¹ Gu nyima dia tangwa Yesu wa kalele muya mu balega mu membo a koma nu membo a gibibila, mu longa ndinga ya bonga ya gifumu gia Nzambi. Alongogi kumi nu muyadi a kalele hene, ² nu akhetu wanyi a zoleye pheve ja bola nu wanyi ako a belugile gu misongo ya phila nu phila. Mariya yonu wa nu tamegeya nji egi Madelene, wa zoleye pheve ja bola ji sambwadi, ³ Jane, mukaja Suza muthu wa gisalo wa Elode, Suzana nu akhetu ako a vula a kalele mu di kwatesa gu ima yawo a kalele hene. ⁴ Tangwa athu a vula a kalele muza mu di bungisa gwa mwene, athu a membo a vula ejile gwa mwene, wa yandigile gu a tela gingana egi: ⁵ " Muthu mu moshi wa zogele muya mu kuna khenyi . Tangwa a kalele mu kuna, ga ndambu ga khenyi ga bwile mu khelelego ya njila, khenyi jene ja diateye enji tunjila twa gosa twe jile nu dia khenyi jene. ⁶ Ga ndambu ga khenyi jiko ga bwile mu holu dia maseso, tangwa ja zogele, ja umile mukunda nu gu konda gwa mavu. ⁷ Khenyi jiko ja bwile mu katshi dia isongesa, isongesa ya manele mu tshoga khenyi jene. ⁸ Uvi khenyi jiko ja bwile mu mavu a bonga hene ja butile mabundu khama khama." Gu nyima ya gu zwela nganyi Yesu wa kabugile egi: " Yonu udi nu matshi a gu vila, a ve." ⁹ Hene, alongogi a yandigile gu di hula tendula ya gingana giene. ¹⁰ Wa a lezele egi: " Gwa enwe mwa hwiye ngangu ja gu jiya giswegi gia gifumu gia Nzambi uvi gwa athu ako, idi mu ingana, mu phila egi mu njila ya gu tala, a jiyile gu mona go enji mu njila ya gu vwa ale gu bagisa ndo ata gima. ¹¹ Tala tendula ya gingana giene: Khenyi jidi ndinga ya Nzambi. ¹² Inyi ya bwile mu khelelego ya njila idi, wanyi a nu vwa ndinga ya Nzambi, gu nyima diabulu wa i katula mu mitshima yawo, mukunda ale gu kwikila ndo, ha gu konda gu guluga. ¹³ Gu nyima, jinyi ja bwile mu maseso, idi wanyi a nu yamba ndinga nu kiese tangwa adi mu longeya, uvi a shi nu miji go; adi mu kwikila kaka ga tangwa ga moshi, uvi mu tangwa dia gu phageya, a nu bembela gawo. ¹⁴ Jinyi ja bwile mu katshi dia isongesa, idi wanyi a nu vwa ndinga ya Nzambi enji mu gu wenda gwawo, phashi ja lujingu jidi mu a kamenesa, gimvwama nu kiese gia lujingu gishi gia hia go. ¹⁵ Uvi jinyi ja bwile mu mavu a bonga, idi wanyi a mu vwa ndinga mu mutshima wa bonga, adi mu i salela enji idi mu buta mabundu a gu kolesa mutshima." ¹⁶ Tala, gushi nu muthu wa nu lemesa mwinda mukunda nu gu u tshiga mu gihombolo nga ndo gu u haga gosha gididi. Uvi mwinda wa nu hageya ha gathamba mukunda wanyi a mu ngila monzo a mone pwelele. ¹⁷ Mukunda gima gia gu swega gi monege ha phelo. ¹⁸ Vwenu mwa bonga, mukunda muthu udi nu gima mba udi mu lundiya giko, uvi yonu gwa shi nu gima go, ata ginyi adi nagio, mba jidi gu mu tambudiya." ¹⁹ Gu nyima,ginenji nu aphangi'enji ejile mu mu kamba, uvi gwa kalele nu phila ya gu mu mona go mukunda nu gu vula gwa athu. ²⁰ A mu lezele egi: " Ginaye nu aphangi'aye, adi haha honze adi nu funu ya gu gumona." ²¹ Yesu wa vutudile egi: " Ginami nu aphangi'ami, adi wanyi a mu hata ndinga ya Nzambi nu gu i salela." ²² Gilumbu gi moshi, Yesu wa ngidile mu wato nu alongogi enji, wa a lezele egi: " Tu zaugenu ha sambwa dia muta." A yandigile gu zauga. ²³ Tangwa a kalele mu zauga, Yesu wa ile gu tulo. Muphephe umoshi wa bala wa nyigishile wato enji wato wa zalele nu meya hene a kalele mu gigonza gia bala. ²⁴ Hene alongogi a yesu a phusanele a mu zugishile nu gu kabuga egi : " Longi, Longi tu fwa: " Wa zugile, wa yandigile gu balela muphephe, meya a lembamele gitembo gia hwile. ²⁵ Hene wa a lezele egi: " Lukwikilu lwenu ludigi ?" A kalele nu woma nu gu yituga gwa vula, a yandigile gu di zwelela egi : " Yogu gibeni nanyi, nu muphephe nu meya adi gu mu lemvugila?" ²⁶ A kumile mu dimbo dia Galada didi sambwa nu sambwa nu Galileya. ²⁷ Tangwa a zogele mu wato, muthu mu moshi wa dimbo diene wa kalele nu ma diabulu we jile gwa mwene. Katuga mvula ja vula wa kalele mu wenda thowa enji gwa kalele mu jinga nji monzo go uvi mu majiamo. ²⁸ Tangwa a monele Yesu, wa kabugile nu gu bwa gu twama dienji. Mu ndinga ya ngolo wa zwelele egi: " Ndaga khi ngu di nayo n'eye Yesu, Muna Nzambi wa gosa? Nga gu bubila, u ngu hwi phashi go." Hene ²⁹ Yesu a hanele mukwala gwa pheve yene ya bola ha gu zoga gwa muthu mwene mukunda mbala ja vula ya kalele mu mu monesa phashi. Ata wa kalele mu hageya mu mululu nu gu kangeya nu shinga ja ibende, wa kalele nu batula shinga jene pheve ya diabulu ya kalele mu mu tuma ha guya mu kala mu temu dia fufuta fufuta. ³⁰ Gu nyima Yesu wa mu hudile egi: " Jina diaye nanyi ?" Wa vutudile egi: " Ta vula ", mukunda pheve ja vula ja ngidile mu katshi dienji. ³¹ Hene pheve jene ja mu bondile mu phila egi a konde gu ji tuma milungi. ³² Gwa kalele henyanyi ngulu ja vula ja kalele mu dia ha mulundu. Ma diabulu ene a lombele ha gu a twala a ngile mu ngulu jene. Wa ji hwile nswa. ³³ Hene ma diabulu a zogele gwa muthu mwene, a yile mu ngila mu ngulu jene, hene ja zudile phushi katuga ha mulundu ti nu mu gijiba. ³⁴ A tadia ngulu adi a mona ndaga phila ya balegele, a lengele muya mu bata sango yene gembo. ³⁵ Hene athu a zogele ha guza mu tala ndaga phila ya balegele. Tangwa a kumile gwa Yesu a sangele muthu yonu wa zogeye ma diabulu wa gudi tumbiga gu malu a Yesu, wa sudiga mwa bonga mu gi muthu sha, hene a yitugile nu gu vwa woma. ³⁶ Hene, wanyi a monele ndaga phila ya balegele a yile mu tela athu ako mu phila mwenya ma diabulu a belugile. ³⁷ Athu akima a gu khanda ya gu dimbo dia Gerazenie a lezele Yesu ha gu katuga gu khanda yawo, mukunda woma wa vula wa a kwatele. Hene a ngidile mu wato wa vutugile genji. ³⁸ Muthu yonu wa zogeye ma diabulu wa lombele gwa yesu ha gu mu hata. Uvi Yesu wa mu lezele egi: ³⁹ " Vutuga mu inzo yaye u te ndaga jikima jia gu salela Nzambi." Muthu mwene wa ile nu gu ta mu dimbo dikima ndaga ja mu salela Yesu. ⁴⁰ Tangwa, Yesu a vutugile, athu a vula ejile mu mu yamba, mukunda a kalele mu mu nenga. ⁴¹ Tala muthu mu moshi jina dienji Jariyusi we jile, wa kalele mu moshi mu katshi dia mafumu a inzo ya isambu. Wa bwile mu malu a Yesu wa kalele mu mu bondila egi aye mu inzo yenji, ⁴² mukunda munenji wa mukhetu kaka mu moshi wa mvula makumi a yadi wa kalele ha lufwa. Tangwa Yesu a kalele muya, athu a gimvuga a kalele mudi kwetesa gu mwila wenji. ⁴³ Mu katshi dia gimvuga gia athu gwa kalele nu mukhetu mu moshi wa kalele nu misongo ya gu zogeya menga katuga mvula kumi nu giyadi, wa manesele ikumba nu falanga gwa minganga uvi gwa belugile go. ⁴⁴ Wa phusanele gwa Yesu enji wa kwatele songi ya mulele wenji kaka hene henyanyi, misongo yenji ya gu hwiya menga ya batugile. ⁴⁵ Yesu wa zwelele egi: " nanyi wa ngu kwata? " Mu phila akima a tunyile, Phetelo wa zwelele egi: " Longi, athu adi a vula enji adi mu gu phusa." ⁴⁶ Uvi Yesu wa vutudile egi : " Gudi nu muthu wa ngu kwata, nga vwa ngolo imoshi ya zoga mu katshi diami." ⁴⁷ Mukhetu wadi wa mone egi phila ya gudi swega gu thugu, we jile nu gu digima wa bwile gu twama dienji. Wa tshiginile gu twama dia athu akima ikhi ya mu tumile ha gu kita gima gia nganyi nu phila a beluga kaka henyanyi. ⁴⁸ Hene Yesu wa mu lezele egi: " Munami, lukwikilu lwaye lwa gu gulusa. Inda mu ngemba." ⁴⁹ Tangwa a kalele mu zwela, muthu mu moshi, wa katugile mu inzo ya fumu wa inzo ya isambu wa kumile enji wa zwelele egi: " Munaye wa mukhetu wa katuga gu fwa, bembenu gu monesa Longi phashi." ⁵⁰ Uvi Yesu wa vila ndaga ya zweleye , wa mu vutudile egi : " Uvi woma go, kwikila kaka egi u mu guluga." ⁵¹ Gu nyima tangwa a kumile mu gisapha, gwa hanele swa ata gwa muthu ha gu ngila nenji monzo kaka Phetelo nu Yowani nu Jake nu sha mona nu ginenji. ⁵² Tala khungiawo akima a kalele mu dila nu gu di yangisa mukunda nu mona mwene. Uvi Yesu wa zwelele egi :" Bembenu gu dila, gwa file go, udi gu tulo." ⁵³ Uvi a yandigile gu mu lela mukunda a kalele mu jiya egi gwa shi nu monyo go. ⁵⁴ Uvi Yesu wa kwatele koko dia mona mwene wa mu tamegele mu ndinga ya ngolo egi: " Munami zuga ! " ⁵⁵ Pheve yenji ya mu vutugile, enji wa zugile kaka hene henyanyi. Yesu wa hanela swa egi a mu hwe gima gia gudia. ⁵⁶ Shenji nu ginenji a yitugile uvi Yesu wa a tunyishile ha gu konda gu leza ata muthu ndaga ya balega.