¹ Chasolokele tangwa limwe Yesu wapwile nyi kulemba muchihela chimwe. muze hawisa umwe wa kuli tumbaji twenyi yamba kuli iye , ''Mwene , tulongese kama kulemba ngwe chizechene Yowano walongesele tumbaji jenyi.'' ² Yesu yamba kuli ayo ,'' Muze munulemba ambenu ngwo , ' Tata , jina lyenu lilemese ngwe musandu. wanangana wenu wize. ³ Twehe kama tangwa ha tangwa mbolo yetu yize twakufupa . ⁴ Utukonekene kama milonga yetu , ngwe chizechene yetu twakukonekena mweswe uli nyi kongo kuli yetu. Kanda ututwala kama kucheseko .'''' ⁵ Yesu wambile kuli ayo , '' Iya hali yenu mapwa nyi mukwo, nyi kuya kuli iye hakachi ka ufuku, nyi kwamba kuli iye , Kasendo , ngwehe kama mbolo jitatu , ⁶ mumu kasendo muwenyi heza kuli yami, chishi nacho chize mungumwaha'? ⁷ Mba yoze ulimukachi mamukumbulula ngwenyi , ' Kanda unguketeka . Hinajila pito kulu nyi ana jami nyi yami hi mtuna pombe. Chahashile kuhinduka nyi kukwaha mbolo.' ⁸ Ngunambe kuli yena chipwe kahindukile nyi kukwaha mbolo mumu uli kasendo wenyi alyoze mumu hsakuketeka chenyi kumakahinduka nyi kukwaha mbolo jinji jeze mufupa. ⁹ Nyi yami ngunambe kuli yenu , Etenu, nawa makakwaha; fupenu, kumukayiwana; ngongwelenu, kumakakwazulwila. ¹⁰ Mumu mutu weswe meta matambula ; nyi wakufupa kakwiwana; nyi kuli mutu yoze mangongwela , kumakamwazulwila. ¹¹ Chisemi muka hachi kenu , kachi mwanenyi meta yishi, mamwaha kapela kuhona kumwaha yishi? ¹² Chipwe meta lisanga , wunahase ku mwaha kavwanda? ¹³ Halyapwila, kachi yenu nuli api nunanyinngika kuhana yawana yipema kuli ana jenu, shina ho chikolo Tatenu wa mwilu mahana Shipilitu Musandu kuli waze ma mwita?'' ¹⁴ Mba muze Yesu apwile nyi kutuwisa ndemonyu kamama . Muze ndemonyu atuhukile , kamama wahanjikile, nyi mbunga akomokene . ¹⁵ Alyoze amwe atu ambile , '' Nyi tachi ja Mbelezepu , mwata wa m andemonyu , kakutuwisa andemonyu.'' ¹⁶ Akwo nyi kumweseka afupile chilayi kuli iye kufuma mwilu. ¹⁷ Alyoze Yesu wanyingikine manyonga jo nyi kwamba kuli ayo ngwenyi, '' Mawanangana eswe alihandununa ene kumakapwisa ahululu, nyi zuwo lya kuhandunuka mulipuzuka. ¹⁸ Nyi kachi satana malihandununa mwene, kuchi wanangana wenyi mumana? mumu nwakwamba ngo nakutuhwisa andemonyu mu tachi ja Mbelezepu. ¹⁹ Nyi kachi nakutuhwisa andemonyu mu tachi ja Mbelezepu , mutachi ika yize akutuwishila waze akunukaula? Mumu ha chino , kumakapwa akwa kunupatwila. ²⁰ Alyoze nyi kachi mungutuhwisa andemonyu nyi munwe wa Zambi , kachi wanangana wa Zambi hiuneza kuli yenu. ²¹ Muze chitakame wakulipakata mafunga zuwo lyenyi , yikumba yenyi muyiwaha, ²² Alyoze muze lunga chitakame makangana kuhyana iye chitakame ma chize kulipakata chenyi muze akolele nyi iye makapangila yikumba yenyi. ²³ Wuze keshi nyi yami kanalimika nyi yami, nyi yoze keshi kukunga hamwe nyi yami kanasandula. ²⁴ Muze Shipilitu ya luchisa ya tuhuka muli mutu, mapalika ndusu muma nyi kufupa uwhimino. Se keshi kuwana, yakwamba , ' munguhilukila zuwo lyami lize ngunakatukamo.' ²⁵ Muze hiwahiluka , mawana lize zuwo hali komba lyakululika . ²⁶ Keshika hohene maya matwala hamwe nenyi mashipilitu eka shimbyali waze api kuhyana yize yene meza nyi kutwama eswe hamwe muzemwene. Songo lya yoze mutu mulihyana kupiha. ²⁷ Chasolokele , shimbu machihanjika ayino yuma , mwana pwo umwe wa kumbunga wakololokele nyi liji lyenyi linene nyi kwamba kuli iye , '' kulyawaha jimo lize lyakusemene nyi mele waze wamwine .'' ²⁸ Alyoze yamba ngwenyi,'' Ewa kawaha waze akwivwa liji lya Zambi nyi kulifunga.'' ²⁹ Muze mbunga yapwile mu kutohwa, Yesu waputukile kwamba ngwo,'' chisemuko chino chisemuko chipi. Chakufupa chilayi nyi chilayi keshi kahaacho shina chilayi cha Yona. ³⁰ Mumu ngwe chizechene Yona anakapwa chilayi kuli akwa A-Ninive , chocho nawa mwe mwana mutu makapwa ku chisemuko chino . ³¹ Mwanangana wa pwo waku sule kumakahinduka ha upatwilo hamwe nyi malunga achisemuko chino makahisa, mumu kanakatuka ku songo lya chifuchi mu kwivwa mana ja Solomone, nyi kutala umwe wahyana Solomone kali hano. ³² Malunga aku Ninive kumakamana ha upatwilo hamwe nyi atu achisemuko chino makachihisa, mumu alikonyekene hakwambujola cha Yona, nyi kutala umwe wahyana hali Yona kali hano. ³³ Nyiumwe , muze hawika ndeya , masweka chipwe masamushi ya chisoka, alyoze hachikwachilo cha ndeya , hanga waze manjila akamone pangu. ³⁴ Liso lye ndeya ya mujimba . Muze liso lye mulipwa lingunu nyi mujimba we weswe unazale nyi pangu . Alyoze muze liso lye lyapiha , mujimba we uli mu milima. ³⁵ Halyapwila , kanyamenu , pangu ili muli yenu kanda yipwa milima. ³⁶ Nyi muze mujimba we wazala nyi pangu , nyi chihanda nyichimwe chamilima muchiwanyiwa, mba mujimba we weswe mu upwa ngwe ndeya muyikupangulwisa nyi pangu lyayo.'' ³⁷ Muze yahwisa kuhanjika , mukwa Fwaliseu wamulakenyene alye hamwe nenyi ku zuwo lyenyi, Yesu yanjila watwamine kumesa. ³⁸ Mukwa ka Fwaliseu walikomokenene kumona ngwe kalyangile kusana shimbu kanda alya. ³⁹ Alyoze Mwene wahanjikile kuli iye , ''Achi yenu, Afwaliseu nwakupemesa haze lya musenge nyi lya panda, alyoze mukachi kenu munazale to nyi mbenga nyi ungulungulu. ⁴⁰ Yihepuke! yoze watangile haze katangile nyi mukachi nyi? ⁴¹ Hanenu kuli a swale yize yili mukachi , mba yuma yeswe muyikapwa yipema kuli yenu. ⁴² Alyoze lamba lyenu A-Fwaliseu , mumu nwakulambula chihanda cha kumi cha chindumba nyi aluta nyi yilimalima yeswe, alyoze nwakulelesa ululi nyi zango ya Zambi , chanutamba kulinga yino nyi kulitwamina yikwo. ⁴³ Lamba lyenu A-Fwaliseu , mumu nwazanga yitwamo yakulutwe mu masunangonga nyi kumeneka chilemu mu yitanda . ⁴⁴ Lamba lyenu , mumu nwapwa ngwe mafuka waze keshi kusoloka waze atu akulyata mumu keshi kuwanyingika.'' ⁴⁵ Umwe wakuli akwa shimbi wambile kuli iye , '' Longeshi hakwamba yino yuma unatusaula nawa.'' ⁴⁶ Yesu yamba ngwenyi , '' Lamba lyenu, longeshi akwa shimbi ! mumu nwakutwika akwo yiteli yikalu kumbata , alyoze kunushi kusa chipwe munwe umuwika kuchiteli. ⁴⁷ Lamba lyenu , mumu nwakutunga mafuka ja apulofeta , nyi akakenu awashihile . ⁴⁸ Chocho nunapu yela nwakutayiza kuyitanga ya kakenu, mumu awashihile nyi yenu nwakutunga mafuka jo. ⁴⁹ Mumu wa chino , mana ja Zambi yamba , ' mungukawatumina tupulofeta nyi apositolo makahungumyona nyi amwe makawashiha. ⁵⁰ Chisemuko chino , manyinga ja tupulofeta eswe amwanganyine chize kusela cha lifuchi lya hashi akafwetese, ⁵¹ chize kumanyinga ja Abele ndo kumanyinga ja Zakaliya, wuze ashihile hakachi ka chilumbilo nyi tembele. Ewa ngunambe kuli yenu , kumakafwetesa ha chisemuko chino . ⁵² Lamba lyenu akwa shimbi , mumu nwachijile sapi ya chinyingi ; yize kunushi kunjila, nyi waze akunjila nwakwikile.'' ⁵³ Muze Yesu hawahichika , akwa kusonyeka nyi akwa Fwaliseu yaputuka kumushinjila chikolo hayuma yinji, ⁵⁴ kufupa kukwata chuma chimwe mukanwa lyenyi hanga amusume.