¹ Mwanami, panjia ku mana jami; sako matwi je ku malinjekela jami, ² kachi ulilongese ha malinjekela nyi mivumbo ye kachi yikafunge chinyingi. ³ Mumu mivumbo ya pwo weka kuyakusotwela nyi uchi nawa kanwa lyenyi lyasenena ngwe maji, ⁴ alyoze kusongo kasasa ngwe usase, kambuka ngwe phoko ya mukwale. ⁵ Molu jenyi kakupalumukina ku kufwa; ngano jenyi jakuya ndo kumafuka. ⁶ Aye keshi kunyonga ha jila ya mwono. Kwenda chenyi cha kulihiza; yiye kanyingikine kuze anayi. ⁷ Keshika, anami, ngwivililenu ; kanda nwehuka kupanjika kumaliji ja mukanwa lyami. ⁸ Kanda nwiza hakamwihi nenyi nawa kanda nwiza kukamwihi nyi chikolo cha zuwo lyenyi. ⁹ Muli ayo jila uchikuhana ulemu we kuli eka chipwe myaka ya mwono we kuli mukwa uswi; ¹⁰ hanga yilambala kanda akalya ja tachi je; ku kilikita che kanda chikaya mu zuwo lya tu ndaka. ¹¹ Kusongo lya mwono we mukaliteta muze musunya we nyi mujimba we mu ukalyenyeka. ¹² Mukamba ngwe, "Chokupihya navile ha kungu fumba nawa mbunge yami yalelesele kungu kanyisa! ¹³ Chononokene ku liji lya longeshi jami chipwe kusa twitwi lyami ku yilongeso. ¹⁴ Kwasalile hakehe yami kulyenyeka hakachi ka chikungulwila, hakulikungulula cha atu." ¹⁵ Nwako meya amuchikwachilo che nawa nwako meya anaphukumuka mu shima lye. ¹⁶ Te chatamba kumwanga meya kweswe nawa ma fuji ja meya je aka amwangakine muchinji cha atu? ¹⁷ Akapwe hije wika nawa kanda akapwa ayilambala uli no. ¹⁸ Fuji lye alikisule nawa ukawahilile nyi pwo lya mukweze we, ¹⁹ mumu kali phaji wa zango nawa kayi mupema. Mele jenyi akukuhwise phwila shimbu jeswe; akakuwahise nyi zango lyenyi shimbu jeswe. ²⁰ Mumu yika, mwanami, makukwachila kuli chikoyi? Yika mukwachila tulo ya chitanji cha phwo? ²¹ Yehova kakutala ndako jeswe mutu akulinga nyi kutala majila akupalika eswe. ²² Chingulungulu kakukwachika ku uhenge wenyi; mihipu ya shili yenyi muyikam,ukashisa. ²³ Makafwa mumu ha kuhona kumufumba; maka pyasuka ha uhenge wenyi unji.