¹ Chimenemene ha tangwa litangu lya yenga , kayile ku fuka nyikutwala mbuto ya vumba yipema yize awayishile kulu. ² Ka wanyine liwe kufuka hachiza ko . ³ Yanyila , nyi kuwana mujimba wa Mwene Yesu wakwihi. ⁴ Chasolokele ngwe , ha shimbu machi kakashana ha chino , kumanyi , malunga aali kamanyine hehe no nyi mikanjo ya kuhyana . ⁵ Muze mapwo yevwa woma nyi kulihetamina meso jo hashi , kahanjikile kuli ayo ngwo , te kuchi nunafupu mukwa mwono hakachi ka afu? ⁶ Keshimo a muno , alyoze hahinduka ! iwulukenu ngwe chocho ahanjikile kuli yenu shimbu apwile mu Ngalileya , ⁷ kuhanjika ngwenyi , mwana mutu maka mu hana ku moko jatu a kwa shili , nyi kuha chila hakulusu, nyi ha tangwa lya muchitatu maka hinduka . ⁸ Mapwo ewulukile maliji ⁹ jenyi hi makatuka ku fuka nyi kwambulula yino yeswe kuli kumi nyi kachi kuli akwo ¹⁰ eswe.Mba Maliya ka Mandala , Yoano, Maliya naye ya Tiyangu , nyi mapwo akwo hamwe no nyi kuhanjika yuma eswe amwene kuli apositolo. ¹¹ Alyoze maliji ano ka solokele kuli ayo ngwe amakuli apositolo , nyi kuhona kufulyela mapwo. ¹² Alyoze Petulu yakatuka nyi kuzomboka ku fuka , nyi kumana nyi kutalatala mukachi yamona mahina a linyu hapomba ukawo. Petulu kakatukile hi maya ku mahyenyi , nyikukomoka ha chize chasolokele . ¹³ Mba , aali kuli ayo kayile ha tangwa lize lyene ku chihunda jina lyacho Emeu , hayo hapwile kumi lya kilometa kukatuka ku Yelusaleme . ¹⁴ Kali shimutwilile umwe nyi mukwo ha yuma yize yeswe ya solokele . ¹⁵ Chasolokele ngwo , ha shimbu ya kushimutwila nyi ku lihula umwe kuli mukwo , Yesu mwene wakundamine nyi kuya hamwe no. ¹⁶ Alyoze meso jo kawafukile ha kuhona kumunyingika . ¹⁷ Yesu yahanjika kuli ayo ngwenyi, ''Maliji muka wano muna hanjika umwe kuli mukwo shimbu munende?'' Kana kamana nyi kusoloka wulyi. ¹⁸ Mba umwe , jina lyenyi Kalelofwa, yawakumbula ngwenyi , '' yena ukawe uli mu Yelusaleme wanyingikine yuma yize yinakapwako ha matangwa ano nyi?'' ¹⁹ Yesu kahanjikile ngwenyi , '' Yuma yika ?'' yamwambulwila ngwo, '' Yuma yize ya kutwala kuli Yesu ka Nazaleta, uze wapwile pulofeta , mukwa ngolo nyi liji kumeso ja Zambi nyi atu eswe , ²⁰ nawa asasendote nyi akwa lutwe nhyi akwa kuyula jetu amukunjikile ku upatwilo wa kufwa ha kulusu . ²¹ Alyoze twapwile nyi kutalatala ngwo iye yoze makalamwina A-Izalele . Ewa , nyikuweza ku yino yuma yeswe , musono hi tangwa lya muchitatu hanga yino yuma yasolokele. ²² Alyoze , amwe mapwo mu mbunga yetu , atukomwesele , muze twapwile kufuka mushimbu ya chimenemene . ²³ Muze kawanyine ko mu jimba wenyi , ejile , nyi kuhanjika ngwo kamwene usolwelo wa tungelo waze ahanjikile ngwo kalinyi mwono . ²⁴ Amwe malunga waze apwile nyiyetu yaya kufuka , nyi kuwana chizechene ahanjikile mapwo . Alyoze kamumwene ko.'' ²⁵ Yesu yamba kul ayo , '' Yenu ihepuke yamalunga nyi akwa makoke kumbunge kufulyela yuma yize yeswe apulofeta akuhanjika ! ²⁶ Te kuchatambile Kilishitu kwivwa lamba lya yino yuma nyi kunjila mu uhenya wenyi nyi? '' ²⁷ Nawa kuputukila kuli Mose nyi kuli tupulofeta eswe , Yesu ya lumbunwina yuma hali mwene mumikanda yeswe . ²⁸ Muze akundamine kuchihunda kuze ayile , Yesu kalingile ngwe mahyana . ²⁹ Alyoze amukwikile , nyi kuhanjika ngwo , twama nyi yetu , mumu himuchipwa chingoloshi nyi tangwa kulyendala chikolo .'' Mba Yesu wanjilile yatwama hamwe no. ³⁰ Chasolokele ngwo , muze hatwama hashi nyi kulya hamwe , yanda mbolo , nyi kwikiswila , nyi kuyipalula nyi kuwahana . ³¹ Mba nyi meso jo alawile , o amunyingikine , iye watokele hameso jo. ³² Yamba kuli umwe nyi mukwo , '' Mbunge jetu kujevwile chivukuminya , shimbu ahanjikanga kuli yetu mu jila , muze ya zulula kuli yetu ye yisoneko ?'' ³³ Ya katuka ha ola yize yene nyikuhiluka ku Yelusaleme . Yawana kumi nyi umwe hamwe nyi waze apwile hamwe no , ³⁴ yamba ngwo , '' Chamwenemwene Mwene hahinduka , hasoloka kuli Semone .'' ³⁵ O ambulwile yuma ya lingiwanga mujila , mba Yesu kamunyingikine ha kupalula mbolo . ³⁶ Shimbu machihanjika yino yuma , Yesu Mwene nyikumana mukachi ko , kuhanjika kuli ayongwenyi , '' Sambukila kuli yenu .'' ³⁷ Mba akomokene nyi kuzala nyi woma , yanyonga ngwe amwene shipilitu. ³⁸ Yesu ka hanjikile kuli ayo ngwenyi , '' kuchi te nunalipikala ? kuchi te ihula hinakatuka mumbunge jenu? ³⁹ Talenu moko jami nyi molu jami , yami mwene. ngukwatenu nyi kungutala kanawa . Mumu mashipilitu keshi musunya nyi yifwaha , ngwe chize nunamono kupwa nawo.'' ⁴⁰ Muze te hahanjika yino wamwene moko jenyi nyi molu jenyi. ⁴¹ Nyi hindu katayijile mumu wa chiseke , ayo alikomokele . Yesu kahanjikile kuli ayo ngwenyi , '' Chakulya nulinacho ?'' ⁴² Kamwehele chihanda cha yishi , ⁴³ Iye kayitambwile nyi kulya kumeso jo. ⁴⁴ Iye kahanjikile kuli ayo ngwenyi , '' awa e maliji jami aze nanulwezele shimbu napwile nyi yenu , ngwami chalamba yuma yeswe kumanunuka yize yinasonewa mu shimbi ja Mose nyi mu mikanda ja apulofeta nyi mu masamu.'' ⁴⁵ Hohene walawishile manyonga jo , hanga anyingike yisoneko . ⁴⁶ Iye kahanjikile kuli ayo ngwenyi , '' Chocho chinasonewa , Yesu maka yanda nyi ku hinduka nawa kukatuka kuli afu ha tangwa lya muchitatu . ⁴⁷ Akambujole mulijina lyenyi kulukonyeka nyi ukonekeno wa milonga ku mafuchi eswe, kuputukila ku Yelusaleme . ⁴⁸ Yenu muli yela ya yino yuma . ⁴⁹ Tala , mungutuma chilakenyo cha Tata hali yenu . Alyoze twamenu mu limbo ndo manujika nyi ngolo ja mwilu.'' ⁵⁰ Mba Yesu ya watuwisa ndo kukamwihi nyi Mbetanyi . Iye kazundwile moko jenyi nyi ku wakiswila. ⁵¹ Chasolokele ngwo , shimbu apwile nyi kuwa kiswila , yawahichika nyi kumumbata mwilu. ⁵² Kana ka muwayila nyi ku hiluka ku Yelusaleme nyi chiseka chinji . ⁵³ O kapwile matangwa eswe mu tembele , nyi kuhalisa nyiku fumanyisa Zambi.