¹ Chasolokele kulutwe lya kashimbu muze Yesu waputukile nyi kwenda ndusu mumembo akuli handununa nyi yihunda , kwambulula nyi kwambujola sango lipema lya wanangana wa Zambi . Waze kumi nyi ali apwile hamwe nenyi , ² nyi amwe mapwo waze aawukile kuli mashipilitu a ungulungulu nyi ikola: Maliya yoze asanyikine jina likwo ngwo Kamandalena , kuli iye mahamba shimbyali atuhukile : ³ Joanna , pwo lya kuza , kafufuchi : ka Helonde , Suzana ; nyi anji akwo , waze , kuchiza muyuma yo , amuvumbikile nyi yikumba yo. ⁴ Muze mbunga ya aatu akungamine , nyi aatu apwile nyi kwiza kuli yiye kukatuka ku limbo nyi limbo , walwekele nyi chishima : ⁵ ''Njimi watuhukile mukukuwa mbuto yenyi . Shimbu akuwile , yimwe yaholokelele ku sesa lya jila a yilyachile kushi lya ilyato , nyi tu jila a mwilu ayilile . ⁶ Yikwo yaholokelele ha mawe , muze yasokele , yomine , mumu meya akuhi. ⁷ Yimwe yaholokelele mukachi kamingonga , nyi mingonga yasokele kumuwika nyi mbuto yayikeketese. ⁸ Mba yimwe yaholokelele ha mavu apema yasokele yemine nyi mbuto kulakaji lya yisuho.'' Muze Yesu ahanjikile yino yuma , watambikile ngwenyi , '' Yoze wuli nyi matwi a kwivwa , evwe.'' ⁹ Tumbaji jenyi a muhulile ulumbunwiso wa achi shima . ¹⁰ Yiye wambile ngwenyi , ''Maana ayi jimbikilo ya wanangana wa Zambi hananweheho,alyoze kuli akwo nakuhanjika mu yishima , hanga nyi kutala kechi kamona , nyi kwivwa kechi kukanyingika .' ¹¹ Achi chino we ulumbwunwiso wa chishima ngwami: Mbuto lye liji lya Zambi . ¹² Alyoze waze a ku sesa lya jila waze evwile, kulutwe yo meza ndyapu mambata liji ku mbunge jo hanga kanda afulyela nyi aka alamwine . ¹³ Alyoze waze ha liwa, waze muze mevwa matambula liji nyi uwahililo . Mba keshi miji; mafulyela a kashimbi nyi ha mwaka wa cheseko maholoka. ¹⁴ Mbuto yize yaholokele hakachi kamingonga waze aatu akwivwa liji , mba muze maya mujila yo , makekelela nyi yipikalo nyi upite nyi kuwaha cha mwono uno , nyi mbuto yo kushi kwima ku ungunu. ¹⁵ Mba mbuto yaholokelele ha mavu apema , awa waze mevwa liji nyi umwenemwene nyi mbunge jipema , malikakaminya mema mbuto nyi uhumikizo. ¹⁶ ''Nyiumwe wa kutemuna ndeya nyi kuyifuka nyi chisoka hanji mayisa mwishi lya muhela. Alyoze , mayisa ha chikwachilo cha ndeya hanga waze eswe manjila akamone pangu . ¹⁷ Mumu kushi chize chaswamana chakuhi chize kechi kasolola , chipwe cha kuswamana chize kechi kachinyingika nyi kuchisolola . ¹⁸ Keshika kanyamenu kwivwa , mumu kuli yoze alinacho , kumakamwaha yinji , alyoze kuli yoze keshi nacho chipwe chize chene ananyongo ngwenyi nguli nacho makamutambula cho.'' ¹⁹ Mba naye nyi anakwo yeza kuli yiye , alyoze kahashile kuheta kuli yiye mumu ya mbunga . ²⁰ Amulwezele ngwo , ''' Noko nyi ana akwenu kanamane haze , kanazange ku kumona .'' ²¹ Alyoze yesu yakumbulula nyi kuhanjika kuli ayo ngwenyi , '' Mama nyi ana akwetu wano ha kwivwa liji lya Zambi nyi kakulinga .'' ²² Alyoze tangwa limwe anyinyine mu wato iye nyi tumbaji twenyi , iye wambile kuli ayo ngwenyi, '' Tuyenu tuzauke tuye musali lya chitende .'' Akatukile ku ngenge . ²³ Alyoze shimbu achili kuzauka iye wayile tulo . Nyikakundukundu walundumukine ha chitende , nyi ulungu waputukile kuzala nyi meya , apwile mu utoji. ²⁴ Mba tumbaji twa Yesu yeza kuli iye iye nyi kumulawisa , ngwo , ''Mwata ! Mwata ! tunatoko! Iye walawile waambile fuji nyi kufuza cha meya , nyeyo yaholele, kwapwile kulu. ²⁵ Iye wambile ngwenyi , ulihi ufulyelo wenu.'' Alyoze evwile woma nawa akomokene , nyi kulyamba - umwe ni mukwo , ''Iye iya au , kakwambila fuji nyi meya , nyeyo ya ku mwononokena ?'' ²⁶ O ahetele ku chifuchi cha A-Ngalase , chize chalitalangana nyi Ngalileya . ²⁷ Muze atuhukile hashi, iye waliwanyine nyi lunga umwe wa kulimbo uze wapwile nyi ma shipilitu aluchisa . Shimbu linene kakazalile hina chipwe kutwama muzuwo alyoze hakachi ka chifuka ²⁸ Muze amumwene Yesu , wakololokele nyi kufulamana ku meso jenyi iye nyi kuhanjika nyi liji linene, '' Kuchi yami nyi yena , Yesu , mwe mwana Zambi ? nguna kwichi, kanda ungupinjisa .'' ²⁹ Mumu te hamba shipilitu ya luchisa atuhuke muli mutu . Mumu kanji wamukwachile , amufungile wakusa mu matenge nyi kuli , yiye wa patwila malenge jenyi nyi kumutwala mupuya ku mandemona. ³⁰ Mba Yesu wahulule ngwenyi , '' Jina lye yena yiya ? '' yiye wambile ngwenyi , '' Yami tununu , '' mumu te mandemona anji anjilile muli yiye . ³¹ Yiye wayumbile kuli yiye kanda atuma mu jondo. ³² Halyapwila kwapwile kuze mbunga ya ngulu kanali ha mulundu . Mandemona alyumbile kuli yiye aatayize kunjila muli ayo , nyi yiye wa atayijile ³³ .Mba mandemona atuhukile muli mutu anjilile mu ngulu nyi mbunga ya lundumukine ha mbongo mu chitende yafwa. ³⁴ Muze waze aalishile ngulu amwene chize alingile , achinyine akachambulwile muli limbo nyi ku minda . ³⁵ O atuhukile mukumona chize chasolokele , ejile kuli Yesu awanyine mutu yoze muli yiye hatuhukile mandemona. Yiye kanatwama ku yilyato ya Yesu , Hazala hina hapwa nyi mana ; no evwile woma . ³⁶ Waze achimwene aambulwilile ngwe chize apwishile mungunu mukwa mandemona . ³⁷ Nyi chizavu cheswe cha chifuchi cha A-Ngalase a mulembele Yesu akatuke kuli ayo , mumu evwile woma wunji . Yiye wanjilile mu ulungu akahiluke . ³⁸ Lunga yoze muli yiye atuhukile mandemona walyumbile kuli yiye hanga aye nenyi, alyoze Yesu washikile nenyi ngwenyi , ³⁹ ''Hiluka ku zuwo lye ukambujole yuma yinene hakulinga Zambi.'' Yiye wayile kwenyi, nyikwambujola ndusu mu limbo lyeswe ha yuma yize amulingilile Yesu . ⁴⁰ Muze Yesu ahilukile , mbunga amusambilile , mumu o eswe apwile nyi kumutalatala . ⁴¹ Talenu , lunga walijina Yalu , yoze mukwa kuyula sunangonga , wejile kuli Yesu wafulamanyine ku yilyato yenyi , walyumbile kuli yiye eze ku zuwo lyenyi ⁴² mumu wapwile nyi mwana umuwika wa pwo , ngwe kumi lya myaka nyi myaka yali , wapwile hakamwihi nyi kufwa . Alyoze shimbu Yesu apwile mujila yenyi , mbunga ya aatu amushinjekele. ⁴³ Nyi pwo yoze wapwile nyi musongo wa kuhita manyinga kumi lya myaka nyi myaka yali mwenawo wahwishile kulu yikumba yenyi yeswe kuli mbuki , alyoze kahashile kumuka nyiwumwe. ⁴⁴ Wejile kunyima lya Yesu wasele minwe ku lupula wa hina lyenyi , nyi hazehene kuhita cha manyinga jenyi chalitwaminyine . ⁴⁵ Yesu wambile ngwenyi , '' Yiya yoze wa ngusa minwe?'' Muze eswe alikalile , Petulu yamba , '' Mwata , mbunga ya atu anakwingilika nyi kukushinjeka . ⁴⁶ Alyoze Yesu ngwenyi , ''Wumwe wa ngusaminwe , mumu nevwe tachi jatuhuka muli yami.'' ⁴⁷ Muze pwo amwene ngwo kaswamine , wejile nyikuchikima yiye nyi kufulamana kumeso jenyi. wambulwile kumeso ja atu eswe ha chikuma chize amusele minwe nyi ngwe chize hahindukile haze hene . ⁴⁸ Yiye wambile kuli yiye ngwenyi , ''Mwanami , ufulyelo we hiwakupwisa mungunu . Uye kanawa.'' ⁴⁹ Shimbu te machihanjika wumwe wa kuzuwo lya mukwa kuyula sunangonga yeza , ni kwamba kuli yiye ngwenyi , '' Mwane hafwa . Kanda wumupinjisa Longeshi nawa.'' ⁵⁰ Alyoze Yesu akuchivwa achino , yiye wa mukumbulwile Yalu ngwenyi , ''Kanda wivwa woma ; fulyela wika , nyi yiye kumakamupwisa mungunu.'' ⁵¹ Muze ejile ku zuwo , katayijile nyiwumwe kunjila nenyi , shina Petulu nyi Yowano nyi Tiyangu nyi tato nyi naye ya mwana- pwo . ⁵² Eswe te kanalili nyi kulila mbimbi hali yiye , alyoze wambile ngwenyi , ''kanda nulila ; kafwile alyoze mu tulo ali.'' ⁵³ O amusehele , nyingika ngwo hafwa kulu. ⁵⁴ Alyoze yiye wa mukwachile ku kwoko watambikile , ngwenyi , '' Mwana , hinduka! '' ⁵⁵ Shipilitu yenyi yahilukile , wahindukile hazehene . Neye wambile amwehe chimwe cha kulya . ⁵⁶ Nyi yisemi jenyi alishikishile , alyoze waahele koki kanda nulweza nyiwumwe chize cha lingiwa.