¹ Ngu mu zwela egi, Nzambi wa tunyile gikanda gienji? A vutudile egi; " ndo"; eme nji ngu di nga mwenya gikanda gigi. Abalayama udi mbutami wa mwa leha; eme ngu di mu gikanda gia Benjamin. ² Nzambi gwa bishidile go gikanda gienji ginyi a phonele mwa leha, mu shi mu jiya go gima gia zwelele mu mukanda wa Nzambi mukunda nu gu bogota gwa Eliya gu meso a Nzambi? ³ Fumu Nzambi, athu a mana mu shiya jinganga jiaye jikima, a mana mu shiya ima ikima inyi ta nu salela mu isambu ta nu mu hwila lukumu; gwa bega kaka eme nji a mu kamba ha gu ngu shiya. ⁴ Nzambi, mvutu khi a vutudile Eliya? Nzambi wa zwelele egi; " ngu di nu athu mafunda makumi a sambwadi, wanyi nga haga athu ene, kanji gwa fugimina gu twama dia Nzambi ya Baal. ⁵ Magino, gudi nu gu vula gwa athu ako a solele Nzambi mukunda nu khenda jienji. ⁶ Mukunda Nzambi gwa a solele go mukunda nu ndaga jinyi a kitile. Uvi mukunda nu luzolo lwenji lwa bonga. Gula ndo nga luzolo lwenji lwa bonga ya bola kala go luzolo lwa kielega. ⁷ Ikhi ta jiya gu zwela ? Enya gu izalayele ishi akima go a zudile ndaga jinyi a kalele mu kamba. Kaka athu wanyi Nzambi a solele ha gu zula ndaga yene; uvi athu ako a kalele mu mona go phila ya gu bagisa ndaga yene go. ⁸ Mu phila mukanda udi mu zwela egi: " Nzambi wa salele mu phila egi a jiyile go gu bagisa mu ngindu jawo go, nu gu konda gu mona gu meso awo, enji nu gu konda gu vwa gu matshi awo katuga gilumbu giene ti nu magino." ⁹ Davidi nji udi mu zwela egi; " ima yawo ya gudia ikale ole ima ya thambwe, enji a kangame mu ima yene, nganyi mba adi mu fwa, enji mba adi mu zula ndola. ¹⁰ Meso awo a kangame mu phila egi a konde gu mona nji ata gima, a kale mu wenda a fumbamana tangwa dikima mukunda nu phashi jawo." ¹¹ Ngu mu hula ngagi; " tangwa ba yuda a jimbidile njila, keti a bwile kimakulu?" Ndo, uvi mukunda nu masumu awo, athu ako a gulugile mu phila egi ba yuda a a vile gingonzo. ¹² Gula athu a membo ako a zudile lusagumunu mukunda nu masumu a ba yuda, enji gula athu wanyi a shi go ba yuda a zudile lusagumunu mukunda ba yuda a bwile, keti mba ishi mu kala ya bonga go gula ba yuda akima a guluga? ¹³ Haha ngu mu mi leza enwe athu mu shi ba yuda go, nga nu di zalula mu gisalo giami mukunda ngu di nga thumwa mukunda nu enwe athu wanyi a shi ba yuda go. ¹⁴ Nganyi tangwa diko nga jiya gu benda aphangi'ami ba yuda ha gu mi vila gingonzo, nganyi ako mu katshi dienu mba a guluge. ¹⁵ Mukunda tangwa a tunyile ba yuda, we jile mu di visa nu athu ako. Hene gula wa tshigina nji ba yuda, athu wanyi a file mba adi mu vwa monyo. ¹⁶ Gula muthu wa hana gitshidi gia thomo gia phamba gwa Nzambi, zwela nji egi ima ya gudia ya vula idi ya Nzambi. gula muthu wa hana mishisa ya mutshi gwa Nzambi, zwela nji egi thango jia mitshi yene idi yenji ¹⁷ Enya gu izalayele adi ole mutshi wa nu buta mabundu wa nu kunyiya, enji unu wa nu batudiya thango jiko. Eye muthu ushi gaye wa muyuda go, udi ole wa luthango lwa mutshi wa mu gishitu wa nu haga mabundu unu wa nu hageya hama hanyi ha batudiye luthango. Tangwa didi mishisa ya mutshi wene ya nu hana ngolo gu mutshi yene ya kunyiye, wa nu gu N'eye nji ngolo. ¹⁸ Hene wa jiyile go gu vweza athu wanyi adi ole thango jia batudiye. Jiya egi ishi eye go wa nu kwata mishisa ya mutshi wene, uvi mishisa ya nu gu hwa ngolo. ¹⁹ U mu tshigina gu ngu leza egi; " a batudile thango jia mutshi wene mukunda ngu inge hama ha kalele luthango." ²⁰ Eya idi ndaga ya kielega. A batudile thango jene mukunda jia kalele nu lukwikilu go, hene wa inga hama ha batudiye luthango mukunda nu lukwikilu lwaye. Uvi wa jiyile go gudi zalula mukunda nu ndaga jene, u feto vwa woma. ²¹ Mukunda, gula nga nzambi gwa bembele go ba yuda wanyi a fwana thango jinyi jia kalele thomo jia kwatana nu mutshi, jiye egi mba gwa shi mu gu bemba go. ²² Tala phila khi Nzambi a nu leza gu bonga gwenji nu khabu jenji; gwa shi nu khenda go gwa athu wanyi adi a bwa, uvi gula wa nu hata ndaga jenji jia bonga, mba udi mu gu salela mambote, uvi gula wa nu hata go ndaga jia bonga, nzambi mba udi mu gu katula. ²³ Hene, gula ba yuda a yandiga nji gu kwikila, Nzambi mba udi mu a vutula a zule gifundo diawo dia thomo. ²⁴ Eye u shi go wa muyuda, udi wa fwana luthango lu moshi lwa mutshi wa mabundu wa batudiye mu gishitu, enji wa zogele go gu mutshi unu wa nu kuniya, uvi we jile mu lambigiya gu mutshi wene. Uvi ba yuda adi a fwana thango jia mutshi unu wa kuniye; hene mba i kala phashi go gwa Nzambi ha gu a lambiga nji gu mutshi unu wa thomo. ²⁵ Aphangi'ami ngu mu tshigina gu mi jiyisa ndaga imoshi ya kielega inyi Nzambi a kalele mu swega mu phila mule gu kala ndo egi mudi mwa athu a tema. ndaga yene inyiyi: athu ako a gu izalayele a shi nu phila go ya gu jiya, uvi mba a shi mu kala kaka mu phila yene go, gula ndo athu akima a shi go ba yuda a gulugile. ²⁶ Hene athu akima a gu izalayele mba adi mu guluga. Mu phila ya sonegeye gu mukanda wa Nzambi egi: " Mu gulwishi yonu udi muza u mu katuga gu dimbo dia Siyoni, mba udi mu katula gu bola gu kima gwa ana a Yakobo, ²⁷ hene mba ngu mu di visa nawo mu phila yene, tangwa mba ngu katula masumu awo. ²⁸ Ba yuda a nu tuna gawo sango ya bonga, hene adi mbeni jia Nzambi mukunda nu mambote enu mu shi mwa ba yuda go. Uvi Nzambi wa a solele thomo ene, hene mukunda nu mambuta awo a mwa leha adi kaka athu mwene a nu tshigina. ²⁹ Mukunda Nzambi gwa nu katula go ndaga jinyi mwene a nu hana, ngindu jenji jia nu balumuga go mukunda nu athu wanyi mwene a phonele. ³⁰ Enwe athu wanyi mu shi go ba yuda,mwa kalele mu lemvugila Nzambi go. Uvi tangwa didi Nzambi wa mi vila khenda mukunda ba yuda a nu mu lemvugila go. ³¹ Phila imoshi nji mu tangwa didi ba yuda a nu lemvugila Nzambi go, hene wa nu mi vila khenda mu phila egi wa nu a vila nu ene khenda. ³² Nzambi wa a bembele khungi'awo akima mukunda a kale athu wanyi a nu lemvuga go, mukunda wa jiya gu a vila khenda. ³³ Nzambi udi nu gimvwama gia vula! Gu tema gwenji nu ndaga jinyi a nu jiya jia nu ya gwa leha! Nanyi wa jiya njila jenji? ³⁴ Mu phila mukanda udi mu zwela egi: Nanyi wa jiya ngindu jia Fumu Nzambi? Nanyi wa jiya gu mu longishila? ³⁵ Nanyi wa nu hwa Nzambi gima mu phila egi Nzambi wa feto mu vutudila nagio?" ³⁶ Mukunda Nzambi wa salele ima ikima; ya nu katuga gwa mwene, enji ya nu jinga mukunda nu mwene. Lukumu lu kale nu Mwene mvula nu mvula. Amen.