyeka cha mivumbo yenyi. ²² Susumuku lunga yakaula ngwe ngombe maya ku chishahilo, ngwe chi hepuke maya kumufumba mu kuli, ²³ ndo mwivu muutuwa mu lyayi lyenyi. Kanyingikine ngwenyi mwono musalako. ²⁴ Keshika, ana jami, ngwivwenu; panjikenu ku maliji a mukanwa lyami. ²⁵ Kanda mbunge ye yalumuke u ndako jenyi, kanda upyangukila mu majila jenyi. ²⁶ Mumu halimbwisa atu anji nyi yito; waze hashiha chihunji chinene. ²⁷ Zuwwo lyenyi lyapwa jila ya kuya kuma kwa afu; nyi kupalumukina ku yipatulo ya afu.