¹ Yesu wahetwile meso wamwene pichi waze anambila yawana yo mu milambu . ² Wamwene nawa umwe twamishi wa pwo chiswale kanambilamo tumbongo tukepe twaali . ³ Iye wambile ngwenyi , '' Chamwenemwene ngunambe kuli yenu , yono twamishi wa pwo chiswale kambilamo kuhyana eswe . ⁴ Wano eswe cha ku upite wo hahana ku milambu . Alyoze iye cha ku uswale wenyi hahana cheswe anakapwa nacho. ⁵ Shimbu amwe ahanjikile ha kutwala ku tembele , ngwe hayihenyamisa nyi mawe apema nyi milambu , wambile ngwenyi, ⁶ '' Hakutwala ku yuma yino munamono, matangwa kumakeza muze kechi kachichika kuno liwe nyilimwe ha likwo , lize kechi kalipuzula.'' ⁷ Amuhulile , ngwo , ''Longeshi , shimbu yika muyikapwako ? Chilayi cha kwiza cha yino yuma chika? '' ⁸ Yesu wakumbununwe , '' Kanyamenu kanda akanupyangula . Mumu anji kumakeza mu jina lyami ngo, yami uze , nyi mwaka hiwa kundama ; Kanda nwakaula. ⁹ Muze munwivwa ha jita nyi yizungozungo, kanda nukasusumyana , mumu chatamba yino yuma kupwa hatangu , alyoze songo kulichi kapwa ,hohene. ¹⁰ Hohene wambile kuli ayo ngwenyi , akwa vungu limwe kumaka,atukila akwa vungu likwo , nyi akwa wanangana umwe kumakakatukila akwa wanangana ukwo. ¹¹ Kumu kukapwa minyiko tupunga nyi yilungo. Mu kukapwa yuma ya kuvwisa woma nyi yilayi ya mwilu. ¹² Alyoze shimbu yino yeswe kumakanukwata , kumakanuhungumyona kuma kanukanjika ku masunangonga nyi mazuwo ja ususu nyi kununeha kumeso ja myanangana nyi manguvulu mumu ha jina lyami . ¹³ Muchikapwa kuli yenu mukuhana shindakenyo. ¹⁴ Chipatalenu mu mbunge jenu kanda nukapukuna shimbu kanda chize , ¹⁵ mumu mungukamwaha kanwa nyi mana , aze akwa kulimika nyi yenu eswe kechi kahasa kuchi'nda chipwe kuhanjika. ¹⁶ Alyoze makanukunjika chipwe kuli yisemi , nyi asongo nyi atu , nyi usoko, nyi tusendo , nyi makashiha amwe a kuli yenu. ¹⁷ Kumakanuvwila kole kuli eswe mumu ha jina lyami . ¹⁸ Alyoze chipwe lukambu nyiumwe wa mu mutwe wenu kechi katoka . ¹⁹ Mu uhumukizo wenu nukazuke mwono wenu. ²⁰ '' Muze munumona Yelusaleme hayijingilika nyi yilombo, hohene nunyingike ngwenu kukuwa chayo hichakundama. ²¹ Hohene waze mu Yundeya akachinyine ku milundu nyi waze muchima lyayo akatukemo , nyi waze mapwa mu yambu kanda akanjilamo. ²² Mumu wano e matangwa a kukala milonga , hanga yuma yize yeswe yinasonewa yikamanunuke. ²³ Lamba kuli waze mapwa nyi ufumba nyi kuli waze ma amwisa ha matangwa aze ! Mumu kumukapwa huli linene ha chifuchi nyi utenu kuli atu ano. ²⁴ kumakafwa ku lutwilo wa katana, kumakaatwala funge ku mavungu eswe , nyi Yelusaleme kumakayilyata kuli akwa mavungu ndo myaka ya akwa mavungu muyikamanunuka. ²⁵ ''Mba kumukukapwa yilayi mu tangwa nyi kakweji nyi matongonoshi , nyi hashi . Kupinda cha mavungu nyi kulitwita , ha hundunjila wa kalunga -lwiji , nyi mikanya yenyi. ²⁶ Mukukapwa atu nyi kulezumyoka aka woma ha kutalatala yuma yize muyiza ha yifuchi yeswe ya hashi . Mumu mutachi ja malilu kumujikanyika. ²⁷ Hohene makamona mwe mwana mutu kaneza mu malelwa nyi tachi uhenya unene . ²⁸ Alyoze muze yino yuma muyiputuka kupwa , hetukenu nutale kwilu , mumu ukule wenu unakundama.'' ²⁹ Yesu wahanjikile chishima kuli ayo ngwenyi , '' Talenu mukuyu , nyi mitondo yeswe . ³⁰ Muze muyisokoloka , munu chimona , mununyingika yenwene ngwenu lwizi hapwa hakamwihi. ³¹ Chize chene , nyi yenu nawa muze munumona yino yuma kumanunuka, nukanyingike ngwenu wanangana wa Zambi uli hakamwihi. ³² Pundu ngunambe kuli yenu , chisemuko chino kuchichi kawa nyichimwe ndo yuma yeswe muyioza kupwa . ³³ Lilu nyi hashi muyikahwa , alyoze maliji jami kechi kahwa nyichimwe. ³⁴ Alyoze keyelenu kuli yenwene , kuchina mbunge jenu mujilema nyi upululu nyi kuzengewa nyi yipikalo ya mwono uno , nyi tangwa lize mulitulumuka hali yenu ngwe muheto susumuku hilya soloka . ³⁵ Mumu chocho mulikeza hali waze eswe akutwama ha kuzazuluka cha hashi heswe. ³⁶ Alyoze kanyamenu ha shimbu lyeswe , nyikulyumba hanga nukakumbe nukamane kumeso ja mwe mwana mutu.'' ³⁷ Mba nyi ha tangwa wapwile nyi kulongesa mu tembele , nyi ufuku watuhukile nyi kuya nyikutwama ha mulundu wuze ngwo Olevweti. ³⁸ Nyi ati eswe alimenekene nyikwiza kuli iye mu tembele mukumwivwa.