¹ Wa tamegele alongogi kumi nu muyadi wa a hwile giyega holu dia ma diabulu akima nu gu belula enya misongo. ² Wa a tumile muya mu longa malongi a Gifumu gia Nzambi nu gu belula enya misongo. ³ Wa a lezele egi : " Gu zula ndo ata gima mukunda nu gu wenda gwenu, mutshi ndo, ga mushete ga gu batela falanga ndo, musa ndo,falanga ndo, ikhutu iyadi ndo. ⁴ Gisapha gikima mba mu ngila, kalenu mwene ti nu gilumbu gia gu katuga. ⁵ Wanyi mba a tuna gu mi yamba, mu tangwa dia gu katuga mu dimbo diene, bundenu fuphi ya malu enu mu gidimbu gia gi temwe gienu mukunda nawo." ⁶ Hene a ile mu membo, nu gu longa ndinga ya bonga nu gu belula athu muma mukima. ⁷ Tala, Erode, wa vile ndaga ja kalele mu balega, wa vile khabu mukunda a kalele mu zwela egi Yowani Mubotigi wa futumuga gu lufwa, ⁸ ako egi Eliya wa monega ako nji egi profeta mu moshi wa mwa leha weza mu vutuga mu lujingu. ⁹ Erode wa zwelele egi: " Nga batudishile Yowani mutwe, uvi yonu nji nanyi ngu di mu vwa nji ndaga ja ngagi?" Mukunda Erode wa kalele mu kamba phila ya gumona Yesu. ¹⁰ Tangwa athu wanyi a tumiye ejile mu vutuga, a tele ndaga jikima phila ja balegele. Wa a zudile wa ile nawo mu gingenga mu dimbo di moshi dia nu tamegeya egi Betesayida. ¹¹ Uvi gimvuga gia athu tangwa a vile ndaga yene a mu hatele, mwene wa a yambele, wa yandigile gu a longa ndaga ya gifumu gia Nzambi: nu gu belula wanyi a kalele nu funu ya gu beluga. ¹² Phipha ya kalele phene-phene ha gu bwa alongogi ejile gwa mwene a mu lezele egi: " Vutula gimvuga gia athu wawa aye mu membo a phene-phene ha gu kamba isapha ya gu swama nu ima gu gudia, mukunda hama haha tudi hadi mu katshi dia temu dia fufuta." ¹³ Uvi Yesu wa a lezele egi : " Enwe ha hwenu ima ya gudia." A zwelele egi: " Tu di nu mapha a-tano nu giswi jiyadi, idi ya bonga tu ye tu sumbe ima ya gudia ha gu vula gwa athu wawa." ¹⁴ A kalele gitesu dia Mafunda a tano a athu. Wa lezele alongogi egi: " A lezenu adi tumbige mu gimvuga gia athu makumi a tano." ¹⁵ Hene khungi'awo akima adi tumbigile hoshi. ¹⁶ Wa zudile mapha a tano nu jishi jiyadi wa tuphudile meso gosa, wa i sagumunile nu gu ikhesa itshidi itshidi,gu nyima wa hwile alongogi enji ha gu kaphela athu. ¹⁷ Khungi'awo akima a dile a kuta mwa bonga, itshidi ya madia ya begele ya noneye ya zaleseye milongo kumi ni iyadi. ¹⁸ Tangwa di moshi wa ile mu samba ha khenji, wa kalele nu alongogi ebuna wa a hudile egi: " Ikhi athu adi mu zwela mukunda nu eme ?" ¹⁹ A vutudile egi : " Yowani mubotigi, uvi ako a mu zwela egi Eliya, ako nji egi profeta mu moshi wa mwa leha wa futumuga." ²⁰ Wa a hudile egi : " Uvi enwe, mu di mu zwela egi ngu di nga nanyi ? " Phetelo wa vutudile egi : " Wa kilistu wa katuga gwa Nzambi." ²¹ Uvi wa a lezele egi gu leza ndo ata muthu egi, ²² Muna Muthu mba udi mu mona phashi ja vula nu gu tunyiya gwa mambuta, nu gwa mafumu a nganga nzambi nu gwa alongi a shigo, enji mba udi mu shiyiya, uvi mu gilumbu gia tatu mu vutuga mu lujingu. ²³ Wa lezele athu akima egi : " Gula muthu wa tshigina gu ngu hata, wa feto gu di tuna mwene ha khenji, a zule ginemo gienji gia ilumbu ikima gu nyima a ngu hate. ²⁴ Mukunda yonu mukima mba u kamba ha gu gulusa lujingu lwenji mba udi mu lu totesa, uvi yonu mba u kamba ha gu totesa lujingu lwenji mukunda nu eme mba udi mu lu gulusa. ²⁵ Ikhi idi funu gwa muthu mu moshi ha gu nunga mavu akima gula wa di totesa to gu di shiya mwene ha khenji ? ²⁶ Muthu mukima u mu ngu vila sonyi nu gu vwa sonyi ja ndaga ngu u zwela, Muna Muthu mba u mu vila sonyi tangwa mba eza mu vutuga mu khembo yenji nu ya shenji nu ya ma wanjo. ²⁷ Uvi ngu mu mi leza mu kielega egi, gudi nu ako mu katshi dienu adi haha, mba a shi mu fwa go konda ene gu mona gifumu gia Nzambi ." ²⁸ Gwa balegele ilumbu nana gu nyima ya gu zwela gwa Yesu ndaga jene, wa zudile Phetelo, yowani nu Zake wa ile nawo holu dia mulundu ha gu samba. ²⁹ Tangwa a kalele mu samba, gu meso gwenji gwa balumugile nu milele yenji ya kitugile ya phelegeta ya yandiga gu temetela. ³⁰ Tala, gwa monegele athu muyadi a kalele mu solula nenji, ya kalele Moyize nu Eliya, ³¹ adi monesele mu khembo ya vula. A yandigile gu zwelela ndaga ya guya gwenji gwa kalele phene-phene ha gu lungisama gu Yelusalemi. ³² Mu tangwa diene, Phetelo nu wanyi ako a kalele gu tulo. Uvi tangwa a phaphumugile, a monele khembo yenji nu athu wanyi muyadi a magana mu khulo yenji. ³³ Tangwa a kalele mu katuga mu khulo ya Yesu, Phetelo wa mu lezele egi: " Longi, idi ya bonga etwe ha gu kala haha. Nganyi tu mu tunga ngando ji tatu. Ngando imoshi yaye, imoshi ya Moyize, iko ya Eliya ." Gwa jiyile go ndaga khi a kalele mu zwela. ³⁴ Tangwa a kalele mu zwela ndaga jene, tuta di moshi dia a tshigile enji a vile woma mukunda a kalele a gu junga mu katshi dia matuta. ³⁵ Ndinga imoshi ya zogele mu katshi dia matuta egi : " Yogu udi Munami nga phonele. Mu vilenu." ³⁶ Ndinga yadi ya zwela gwahwa, Yesu wa begele ha khenji. A henele mu ilumbu yene tedie, konda gu tela ata muthu ndaga a monele. ³⁷ Gilumbu gia hatele, tangwa a katugile gu mulundu, gimvuga gia koma gia athu gie jile mu mu tagana. ³⁸ Hene, muthu mu moshi wa mu gimvuga gia athu wa kabugile mu ngololo egi : " Longi, nga gu bubila ha guza u tale munami mukunda udi kaka mwene mu moshi ngu di nenji. ³⁹ Tala, pheve imoshi idi mu mu bwisa, hene u mu kabuga; udi mu bwa nzengo nu gu zola mate a vula gu kano. Pheve yene idi mu mu zoga nu phashi ja vula nu gu mu namenesa tangwa i mu tshigina gu mu bemba. ⁴⁰ Nga bondila a longogi aye, uvi a monele go phila ya gu i kaya." ⁴¹ Yesu wa mu vutudile egi: " Khukho ya mitshima ya kola nu ya nu zula mabula, ti nu tangwa khi mba ngu kala nenu ha gu mi kwatesa? Ngu batele munaye mwene haha." ⁴² Tangwa mona yala mwene a kalele muza, diabulu diene dia mu bwishile hoshi mu mavu nu gu mu nyigisa mwa vula. Uvi Yesu wa balele pheve yene ya bola, wa belwile mona yala mwene enji wa mu hanele gwa shenji. ⁴³ A yitugile mwa vula ha gu mona gu koma gwa Nzambi. A kalele mu di hula gu ndaga jikima a kalele mu kita, hene wa lezele a longogi enji egi " ⁴⁴ Ndaga jiji ji ngile mu matshi enu mukunda Muna Muthu mba udi mu haneya gu mago a athu." Uvi a kalele gawo mu bagisa go ndaga jene, ndaga jene ja a bategele meso mukunda ale gu ji bagisa ndo. ⁴⁵ A kalele nu woma ha gu mu hula muhu mukunda nu ndinga yene. ⁴⁶ Hene, giphapha gia vula ya zogele mu katshi diawo ha gu jiya nanyi udi mbuta mu katshi diawo. ⁴⁷ Uvi Yesu, wa kalele mu jiya mabanza a mitshima yawo wa zudile mona mutumba wa mu hagele mu lwega lwenji. ⁴⁸ Gu nyima wa a lezele egi: " Gula muthu mu moshi wa yamba mona yogu mu jina diami, wa ngu yamba n'eme, uvi gula muthu mu moshi wa ngu yamba, wa yamba muthu yonu wa ngu tumile. Hene muthu udi mona mutumba mu katshi dienu, mwene udi mbuta." ⁴⁹ Yowani wa vutudile egi : " Longi, Ta monyi muthu mu moshi mu kaya pheve ja bola mu jina diaye hene ta mu tunyisa mukunda gwa shi mu tu hata go." ⁵⁰ Uvi Yesu wa zwelele egi: " Mu mu tunyisa go mbeni wetu, udi muthu wetu." ⁵¹ Tangwa ilumbu yenji ya gu kanduga gosa ya lungile, wa zudile dibanza dia guya gu Yelusalemi. ⁵² Wa tumile ngenji ha guya gu dimbo dia gu samaliya ha gu mu londela gisapha. ⁵³ Uvi athu a dimbo diene a tshiginile go, mukunda wa kalele muya gu Yelusalemi. ⁵⁴ Hene tangwa Jake nu Yowani a monele nganyi, a zwelele egi : " Keti wa tshigina tu lombe tshiya tu katuge gosa tu ze tu bulumuge ha gu a shiya ?" ⁵⁵ Uvi gwa tshiginile go wa a balele. ⁵⁶ Hene wa katugile genji mu dimbo diene ha guya mu dimbo diko. ⁵⁷ Tangwa a kalele mu njila, muthu mu moshi wa mu lezele egi: " Mba ngu mu gu hata hama hakima mba uya." ⁵⁸ Yesu wa mu vutudile egi : " Mukenge udi nu wina dienji njila ja gosa jidi nu yanzu uvi Muna Muthu gwa shi mu jiya go hayi ha jiya gu haga mutwe." ⁵⁹ Gu nyima wa lezele muthu muko egi:" Ngu hate." Uvi wa mu vutudile egi: " Fumu, ngu hwe thomo njila ngu ye ngu funde shami." ⁶⁰ Uvi wa mu lezele egi: " Bemba athu a fwa adi funda ene hakhawo, uvi eye nda u longe khanda jikima malongi a Gifumu gia Nzambi." ⁶¹ Muthu muko nji wa zwelele egi: " Ngu mu gu hata Fumu, uvi ngu hwe njila ngu ye ngu di kaphe nu enya mu gisapha giami." ⁶² Uvi Yesu wa mu lezele egi: " Muthu wa haga koko ha gu phusa ngombe ya nu bundula gula wa vutula meso ha gu tala gu nyima gwa nu kala mwenya gifumu gia Nzambi go."