¹ Mba hinyima ya yuma yino, Mwene watongwele tumbaji makumi shimbyali nyi aali akwo , nyi kwatuma aali ha aali kulutwe lyenyi ku mbonge jeswe nyi yihela kuze te yiye mwene himaya. ² Yalweza ngwenyi , '' Mbuto hi jahya , mba akwa kukilikita hakeha. Keshika itenu Mwene wa wande hanga atume akwa kukilikita mu wande wenyi. ³ Yenu mujila . Talenu nanutuma ngwe mikoko hakachi ka mikuza. ⁴ Kanda numbata mikuta ya mbongo , chipwe sakitu ya ungeji , chipwe sapato , nawa kanda numeneka nyi umwe mujila. ⁵ Zuwo lyeswalyo mununjila , chitangu munwamba, '' Sambukila yipwe muzuwo lino! ⁶ Nyi mwana wa sambukila mapwamo, sambukila yenu muyipwa muli yiye , nyi hichochoko , muyihiluka kuli yenu. ⁷ Nukatwama muzuwo lize , kulya nyi kunwa yize makanwaha, mumu mukwa kuzata katela fweto yenyi. Kanda nukendangana mu zuwo nyi zuwo. ⁸ Mbonge yeswayo munukanjila , nyi kunutambula , nukalya yize makanuzumbula ⁹ nukauka akwa kuyiza makapwamo. Nukalweza kwamba ' wanangana wa Zambi hiweza mukamwihi kuli yenu.' ¹⁰ Shimbu jeswe munukanjila mu mbonge mba mahona kunutambula , nukatuhuke mu majila jo nyi kwamba, ' ¹¹ chipwe fufuta ya ku chihunda chenu yize yakukwata kuyilyato yetu twanukukumwinayo.' Mba nyingikenu chino ; wanangana wa Zambi hiwa kundama.' ¹² Namba kuli yenu ngwami hatangwa lize muchikapwa chashi kuli akwa Sondoma kuhyana chize. ¹³ Lamba kuli yenu , Kalazine ! Lamba lyenu , A- Mbeteseta! nyi kachi yipupu yize alingile muli yenu kayilingile ku Telu nyi Sindone , kachi alumukine kulu , kutwama mu yikeleyi nyi uto. ¹⁴ Mba muchikapwa chashi kuli akwa Telu nyi Sindone ha upatwilo kuhyana yenu. ¹⁵ Enu , akwa kafwanaume , nwakunyonga ngwo makanunga- misa ndo mwilu? Ka, maka wambila hashi ndo mu mufuka. ¹⁶ Yoze manuvwila kevwilila yami , nawa nyi yoze malituna yenu kalituna yami , nyi yoze malituna yami kalituna yoze wangutumine. ¹⁷ Makumi shimbyali ahilukile nyi sambukila , ngwo, '' Mwene , nyi mahamba kapwanga nyi kutuzeyela mu jina lye.'' ¹⁸ Yesu wakumbulwile ngwenyi,'' Namwenu satana kanaholoka kwilu ngwe muhenyo. ¹⁹ Talenu , nanwaha chiyulo cha kulyata ha tupela nyi tuvwanda , nyi helu lya tachi jeswe ja mukwa kole, nyi chimwe kuchichi kumulemeka. ²⁰ Chipwe chocho kanda makawahilila nyi chino , ngwo nyi mashipilitu kakunuvwila , alyoze wahililenu chingi hakwamba majina jenu hasoneka mwilu.'' ²¹ Ha shimbu yizeyene wa wahilile mu Shipilitu Musanda nyi kwamba , ' Nanuhalisa , Tata , Mwene wa lilu nyi hashi , mumu waswekele yino yuma kuli akwa maana nyi akwa malinjekela mba wayisolwele kuli waze katangile, ngwe kemba. Ewa , Tata , mumu chakupemena ku meso je. ²² Yuma yeswe Tata hanayise mumoko jami , nawa nyi umwe wanyingika Mwana iya ndo Tata , nawa ny umwe wanyingika Tata iya ndo Mwana nyi waze Mwana maha usolwelo'' ²³ Iye wateulukile kuli tumbaji nyi kwalweza hatenga , '' Kawaha waze akumona yize nuna mono. ²⁴ Ngunambe kuli yenu, Apulofeta anji nyi myanangana kazangile kumona , mba kakayimwene, nyi kwivwa yuma nwakwivwa , alyoze kaka yivwile .'' ²⁵ Mba , yoze wanyingika shimbi wamanyine kachi te amweseke, ngwenyi , '' Longeshi kuchi ngunatela kulinga hakuhinga mwono wa mutolo?'' ²⁶ Yesu wambile kuli yiye ngwenyi , '' Chika chasonewa mu shimbi? nyi kuchi wakutanga?'' ²⁷ Wakumbulwile ngwenyi , '' Ukazange Mwene Zambi nyi mbunge ye yeswe , nyi mwono we weswe , nyi tachi je jeswe nawa nyi manyonga je eswe, ukazange mwenyembo we ngwe yena mwene.'' ²⁸ Yesu yamba kuli yiye , '' Wakumbulula kanawa . Linga chenacho, mukapwa nyi mwono.'' ²⁹ Alyoze aye , hakuzanga kuli sambisa , yamba kuli Yesu , '' Mwenyembo wami yiya?'' ³⁰ Yesu wamukumbulwile ngwenyi, '' Umwe lunga kapwile nyi kukatuka ku Yelusaleme kuya ku Yeliku . Waliwanyine hakachi ka mihuza, waze amutambwile yuma yenyi , nyi kumulamba , nyi kumuhichika chonono. ³¹ Hashimbu umwe kasasendote wapalumukine jila yizeyene , mba muze hamumona , wapalikile kusesa. ³² Nawa ka Levi neye , muze wahetele ha chihela chize nyi ku mumona , wapalikile kusesa lya jila. ³³ Alyoze umwe ka samaliya , mu ungeji , wahetele haze apwile . Muze amumwene , wevwile keke. ³⁴ Wamukundamine nyi kukasa mbandu jenyi, wakwichileho maji nyi vinyu. Wamusele nhyi ha chimbulu chenyi nyi kumutwala kuzuwo lya kutulila ngeji, yamufungilamo. ³⁵ Lya kawileho wanjile mbongo jali , nyikwaha mwene wa zuwo , nyi kumulweza ngwenyi , ' Mufunge , cheswacho mukazachisa chikwo , tangwa mungukahiluka , fweto ye mungukakwaha.' ³⁶ Hali awa atu yiya yoze unakapwa mwenyembo wenyi muze anakaholokela mu mihuza?'' ³⁷ Yamba ngwenyi, '' Yoze unakamwivwila keke.'' Yesu wambile kuli yiye , '' Yako ulinge chenacho.'' ³⁸ Muze te apwile mujila nyi kwenda , wanjilile chihunda chimwe , umwe pwo jina lyenyi Maata wamutambwile muzuwo lyenyi . ³⁹ Yiye wapwile nyi mwanakwo wa jina lya Maliya yoze watwamine ha molu ja Mwene nyi kwivwa maliji jenyi. ⁴⁰ Mba Maata wasakalalile nyi kululika yakulya ya Mwene. Wejile kuli Yesu ngwenyi, '' Mwene wanguvwile keke chize mwakwetu kejile nyi kungu kwasa ku kwata ku mandoho ? Mulweze angukwase .'' ⁴¹ Alyoze Mwene wamukumbulwile ngwenyi, '' Maata , Maata wakulipikala nyi kulipikala ha yuma yinjii, ⁴² alyoze chima chinatela chimuwika . Maliya kasakula chinahyana chize nyi umwe mamutambula wakwihi.