¹ Mba ha tangwa lya sambata Yesu wapalikile mu minda , nyi tumbaji twenyi yahulula nona , mu moko jo , nyi kuji kukumuna yalya . ² Alyoze amwe Afwaliseu yamba ngwo , ''Kuchi te nunalingi chuma kuchalitele nyi shimbi kulinga ha tangwa lya Sambata ?'' ³ Yesu waakumbulwile , ngwenyi , ''kumnwatangile chipwe chize alingile Ndawichi , muze evwile zala , yiye nyi waze apwile hamwe nenyi nyi ? ⁴ Wanjilile mu zuwo lya Zambi wanjile mbolo ja kutumbyeka walile , wahanyine kuli waze apwile hamwe nenyi alye , jize kuchalitele nyi shimbi kulya shina hali asasendote wika. '' ⁵ Yiye wambile kuli ayo ngwenyi , '' Mwe mwana mutu yiye mwenya sambata nawa.'' ⁶ Mba ha tangwa lya sambata likwo nawa wanjilile mu sunangonga walongesele atu. Mwapwilemo mutu nyi kwokwo lyenyi lya chindume lya kusosewa. ⁷ Akwa kusonyeka nyi A-Fwaliseu amulayilile kachi mawuka umwe ha tangwa lya sambata , hanga akawane chitela muli yiye . ⁸ Alyoze yiye wanyingikine manyonga jo wambile kuli mutu yoze wapwile nyi kwoko lyenyi lya kusosewa ngwenyi , ''Katuka umane mukachi ka eswe.'' Yiye wakatukile wamanyinemo. ⁹ Yesu wambile kuli ayo ngwenyi , ''Mungunuhula ngwami , muchilita nyi shimbi ha tangwa lya sambata shina kulinga yipema nyi shina kulinga yipi , shina kulamwina mwomo nyi shina kwonwona?'' ¹⁰ Yiye wakengesele watalile hali ayo eswe wambile kuli yoze mutu ngwenyi , ,''Olola kwoko lye .'' Yiye walyolwele , nyi kwoko lyenyi lyahindukile . ¹¹ Alyoze o azalile to nyi ufwatulo ahanjikile umwe kuli mukwo ha chize malinga kuli Yesu. ¹² Chapwile ha matangwa aze yiye wayile ku mulundu muku lemba . Yiye wahwishile ufuku weswe nyi kulemba kuli Zambi . ¹³ Muze hapwile mwalwa , watambikile tumbaji twenyi kuli yiye , watongwele hakachi ko kumi nyi aali, waze waalukile ngwenyi apositolo. ¹⁴ Majina ja apositolo apwile Shimone (yoze amulukile ngwenyi Petulu) nyi mwanakwo Andeleu , Tiyangu , Yowano , Fwilipe , Mbatolomewu , ¹⁵ Mateu , Tomase , Tiyangu mwana Alefweu , Shimone amuvulukile ngwo Ka - zelo, ¹⁶ Yundase mwana Tiyangu , nyi Yundase ka- Kelyote, mwenawo nawa wapwile mwe mukwa ku musolola. ¹⁷ Yiye wapalumukine hamwe hamwe no ha mulundu wamanyine homa ha salama nyi mbunga yinene yatumbaji twenyi nyi chizavu chinene cha atu aku Yundeya nyi Yelusaleme nyi kusesa lya kalunga lwiji wa Telu nyi Sendone . ¹⁸ Wano ejile mukumwivwa nyi kwahindwisa ku misongo yo. Atu waze apinjishile kuli yizulye ya luchisa neo awukiwile . ¹⁹ Mbunga mu chizavu afupile kumusa minwe mumu tachi ja tuhukile muli yiye , nyi waahindwishile eswe. ²⁰ Muze watalile kuli tumbaji twenyi wambile ngwenyi , '' Kunwawaha yenu yiswale, mumu wanangana wa Zambi nyiwenu . ²¹ Kunwawaha yenu nwakwivwa zala halyapwila , mumu mumukakuta . Kunwawaha yenu nwakulilalila halyapwila , mumu kumunukaseha . ²² Kunwawaha yenu muze atu manuvwila kole , malihandununa nyi yenu manuchoka , mambila haze jina lyenu ngwe lipi , mumu hali mwe Mwana mutu . ²³ Wahililenu ha tangwa lize tumbukenu nyi uwahililo , mumu kwononona chenu chinene mwilu, mumu chizechene akako alingile kuli apolofeta . ²⁴ Alyoze lamba lyenu yenu pichi, mumu hinunatambula kulembejeka chenu. ²⁵ Lamba lyenu yenu nwakukuta halyapwila , mumu kumunukevwa zala . Lamba lyenu yenu nwakuseha halyapwila , mumu kumunukanenganyana nyi kulila . ²⁶ Lamba lyenu muze atu manuchichimyeka , mumu chizechene akako alingile kuli apolofeta akwonga . ²⁷ ''Alyoze ngunambe kuli yenu nunevu ,zangenu akwa kole jenu lingenu kanawa kuli waze akunuvwila kole . ²⁸ Wahisenu waze aku nushinga lembenu hali waze akunulinga chipi . ²⁹ Kuli yoze makulamba ha tafu , mwene tafu likwo nawa . Kachi umwe machiza chikuto che muhe nyi mbinja nawa . ³⁰ Hana kuli mweswe makwita . Kuli yoze achize yukumba ye , kanda wuka yita nawa. ³¹ Chize ngwe nunazange atu akalinge kuli yenu , lingenu nawa kuli ayo chizechene . ³² Nyi kachi nuna zange waze akunuzanga , hali manusakwila ? Mumiu chipwe yivulumunyi kakuzanga waze akwazanga . ³³ Kachi nwakulinga yipema kuli atu akulinga yipema kuli yenu , hali manusakwilila ? Mumu chipwe yivulumunyi kakulinga chizechene . ³⁴ Mumu kachi munuhana mukuli kuli atu munufulyela kutambula , hahi manusakwilila ? Mumu chipwe yivulumunyi kakuhana mikuli kuli yivulumunyi , hanga akatambule chizechene. ³⁵ Alyoze zangenu akwa kole jenu lingenu yipema kuli ayo . Hanenu mukuli kanda nufulyela chize mahilwisa , nyi chawana chenu kumuchikapwa chinene , kumunukapwa ana ja mwe chitunda , mumu yiye mukwa kheke kuli akwa kaleleso nyi yingulungulu ja atu. ³⁶ Pwenu akwa kheke , keshika chizechene Tatenu nawa yiye mukwa kheke. ³⁷ Kanda nukapatwila akwenu , mba kechi kanupatwila . Kanda nukahisa , mba kechi kanuhisa . Konekenenu , mba kumakanukonekena . ³⁸ Hanenu , mba kumakanwaha . Njongo yipema -yakukona, yakunyikumuna hamwe yakusupwoka - kumakayihana mu hina lyenyi . Mumu nyi cheseko chize munweseka nacho , kumakanwesekela cheka nawa. '' ³⁹ Chocho watele nawa chishima kuli ayo .''Kapuputa mahasa kusongwela kapuputa nyi? Kachi malinga , eswe aali makaholokela mu wina , nyi ka? ⁴⁰ Kambaji kechi kuhyana longeshi yenyi , alyoze mweswe yoze hamulongesa kumakapwa chizechene ngwe longeshi yenyi . ⁴¹ Kuchi te unatale ku koma kaze kali mu liso lya mukwenu , alyoze kushi kumona mukambo uze uli mu liso lye ? ⁴² Kuchi muwamba kuli mukwenu , ' Ndumbu , ngukuchize koma kaze kali mu liso lye.' muze yena mwene kushi kumona mukambo uze uli mu liso lye? Chilembese ! Ulyange kuchiza mukambo mu liso lye , mba mumona kanawa kuchiza koma kaze kali mu liso lya mukwenu . ⁴³ Mumu mutondo upema uze muwima mihuko yipi wakuhi , chipwe mutondo upi uze muwima mihuko yipema wakuhi . ⁴⁴ Mumu mitondo yeswe kanayinyingika ku mihuko yayo. Mumu atu keshi kuhela makuyu ku mingonga , chipwe uva ku mikalale ka. ⁴⁵ Mutu mupema ku upite upema wa mbunge yenyi masolola yipema , nyi chingulungulu ku upite wa ungulungulu wa mbunge yenyi masolola ungulungulu . Mumu kukulumbama cha mbunge kanwa mulihanjika . ⁴⁶ ''Kuchi tee nunanguvuluka , ' Mwene , Mwene, alyoze kunushi kulinga yuma yize ngunambe ? ⁴⁷ Mweswawo meza kuli yami mevwa maliji maalinga mungunulweza yoze malifwa nenyi. ⁴⁸ Kanapu ngwe mutu kanatungu zuwo, wafulile nyi kujotola wasele fundamentu ha liwe . Muze mihwiji ya meya yejile yalundumukine ha zuwo lize kutayahashile kulinyikisa , mumu alitungile kanawa. ⁴⁹ Alyoze yoze mevwa maliji jami alyoze keshi kulinga , kanapu ngwe mutu yoze watungile zuwo helu lya mavu nyi fundamentu yakuhi . Muze muhwiji wa meya wahulumukine ha zuwo lize , haze hene lyapuzukile , nyi kupuzuka cha zuwo lize chapwile chinene.''