¹ Yesu yamba kuli tumbaji twenyi ngwenyi, '' kwapwile umwe pichi yoze wapwile nyi kaselo keny8i , akwa amusumine ngwo kana mwanga yikumba yenu. ² Chocho yono pichi wamu sanyikile nyi kwamba kuli yiye ngwenyi , ' Acho chika ngunevu hali yena? Lumbununa uselo we mumu kuchi kahasa kupwa kaselo nawa.' ³ ''Mba kaselo yamba kumbunge yenyi ngwenyi, ' kuchi natamba kulinga , mumu mwene wami hanguchiza uselo wami ? Ngolo ja kulima chishi najo , sonyi mungwivwa haku wanjila. ⁴ Nguna nyingika chize mungulinga , hanga a ngutambule muma zuwo jo.' ⁵ Yiye yasanyika akwa mikuli ja mwene wenyi, yamba kuli mutangu ngwenyi , ' kongo lika uli nalyo kuli mwata wami?' ⁶ ''Yiye yamba ngenyi , ' kulakaji lya njongo ja maji.' Yamba kuli yiye ngwenyi anda mukanda we , utwame nyikawashi , usoneke ngwe makumi atano.' ⁷ ''Kulutwe yamba kuli mukwo ngwenyi , '' nyi yena kongo lika uli nalyo ?' Yiye yamba ngwenyi , ' kulakaji lya njongo ja tiliku .' Yamba kuli yiye ngwenyi , Anda mukanda we wusoneke ngwe makumi nake.' ⁸ Mwata wenyi wahalishile kaselo ka uhenge mumu walingile nyi ukanyame . Mumu ana ja chisemuko chino kana kanyama kuhyana akwa pangu . ⁹ Ngunambe kuli yenu , ngwami , litengelenu tusendo aku upite wa uhenge ha muze hijinuhwa , ayo akanutambule muma mwa kutwama mwa mutolo. ¹⁰ Yoze mashishimika nyi yuma yikepe kepe mashishimika nawa nyi yuma yinene , yoze mahengesa nyi yuma yikepe kepe mahengesa nyi yuma yinene. ¹¹ Keshika nyi kunwashishikile nyi upite wahano hashi , yiya makunjika kuli yenu upite wamwenemwene? . ¹² Nyi kachi kunwa shishikile nyi yuma yize yapwa ya mbala , yiya manwaha mbongo ja yenwene? ¹³ Ngamba nyiumwe mahasa kulingila myata aali, ndo mavwila kole umwe akazange mukwo , hanji makakaminya kuli umwe akalelese mukwo. Kunwa hashile kulingi Zambi nyi kulingila upite wahano hashi nawa.'' ¹⁴ Afwaliseu nawa , se ayo akufwila mbongo, ha kwivwa yino yuma yeswe, amu kekwine. ¹⁵ Yesu yamba kuli ayo ngwenyi , ''' Yenu nuli akwa kulisambisa kumeso .ja atu , alyoze Zambi kanyingika mbunge jenu. Mumu chize machilemesa chikolo hakachi ka atu chapwa chizelwokeso kumeso ja Zambi . ¹⁶ Je shimbi nyi apolofeta yapwile ndo kui Yowano . Chize ku mwaka wenyi , sango lipema lya kuwanangana wa Zambi kanambulula , mba eswe kanafupu kunjilamo nyi tachi. ¹⁷ Alyoze chashi kuhwa chalilu nyi hashi mba kuhwa cha toshi limuwika lya shimbi ya Zaambi chikalu. ¹⁸ Mweswawo malakula mukwo pwo nyi kumbata weka malinga utanji nyi mweswawo mambata yoze hana mulakula kuli mukwo lunga malinga utanji. ¹⁹ '' Kwapwile umwe pichi yye wazalile mahina ja ufungo nyi linyu lipema nyi kutewama nyi useheselo tangwa ha tangwa mu wa upite wenyi . ²⁰ Kwapwile nawa umwe chiswale jina lyenyi Lazalo amutumbikile kuchi kolo chenyi , wa too nyi yilonda , ²¹ yiye yevwa usona wakuli kuchisa nyi yi fwenyu fwenyu yize ya holokele ku mesa ya pichi. Chipwe tuwa yeza nyi ku lesa hayilonda yenyi. ²² Chiswale yafwa nyi angelo yamusa mukondo ya Apalahama . Pichi nawa yafwa yamufunda , ²³ nyi muma mwa afu , yahetula meso jenyi mu upinjilo yamona Apalahama kusuku nyi Lazalo mukondo yenyi. ²⁴ Chocho yiye walilile nyi kutambakana ngwenyi , '' Kaka Apalahama , ngwivwile kama keke nyi kutuma Lazalo , hanga a chupike songo lya munwe wenyi mumeya akekemese limi lyami , mumu nguna pinji mumulengi uno.' ²⁵ ''Alyoze Apalahama ngwenyi , '' Mwanami , iwuluka ngwe yena hamyaka yamwono we watambwile yuma ye yipema , chize chene Lazalo watambwile yuma yipi . Yiye halyapwila . ²⁶ Mba kuweza kuyuma yino yeswe mukachi kayetu nyi yena mbongo yinene kuya kola , hanga waze mazanga kukatuka kuno akaye kuli yena kechi kuhasa , nyi chipwe waze mazanga kukatuka kuno akeze kuli yena kechi kuhasa.' ²⁷ ''Yiye pichi yamba ngwenyi , ' Ngunakulembe , kaka Apalahama umutume kama ku zuwo lya tata - ²⁸ mumu nguli nyi ana - akwetu atano - hanga akashindakenyene chikolo kuli yiye kuchina meza kuno kuma kwakupinda.' ²⁹ Alyoze Apalahama yamba kuli yiye ngwenyi , ' kali myi Mose nyi apolofeto , akevwilile.' ³⁰ ''Mwe pichi yamu kumbulula ngwenyi , ' ka , kaka Apalahama , alyoze nyi kachi umwe wa afu maya kuli ayo makalikonyeka.' ³¹ ''Alyoze Apalahama yamba kuli yiye ngwenyi , nyi kechi kwivwa Mose nyi apolofeto , kechi kakunuka chipwe umwe mahinduka hakachi ka afu.'''