¹ Chasolokele hatangwa limwe lya sambata , muze wanjilile mu zuwo lya umwe mukwa lutwe a kuli A- Faliseu hanga alye mbolo , o te kanamulayila. ² Kumanyi , kwapwile kumeso jenyi umwe mutu nyi musongo wa ndondo . ³ Yesu wahulishile kuli akwa shimbi nyi A-Fwaliseu ngwenyi , '' Muchilita nyi shimbi kuwuka ha tangwa lya sambata , nyi ?'' ⁴ Alyoze aholele kulungunga kwo. Yiye Yesu yamukwata , yamu uka , wamwechele aye kwenyi. ⁵ Yiye wambile kuli ayo ngwenyi , '' Yiya hakachi kenu mapwa nyi chimbulu hanji ngombe yoze maholokela mu wina keshi kumuchizamo haze hene ha tangwa lya sambata ?'' ⁶ O kahashile kumukumbulula nawa ha yino yuma. ⁷ Muze Yesu amwene ngwe chize atongwele yitwamo ya kulutwe , yiye watele chishima , kuli waze aalakenyene ngwenyi , ⁸ '' Muze umwe makulakenya ku ulungi , kanda utwama ha chitwamo cha kulutwe, mumu hanji umwe mulemu wahyana yena mamulakenya. ⁹ Mba yoze wanulakenyene eswe aali maheta , kuli yena ngwenyi , ' Lisekule hali yono; hohene muputuka nyi sonyi kutambula chitwamo cha kusula. ¹⁰ Alyoze muze makulakenya , yako ukatwame muchitwamo cha kusula , hanga muze yoze wakulakenyene meza , akambe kuli yena ngwenyi , kasendo , senya kulutwe . ' Hohene kumukapwa nyi ulemu kumeso ja waze eswe anatwama ku mesa hamwe nyi yena. ¹¹ Mumu mweswawo malingamisa kumakamulelesa , nyi yoze malilelesa kuma kamunangamisa.'' ¹² Yiye wambile kuli yoze nawa wamulakenyene ngwenyi , '' Muze yena mulinga kulya hanji chiteleka , kanda ukalakenya tusendo twe chipwe ana - akwenu chipwe ayayenu chipwe usoko we chipwe enyembo a pichi, kuchina hanji makulakenya tangwa likwo , akakukundulule cho. ¹³ Alyoze muze yena mulinga chiteleka , lakenya yiswale , nyi yitonji , nyi yilema , nyi tupuputa , ¹⁴ Mba kumukawaha , mumu mukachitambula ha uhindukilo wa akwa ululi.'' ¹⁵ Mba umwe wa kuli waze atwamine ku mesa hamwe nenyi ha kwivwa yino yuma, wambile kuli yiye ngwenyi , kawaha yoze makalya mbolo mu wanangana wa Zambi !'' ¹⁶ Alyoze wambile kuli yiye ngwenyi , '' umwe mutu walulikile chiteleka chinene walakenyene anji. ¹⁷ Yiye watumine ndungo yenyi ha ola ya chiteleka , kuli waze alakenyene ngwenyi , ' Tweyenu , mumu yuma yeswe yinalulika.' ¹⁸ '' O eswe aputukile kuhanjika tulyongelo . Mutangu wambile kuli yiye ngwenyi , ' Hinalanda wande , changutamba kuya ngukawutale. Ngunakulembe mwane ngutayize kama yami chichi kwiza.' ¹⁹ ''Mukwo wambile ngwenyi , ' Hinalanda makanga atano a ngombe , mba munguya nguka eseka . Ngunakulembe mwane ngutayize kama yami chichi kwiza. ²⁰ '' Mukwo ngwenyi , ' Hinambata pwo , keshika chahashile kwiza.' ²¹ '' Yoze ndungo wayile akambulule yino yuma kuli mwene wenyi . Hohene mwenya zuwo watenukile chikolo wambile kuli ndungo yenyi ngwenyi , Tuhuka kawashi uye ku matapalo nyi mikombwelo yamu limbo ukanehe muno yiswale , nyi itonji , nyi tupuputa , nyi yilema .' ²² ''Mba ndungo wambile ngwenyi mwene chize wambanga hichalingika , nyi hindu mihela kuyili.' ²³ ''Mwene wambile kuli ndungo ngwenyi , ' Tuhuka uye kumajila nyi ku yipanga ukaashinjile kunjila hanga zuwo lyami likazale to. ²⁴ Mumu ngunambe kuli yena ngwami , Nyiumwe wa kuli malunga waze aalakenyene kechi kalya chiteleka chami. ²⁵ Mbunge jinene ayile hamwe nenyi , yiye wateulukile wambile kuli ayo ngwenyi , ²⁶ '' kachi mutu meza kuli yami keshi kuvwila tato , nyi naye , nyi mukwopwo , nyi mandumbu jenyi , ewa , nyi mwono wenyi mwene nawa , kahashile kupwa kambaji kami. ²⁷ Mweswawo keshi kumbata kulusu yenyi nyikungukaula kahashile kupwa kambaji kami. ²⁸ Mumu yiya wa kuli yenu nyikuzanga kutunga kaposhi keshi kutwama hatangu akalule ndando kachi mapwa nayo yize ya kumumanununa? ²⁹ Kuchina hanji muze te hasa fundamentu kahashile kumanununa, waze eswe mamutala maputuka kumukekuna , ³⁰ Ngwo yono mutu waputukile kutunga alyoze kahashile kumanununa. ³¹ Hanji mwanangana muka , shimbu maya mukwasa jita nyi mwanangana mukwo , keshi kutwama punga hatangu shina mahasa nyi kumi lya tununu kutakana nyi yoze meza kulimika nenyi nyi makumi aali a tununu? ³² Nyi ka shimbu achili kusuku , matama tunganda amulembele uwanyino . ³³ Chocho kevwe , mweswawo wa kuli yenu keshi kwehuka yize yeswe ali nayo kahashile kupwa kambaji kami. ³⁴ Mungwa upema , alyoze nyi hiwasamuka, kuchi mu upwa mungwa nawa ? ³⁵ Kuwatelele chipwe hashi chipwe pinga . Maumbila . Yoze uli nyi matwi a kwivwa , evwe.''