¹ Aphangi'ami, ndaga nga nu tshigina mu mutshima wami ukima, enji ndaga jinyi nga nu lomba gwa Nzambi mukunda nu athu a gu Izalayele jinyiji: " ngu mu tshigina egi a vwe monyo. ² Ngu mu zwela mukunda nu ene egi adi mudi hana mwa vula gwa Nzambi, uvi ishi go mukunda nu ndaga jinyi adi mu jiya. ³ Mukunda a nu jiya go phila khi Nzambi a nu tshigina athu. Hene a nu hata go njila yinyi Nzambi a nu tshiginila athu. ⁴ Kilistu udi mulungishi wa shigo jia Moyize, mu phila egi muthu mukima udi mu ji kwikila Nzambi a mu tshigine. ⁵ Moyize wa sonegele ndaga jiji mukunda nu gu tshigina gunu Nzambi a nu tshigina athu wanyi a nu hata shigo egi; " Muthu yonu wa nu hata shigo wa nu jingila shigo." ⁶ Uvi mukunda nu gu tshigina gunu Nzambi a nu tshigina athu mukunda nu lukwikilu lwawo, a nu zwela egi:" Gu zwela ndo mu mutshima waye egi,Nanyi mba u kanduga gosa?"( idi mu leza gu vutuga gwa Kilistu haha ha mavu); ⁷ Gu zwela nji ndo egi," nanyi mba u bulumuga goshia mavu gunu gwa nu kala athu a fwa?( idi mu leza ha guya mu kandwisa nji Kilistu ha kulunji). ⁸ Gu zwela gwa ndaga jiji gudi egi ikhi? "Ndinga ya Nzambi idi phembeni nenu mu katshi dia makano enu enji mu mutshima waye. Ndaga yene idi mukunda nu gu kumbulula gwaye mambo ta nu longa. ⁹ Gula wa taya mu kano diaye egi Yesu udi Fumu enji wa mu taya mu mutshima waye egi Nzambi wa mu zugishile mu katshi dia athu a file, mba mudi mu vwa monyo. ¹⁰ Muthu u feto gu tshigina Nzambi mu katshi dia mutshima wenji, enji nu gu zwela mu katshi dia kano wenji gu twama dia athu. ¹¹ Mukanda wa Nzambi u mu zwela egi: " muthu mukima udi nu gu tshigina mu mutshima wenji, u mu jiya Yesu, Nzambi mba gwa shi mu mu hwa sonyi go. ¹² Mu katshi dia ba yuda nu athu wanyi a shi go ba yuda gukapumuna gu shi go. Khungi'awo akima adi nu fumu mu moshi wa nu tshigina muthu mukima wa mu tshigina. ¹³ Muthu mukima mba u tshigina jina dia Yesu mba u mu vwa monyo. ¹⁴ Phila khi athu adi mu samba Nzambi gula mu mitshima yawo Nzambi mwene gwa shi nu bugu go. Phila khi athu a tshiginile Nzambi gula a vila go malongi enji? Phila khi a vile malongi ene gula ata muthu wa longele go? ¹⁵ Enji, phila khi gu longa malongi ene gula Nzambi gwa tumile go athu a feto longa malongi ene? A sonegele egi; " Kiese gia vula gidi gwa athu a muza gu tu batela ndinga ya Nzambi. ¹⁶ Uvi athu ene akima a tshiginile go Nzambi, Yezaya wa zwelele egi," Fumu wami wa vile malongi etu? ¹⁷ Gu tshigina Nzambi gudi gu vwa malongi enji, malongi ene adi ndinga ya Kilistu. ¹⁸ Lulu ngagi, ngu mu hula egi: " athu ene gwa vile go? GU longa gwawo gwa kumile mu mavu akima enji gwa ile ti nu gu suga ya mavu." ¹⁹ Enya gu izalayele a jiyile go egi Moyize wa kalele muthu wa toma wa zwelele egi: " Nzambi wa zwelele egi mukunda nu eme, mba mu shi mu tshigina athu ako ndo, athu adi a shi ami ndo; athu a unga. Eme mba ngu mi hwa njila ha gu a vila khabu. ²⁰ Yezaya wa zwelele egi, athu wanyi a dile gu gukamba ndo, nga a hwile njila ha gu ngu mona. Nga di digile gwa athu a dile gu ngu hula ata gima go. ²¹ Mukunda nu ana a Izalayele; Nzambi u mu zwela egi," Nga sununa mago ami holu dia wanyi a nu la gu ngu jiya ndo ilumbu ikima.