¹ Kwapwile tangwa limuwika shimbu Yesu machi longesa atu mu tembele nyi kwambujola sango lipema achi asasendote akwa lutwe nyi akwa kusonyeka ejile kuli yiye hamwe nyi makulwana . ² Kana kahanjika , kwamba kuli yiye , '' Twambulwile tachi muka wakuzachisa muli ayi yuma , hanji iya yoze wakuhele tachi.'' ³ Wakumbulwile nyi kwamba kuli ayo , '' Nyi yami mungunuhula chihula nyi yenu nungulweze . ⁴ Upapachiso wa Yoano : Mwilu lunakakatuka nyi kuli atu ?'' ⁵ O anyongene hakachi ko, ngwo,'' Kachi mutwamba ngwetu , ' Kufuma mwilu , ' Iye mamba ngwenyi , ' Mba kuchi te kumwamufulyelele ?' ⁶ Alyoze kachi mutwamba ngwetu , ' Kuli atu , ' Atu eswe kumatwasa mawe, mumu kanakuuka ngwo Yoano kapwile ka pulofeta .'' ⁷ O akumbulwile ngwo kutwanyingikine kuze inakatuka . ⁸ Yesu wambile kuli ayo ngwenyi , '' Nyi yami nawa chishi kunwambulwila tachi yize nakulinga nacho yino yuma .'' ⁹ Iye walwekele atu chino chishima , '' Umwe mutu watumbile munda , wa uvwa waukunjikile kuli njimi , nyi ku katuka kuya kuchifuchi chikwo ha shimbu yinene. ¹⁰ Nyi ha mwaka wa kuhela watumine ndungo kuli njimi , akamwehe yimwe ya ku mihuko ya munda . Alyoze njimi yamulamba , nyi kumukatwisa mokomoko . ¹¹ Cheka nawa watumine ndungo mukwo iye nawa yamulamba , yamusaula , nyi kumukatwisa mokomoko . ¹² Cheka nawa watumine wamuchitatu neye nawa amulemekene , amumbilile haze. ¹³ Mwenya munda wambile ngwenyi , ' kuchi mungulinga ? Mungutuma mwanami nazanga chinji. hanji makamulemesa.' ¹⁴ ''Alyoze muze njimi amumwene , anyongene hakachi ko , ngwo , ' yono mwe swana . Tweyenu tumushihe , hanga chihinga chikapwe hichetu.' ¹⁵ Amumbilile haze lya munda nyi ku mushaha . Kuchi keshika mwenya munda makaalinga ¹⁶ ?Kumakeza nyikwenyeka waze njimi , nyi ku hana minda kuli akwo .'' Muze achivwile ambile ngwo , '' Kanda chikapwa kama nyilimwe!'' ¹⁷ Alyoze Yesu watalile kuli ayo , nyi kwamba ngwo , '' Ulumbunwiso muka unasonewa: ' Liwe lize alitunyine tungi lyenalyo kulyapwa liwe lya mbango'? ¹⁸ Mweswawo malimbuka ha liwe lino kumakamakwoka mwihanda , nyi hali mweswawo muli kaholokela maka chikyeka.'' ¹⁹ Akakusonyeka nyi asasendote akwa lutwe afupile ha ola yize yene kumukwata , mumu anyingikine ngwo watele chishima chino chw kutuhisa. Alyoze evwile woma wa atu . ²⁰ Kumutalishisa kanawa , atumine ngendeshi waze alyongele kupwa akwa ululi, hanga amuwanyine milonga hakuhanjika chenyi , hanga akahase kumukunjika ku chiyulo nyi kutachi ja nguvulu. ²¹ Amuhulile , ngwo '' Longeshi , tunanyingika ngwo nwakutulweka nyi ku tutangisa kanawa , kushi katonde kuli atu , alyoze wakulongesa jila ya Zambi nyi kulita nyi umwenemwene . ²² Chinalite yetu kuhana lijimu kuli Sezali, nyi ka?'' ²³ Alyoze Yesu wanyingikine kalimbalimba ko, nyi kwamba kuli ayo ngwenyi , ²⁴ ''Ngulwezenu lumbongo . Chifa chaya nyi jina liliho?'' Ambile ngwo , '' Lya Sezali'' ²⁵ Iye wambile kuli ayo ngwenyi , '' Hanenu yuma ya Sezali kuli Sezali , nyi yuma ya Zambi kuli Zambi.'' ²⁶ Kakahashile kumuwana mulonga muli yize a hanjikile kulutwe lya atu, alyoze akomokene hakumbululo lyenyi , aholele kulu. ²⁷ Muze amwe A-satuseu ejile kuli iye , waze akwamba ngwo uhindukilo ku afu wakuhi nyiumwe , ²⁸ amuhulile kwamba ngwo , '' Longeshi , mose wasonekene kuli yetu ngwenyi kachi yayo ya umwe mafwa , kali nyi pwo , iye keshi mwana , mwnakwo akambate mwe pwo,aka sangule ana kuli yayo. ²⁹ Kwapwile akweze shimbyali nyi mutangu kanakambata pwo , alyoze yafwa chakuhona mwana , ³⁰ nyi wamuchali chocho. ³¹ Nyi wamuchitatu wamumbachile , chize chene ngwe wa mushimbyali wafwile kwakuhona mwana . ³² Kulutwe lya chize pwo nawa wafwile . ³³ Ha uhindukilo wa afu pwo lyaya makapwa ? Mumu e shimbyali apwile nenyi ngwe mukwo pwo.'' ³⁴ Yesu wambile kuli ayo ngwenyi , ''Ana malunga ainoshimbu kakumbata nyi kuhangisa malo . ³⁵ Alyoze waze anatela kutambula kuhinduka kwa afu keshi kumbata chipwe ku hangisa. ³⁶ Mumu kahashile kufwa nawa , mumu kanalite nyi angelo kanapu ana ja Zambi, kapwa ana ja uhindukilo wa afu. ³⁷ Alyoze te afu mahinduka , chipwe Mose wasolwele , kuchihanda cha kutwala ku chiputa , kuze kanavuluka Mwene ngwenyi Zambi ya Apalahama nyi Zambi ya Izake nyi Zambi ya Yakomba . ³⁸ Aye hi Zambi ya afu ko , alyoze ya a mwono , mumu eswe katwama nyi mwono kuli iye.'' ³⁹ Amwe a kuli akwa kusonyeka akumbulwile ngwo , '' Longeshi , wakumbulula kanawa.'' ⁴⁰ Mumu kakahashile kumuhula nyi chimwe chihula nyichimwe nawa. ⁴¹ Yesu wambile kuli ayo ngwenyi , '' Ngwe kuchi akwamba ngwo Kilishitu iye mwana Ndawichi ? ⁴² Mumu Ndawichi mwene kanambe mu mukanda wa masamu , ngwenyi Mwene wambile kuli mwene wami , ' Twama ku kwoko lyami lya chindume, ⁴³ ndo mungusa akwa kole je chitwamo cha yilyato ye.' ⁴⁴ Ndawichi kanavuluka Kilishitu ' Mwene', kuchi mapwa mwana wa Ndawichi?'' ⁴⁵ Shimbu atu eswe machipanjika wambile kuli tumbaji twenyi ngwenyi , ⁴⁶ kanyamenu akwa kusonyeka , waze akufwila kwendangana nyi mahina asuku a mukambo nyi kuzanga kwameneka mu yitanda nyi yitwamo ya kulutwe mu ma sunangonga nyi yihela yakwalutwe ku yiwanyino ⁴⁷ .O kakwenyeka mazuwo ja tuliwa a mapwo nyi ha kulisolola mba chisuku . Malunga apwa chocho makatambula uhiso wahyana.''