1 Mba chizavu cho cheswe akatukile amutwalile Yesu kuli Pilatu. 2 Aputukile kumusuma yiye, ngwo, '' Twawana yono mutu nyiku hengesa vungu lyetu, nyikukanjisa kufweta lijimu kuli Sesale , nyi kwamba ngwenyi Kilishitu , mwanangana''. 3 Pilatu wamuhulile yiye , ngwenyi , '' Yena mwanangana wa A-Yunda ?'' Yesu wakumbulwile yiye ngwenyi, '' Yena unambe.'' 4 Pilatu wambile kuli asasendote akwa lutwe nyi mbunga ngwenyi, '' Chawanyine chitela nyichimwe muli yono mutu .'' 5 Alyoze ashinjikile kuhyana chikolo, ngwo, '' Kaku vungula atu eswe , nyi kulongesa kweswe mu Yundeya , nyi kuputuka ku Ngalileya ndo ku kuno.'' 6 Muze Pilatu evwile , wahulile kachi mwe lunga ka Ngalileya . 7 Muze asele chinyingi ngwe kanakatuka ku chifuchi cha Helonde, wapwile ku Yelusaleme ha matangwa aze. 8 Muze Helonde amwene Yesu , wawahililile chikolo, mumu ha shimbu linene wazangile kumumona. Yiye wevwile kulu ha kutwala kuli yiye wataliletalile akamumone kulinga chilayi chimwe . 9 Helonde wahlile Yesu nyi maliji anji , alyoze Yesu kakakumbulwile nyi chimwe . 10 Asasendote akwa lutwe nyi akwa kusonyeka amanyine nyi kumusuma chikolo yiye. 11 Helonde hamwe nyi maswalale jenyi amulelesele Yesu amulenyene yiye. Nyikumujika hina lya mukambo lya uhenya amuhilwishile nawa kuli Pilatu . 12 Mumu Helonde nyi Pilatu alikwachile usepa ha tangwa lize linene, mumu kunyima apwile nyi kole hakachi ko. 13 Pilatu muze hakungulula asasendote akwa lutwe nyi akwa kuyula nyi mbunga ya atu 14 wambile kuli ayo ngwenyi , '' Nwanehanga kuli yami yono mutu ngwe umwe wakuhengesa atu, alyoze yami , te namusopesanga kumeso jenu , chawanyine chitela nyi chimwe muli yono mutu ha kutwal ku yize yuma nunasumu nayo. 15 Ka, chipwe Helonde , mumu namutumanga kuli yiye , kumanyi, nyichimwe chakutela kufwa kachilingile . 16 Keshika mungumulamba nyi shikote mungumutusula. '' 17 Achi chamutamba kutusula mutu umuwika kuli ayo ha chiwanyino. 18 Alyoze alilile hamuwika , ngwo , '' Chizenu yono mutu , ututuswile Mbalapa!'' 19 Mbalapa yoze mutu ambile mu zuwo lya ususu ha vunda yjimwe alingile mu limbo ha ungalwe. 20 Pilatu wahanjikile kuli ayo cheka nawa, nyikuzanga kutusula Yesu. 21 Alyoze akololokele , ngwo ,'' Muhachilenu ha kulusu , muhachilenu ha kulusu.'' 22 Yiye wambile kuli ayo chisuho chamuchitatu, '' Kuchite , chipi chika yono mutu analingi ? chawanyine chitela cha kufwa muli yiye . Nyichimwe mungumulamba nyi shikote yiye , ngumutusule yiye.'' 23 Alyoze ashinjikile nyi kukololoka chinene , nyi kumwita yiye akamuhachile ha kulusu . Nyi maliji jo akumbile. 24 Mba Pilatu wapatwile chikapwe ngwe azangile. 25 Yiye watuswile ha vunda nyi ungalwe amumbilile mu zuwo lya ususu yoze amwichile . Alyoze wakunjikile Yesu ku upale wo. 26 Shimbu machimutwala ,akwachile umwe Shimone ka Selene , kanakakatuka ku minda , amutwikile kulusu , ayimbate kunyima lya Yesu. 27 Chizavu chinene cha atu , nyi cha mapwo amukawile ,ano te kanalili mbimbi nyikulinyenga hali yiye . 28 Alyoze nyi kwalumukila kuli ayo Yesu wambile ngwenyi, '' Yenu mapwo ja Yelusaleme , kanda nungulilila yami , Alyoze lililenu yenwene nyi anajenu. 29 Mumu talenu , matangwa meza muze makamba ngwo, ' kawaha miumba nyi majimo aze kasemene nyilimwe tangwa , nyi mele aze kamwishishine nyilimwe tangwa.' 30 Hohene makaputuka kwamba ku mi lundu ngwo, '' Holokenu hali yetu , ' nyi mindundena ngwo , ' Tufukenu.' 31 Mumu kachimalinga yino yuma ha mutondo wawisu, kuchi makalinga ha mutondo wa kuma?'' 32 Malunga akwo , aali yingulungulu , atwalile hamwe nenyi akashihe. 33 Muze ejile kuma kuze anavuluka ngwo, ' kavwale , '' Kuze kwene amuhachilile ha kulusu nyi yingulungulu - umwe ku chindume nyi mukwo ku chimeso . 34 Yesu wambile ngwenyi, '' Tata uakonekene kama mumu kanyingikine cize analingi.'' Nikulyanyina mazalo jenyi hakachi ko, atele chela. 35 Aatu amanyine nyikutala akwa kuyula nawa amukekwine yiye ngwo, '' walamwinyine akwo . Alilamwine mwene , yono mwe Kilishitu ya Zambi , yoze hanamutongola .'' 36 Maswalale nawa amulenyene yiye , nyiku kundama kuli yiye nyikumwaha vinakwe, 37 Ngwo , '' kachi mwe mwanangana wa A- Yunda , lilamwine yena mwene .'' 38 Kwapwile nawa chisoneko helu lyenyi ngwo yono mwe mwanangana wa A- Yunda .'' 39 Mba umwe wa kuli yingulungulu waze asukikile wamusawile ngwenyi, '' kachi mwe Kilishitu yena? lilamwine yena mwene nyi yetu nawa.'' 40 Alyoze mukwo nyikukumbulula yiye , ' wamukanjishile ngwenyi, ' Yena kushi woma chipwe wa Zambi , te uli nyi uhiso umuwika ? 41 Yetu chamwenemwene chinatute , mumu tunatambula fweto ya kutela yitanga yetu . Alyoze yono mutu kalingile nyi chimwe cha kupyasuka.'' 42 Yiye wambile , '' Yesu , ngwiuluke kama muze muwiza mu wanangana we.'' 43 Yesu wambile kuli yiye ngwenyi pundu ngunambe kuli yenu, musono yena kumuka pwa hamwe nyi yami mu Palachise.'' 44 Hapwila ngwe ola yamuchisambano, nyi milima yejile hashi heswe ndo ola yamuchilivwa 45 tangwa lyalayile . Nyi chikalakalacha hina cha tembele chapulikile hali. 46 Yalila nyikutambika nyi liji linene, Yesu wambile , '' Tata , mu moko je ngunakunjika Shipilitu yami. '' muze te hamba chino watulile mwono wenyi. 47 Muze kapitau amwene chize alingile , wachichimyekene Zambi ngwenyi , '' chamwenemwene yono mukwa ululi.'' 48 Mbunga jize jeswe akungulukile ku chitala chino muze amwene yuma yize alingile , ahilukile nyikulamba tulo jo nyikupihilila. 49 Nyi waze eswe amunyingikine , nyi mapwo waze amukawile ku Ngalileya , amanyine kusuku , nyi kumona yino yuma. 50 Tala mba umwe lunga jina lyenyi Yosefwe , mwenawo wapwile mukw kuyula . Yiye lunga mupema mukwa ululi. 51 Yono katayijile ku upatwilo wo nyi chitangu cho . Wa ku Alimatea , limbo lya mu Yunda , mwenawo wapwile nyikutalatala wanangana wa Zambi. 52 Yono lunga , wayile kuli Pilatu , mukwita mujimba wa Yesu . 53 Yiye wausunwishine , wauvungile mu hina lya linyu, wamusele mu fuka lya kutota mu liwe, muze kanda achipomba nyi umwe. 54 Lize lyapwile tangwa lya kululika , nyi tangwa lya sambata lyakundamine. 55 Mapwo waze akatukile hamwe nyi Yesu ku Ngalileya akawile kunyima amwene fuka nyi ngwe chize asele mujimba wenyi. 56 Ahilukile nyi kulita mbuto ya vumba lipema nyi yitumbo yipema ya kukwita. Ha tangwa lya sambata anamine nyi kulita nyi liji lya shimbi.