¹ Ngu mu zwela ndaga ja kiele mu kilistu, ngu shi mu mba mambo go, gu jiya gwami gu mu ngu jiyisa gwa pheve-Santu, ² ngu di nu khenda nu phashi ja vula mu mutshima wami. ³ Ngu mu tshigina Yesu a ngu shinze tu di kaphe nenji mukunda nu gu tshigina gwa aphangi'ami wanyi ngu di nawo gilema gi moshi. ⁴ Adi enya gu Izalayele. Adi a kumbudiya, lukumu, gudi visa, makapho a shigo, gu sambela Nzambi mu njila ya khunga nu ma laji. ⁵ A khaga a gi shina gia Kilistu yonu udi holu dia ima ikima, Nzambi a mu sagumune mvula nu mvula. Amen! ⁶ Ishi mu zwela egi go egi ma laji a Nzambi a belele. Ishi nganyi go enji ishi gibeni ya kielega egi muthu mukima u mu jinga gu izalayele udi mwenya gu izalayele. ⁷ Ishi go egi athu akima a mu gikanda gia Abalayama adi anenji, uvi mu njila ya Izaki mwene mba mu zoga ana a gifugo. ⁸ Idi mu leza egi, ana a nu butuga mu njila ya gi muthu a shi go ene ana a nzambi, uvi idi ana wanyi a teye laji adi ana a gishina. ⁹ yene idi ndinga ya laji: " kaka mu sungi kaka yiyi, mba ngu za sara mba udi mu buta mona. ¹⁰ Uvi ishi yene kaka ndo, Rebeka nji wa mitile gwa yala mu moshi, shetu Izaki; ¹¹ mukunda ana a kalele khanji a butuga go, ata gima gi moshi gia bonga ndo nga ndo gia bola ndo, mukunda egi ngindu ja nzambi, ishi go mukunda nu isalo, uvi mukunda nu luzolo lwa yonu wa tamegele. ¹² A mu lezele egi: " Mona wa mbuta mba u mu salela galenge." ¹³ Ya kalele ya kielega phila ya sonegeye egi: " Nga tshigina Yakobo, nga tuna Ezawu." ¹⁴ Ikhi mba tu zwela nji? Keti idi yene gu konda gwa masonga a nzambi? Ishi nganyi go. ¹⁵ Hene wa lezele Moyize egi: " Mba ngu vwa khenda gwa muthu yonu ngu mu tshigina, mba ngu khenda gwa yonu nga tshigina." ¹⁶ Hene ishi mu talela go muthu ngu mu tshigina, nga ndo yonu u mu zangula phushi, uvi idi mu luzolo lwa Nzambi ha gu vwa khenda. ¹⁷ Mukunda mikanda ya zwelele gwa Faraon egi; " Idi mu mabanza a funu hene nga gu tuphudile mukunda ngolo jami ji di monese enji mukunda gikanda giami gi jiyiye ha mavu akima." ¹⁸ Hene, ya nu khenda gwa yonu a tshigina enji wa nu kolesa mutshima gwa yonu a tshigina. ¹⁹ Mba ngu leza gu nyima; mukunda nu ikhi a mu mona kaka gu bola ? Nanyi ata mbala imoshi wa hagele gingolo-ngolo ?" ²⁰ Ishi Nganyi go, muthu udi nanyi ha gui tuna mambo a Nzambi ? Nzungu ya uma ya jiya gu leza muthu wa i bumbile egi mukunda nu ikhi wa ngu kitile nganyi ?" ²¹ Mubumbi wa nzungu gwe shi go nu gifumu ha gu zwela egi a zangula uma a u kitila nzungu ya funu enji ya bonga gibeni enji nzungu iko ya gu ko mu sala gisalo gilumbu nu gilumbu. ²² Ikhi nji nga jiya gu zwela mukunda nu Nzambi gula wa khabu jenji, enji gula tshigina gu leza ngolo jenji, kangenu mutshima mu tangwa mu mu nenga nzungu ya khabu idi mu za mu mwanga nu gu nietumuna. ²³ Mukunda ha gu leza gimvwama gienji gia lukumu gibeni holu dia nzungu ja khenda, yene ya yidigiye mukunda nu khenda jene. ²⁴ Hene idi mukunda n'eswe a mu tu tamega, mukunda nu ba yuda phamba ndo, uvi mukunda n'etwe akima. ²⁵ Oze u mu zwela egi: " Mba ngu mu tamega ha khami wanyi a shi go athu ami, enji mafuta ami a luzolo wanyi a kalele go mafuta ami a luzolo. ²⁶ Mba mu kala nji nganyi ha gifundo giene gi mu zwela egi : " Mu shi genu mwa athu ami go." Henyanyi mba a tamegeya ana a Nzambi wa monyo." ²⁷ Yezaya wa kalele mu kaluluga ha gu leza ana a gi Izalayele egi: " Gula gu vula gwa ana a Izalayele gwa kalele ole fufuta nu meya, mba gu mu kala nu wanyi a begele mba a guluga. ²⁸ Nganyi Nzambi ndaga ja zwelele mba udi mu ji lungisa gwa leha ndo mu phila ya gu lunga sha. ²⁹ Giteso gi moshi Yezaya wa zwelele nji gu twama egi : " Gula Nzambi wa itumba mba gwe shi mu bemba athu mba eza gu nyima dietu ha mavu mba mu kala ole Sodome nu Gomore. ³⁰ Ikhi mba tu zwela nji ? Athu ako a kalele mu kamba masonga go nu ako mu jinga mu masonga, mukunda nu lukwikilu lwawo. ³¹ Uvi Izalayele ya kalele mu kamba shigo ya masonga a i monele go ³² Mukunda nu ikhi? Mukunda a kalele mu i kamba go nu lukwikilu, uvi a hagele mutshima gu isalo yawo, ³³ ole phila ya sonegeye egi : " Talenu nga hagele gu siyoni seso dia gibunji ole seso dia gu hana sonyi. Yonu u mu kwikila gwa mwene mba a shi mu kwateya sonyi go."