¹ Panjikenu, anami, kufumba cha tatenu, panjikenu hanga nukanyingike malinjekela. ² Ngunanuhe kufumba chipema; kanda nuhichika longeso lyami. ³ Muze napwile mwana wa tata, mwana, mukepe wa wika wa mama, ⁴ wangulongesele kaha wambile kuli yami ngwenyi, "Mbunge ye yikalalaminye ku maliji jami; funga shimbi jami hanga upwe nyi mwono. ⁵ Kwata mana nyi malinjekela; kanda uvulama chipwe kupyanguka ku maliji a mukanwa lyami; ⁶ Kanda wehuka mana mba makufunga; ukazange mba makulayila. ⁷ Mana che chuma chahyana, keshika kwata mana nyi ha yuma yeswe makwata kwata mana hanga ukapwe nyi malinjekela. ⁸ Walemese mba makasenyesa kulutwe nyi mwakwata makusa ku ulemu. ⁹ Masa chipangula cha vumbi ha mutwe we. Makwaha chipema cha uhenya. ¹⁰ Panjika, mwanami, nawa tambula maliji jami kaha mukapwa nyi myaka yinji mu mwono we. ¹¹ Hinakulongesa mujila ya ndako ja mana; hinakusongwela mu7 majila a ululi . ¹² Muze mwenda, wakuhi makwika shimbo je nyi muzombo, kuchi katalinga. ¹³ Kakaminya ku kufumba chami , kanda uchehuka; uchifunge kanawa, mumu chinapu mwono we. ¹⁴ Kanda uya mujila ya yingulungulu nawa kanda ulyata mu jila ya akwa kulinga upi. ¹⁵ Kanda uyako, kanda wendelamo; Tewuluka ukahyane. ¹⁶ Wano atu kahashile kuya tulo ndo halinga chuma chibi kakwachiza tulo ndo malingisa umwe kutalinga. ¹⁷ Mumu kakulya mbolo ya ungulungulu kakunwa vinyu ya upupilo. ¹⁸ Alyoze jila ya atu akwa ululi yapwa ngwe kutemuka cha kucha chakuliwezela tachi; muchitemuka ndo0 tangwa ha muchima. ¹⁹ Jila ya yingulungulu yapwa ngwe mulima - kanyingikine haze matalingila. ²⁰ Mwanami, panjika ku maliji jami; ivwa kanawa maliji jami. ²¹ Kanda yikutoka ku meso je ; uyifunge mu kachi ka mbunge ye. ²² Mumu maliji jami kapwa mwono kuli yoze mayiwana muyiwuka musunya wo weswe. ²³ Funga mbunge ye uyifunge kuhyana yuma yeswe mumu kwe kuuto ya mwono kwenako. ²⁴ Kanwa lya kupiya likatukeko kuli yena nyi maliji a kuhenga yipwe kusuku nyi yena. ²⁵ Meso je atale kulutwe pundu meso je akalulame kulutwe. ²⁶ Lulamisa jila ya shimbo je ; mba majila je makawaha. ²⁷ kanda ukapyasukila chipwe ku chindume chipwe ku chimeso; chiza kulu iye ku yipi.