¹ Tangwa Yesu a manesele gu longa ndaga a kalele mu leza athu, wa ngidile mu dimbo dia Kapelenawum. ² Tala, fumu wa masuta mu moshi wa kalele nu muhiga wenji, wa kalele wa mu tshigina mwa vula, muhiga mwene wa kalele nu gu kata gwa lufwa. ³ Tangwa fumu wa masuta a vile ndaga ya Yesu, wa tumile mambuta a ba yuda, ha gu mu leza aye a belule muthu wenji wa gisalo. ⁴ Tangwa a kumile gwa Yesu, athu ene a yandigile gu bondila Yesu nu gu zwela egi: " Idi ya bonga u mu hwe gima ginyi adi mu tshigina, ⁵ mukunda wa nu tshigina dimbo dietu enji mwene wa tu tungile inzo yiyi ya isambu." ⁶ Hene Yesu a ile nawo njila imoshi. Adi a kuma phene phene nu gisapha, fumu wa masuta wa tumile mafut'enji ha gu leza egi: " Fumu, gudi hwa ndo phashi, mukunda ngu shui nga kuwa go mukunda uze u ngile mu gisapha giami. ⁷ Idi mukunda nu nganyi nga monele go phila eme ngu ze gwa eye. Uvi zwela kaka gima gi moshi, muthu wami wa gisalo a guluge. ⁸ Mukunda n'eme nji ngu di nga muthu nga hageya gu gisalo, nga nu tala masuta adi mu giyega gia ngu hwile. Gula nga leza mu moshi egi: " Nda" wa nu ya; gwa muko egi: " Iza" wa nu za; gwa muthu wami wa gisalo egi : kita ngagi" wa nu kita." ⁹ Tangwa Yesu a vile ndaga jene, wa yitugile, gu nyima wa balumugile gwa athu a kalele mu mu hata, wa a lezele egi: " Ngu mu mi leza egi, ata gu Izalayele nga monele go ata muthu udi nu lukwikilu lwa ngagi." ¹⁰ Tangwa wanyi a tumiye a vutugile, a sangele muthu wa gisalo mwene wa beluga. ¹¹ Gu nyima dia tangwa, Yesu wa ile mu dimbo dia nu tamegeya egi Nayin, alongogi enji nu gimvuga gia athu a ile nenji njila imoshi. ¹² Mu phila a phusanele ha mufulo wa dimbo diene, a taganele nu muthu mu moshi wa kalele mu bateya wa fwa, wa kalele mona yala mu moshi wa butugile mu vumo dia ginenji ( mukhetu mwene wa kalele wa fishile mulumienji ), enji athu a vula a kalele mu za mu hata mukhetu mwene. ¹³ Ha gu mu mona ngagi, Fumu wa vile khenda mukunda nu mukhetu mwene enji wa mu lezele egi: " U didi nji go ." ¹⁴ Gu nyima wa phusanele wa kwatele giphona, wanyi a gi batele a maganele, enji wa zwelele egi: " Mona yala nga zwela egi zuga." ¹⁵ Mvumbi ya zugile ya yandigile gu zwela. Hene Yesu a mu hanele gwa ginenji. ¹⁶ Hene athu akima a vile woma, enji a yandigile gu vutula lukumu gwa Nzambi nu gu zwela egi : " Profeta wa mbuta wa zugishiya mu katshi dietu enji Nzambi weza mu tala athu enji." ¹⁷ Ndaga yiyi ya Yesu wa phanzanele mu dimbo dikima dia Yudeya nu mu membo akima a phene phene. ¹⁸ A longogi a Yowani ejile mu mu leza ndaga ja vula. ¹⁹ Hene, Yowani a tamegele mu yadi mu katshi dia alongogi enji wa a tumile ha gu hula Fumu egi: " Keti udi muthu yonu u mu za to tu feto nenga muthu muko?" ²⁰ Tangwa a kumile gwa Yesu, a hudile egi : " Yowani mubotigi wa tu tuma ha guza tu gu hule egi: " Keti eye, yonu udi mu za to tu nenga Muthu muko ?" ²¹ Mu tangwa diene dinyi, Yesu wa belwile enya misongo a vula, nu enya pheve ja bola, nu belula enya meso a fwa. ²² Wa a vutudile egi : " Tangwa mba mu vutuga, lezenu Yowani ndaga mwa katuga gu mona nu jinyi mwa vwa. Enya meso a fwa adi mu mona, ikata mu wenda, enya hute mu beluga, enya matshi a fwa mu vwa, mvumbi mu zuga, ndinga ya bonga mu longeya gwa aphagano. ²³ Lusagumunu lu kale gwa muthu yonu mba u ngu kwikila mukunda nu ndaga jiji adi mu mona." ²⁴ Tangwa wanyi a tumiye gwa Yowani a vutugile, Yesu wa yandigile gu leza athu ndaga ya talele Yowani egi : " Nanyi mwe za mu tala mu katshi dia temu dia fufuta fufuta ?" Gituntu gi mu hunga mu muphephe ? ²⁵ Nanyi mwe za mu tala ? Muthu wa sudiga mulele wa bonga? Uvi wanyi adi a sudiga milele ya bonga adi mu jinga mu lujingu lwa bonga adi mu jinzo ja mafumu. ²⁶ Hene nanyi mwayi mu tala? Profeta ? Ngu mu mi leza egi, udi wa balega profeta. ²⁷ Tala yonu mukunda nu mwene a sonegeye egi: " Tala nga tuma gu twama diaye ngenji wami ha gu londa njila." ²⁸ Ngu mu zwela egi, mu katshi dia wanyi a butugile gwa mukhetu, gu shi nu mbata wa Yowani go. Lulu ngagi galenge mu Gifumu gia Nzambi udi mbuta wa mu balega." ²⁹ Tangwa athu a kima nu afutisi a itadi a vile nganyi, a zwelele egi Nzambi udi wa kielega, mu phila a zudile mbotiga gwa Yowani. ³⁰ Uvi a falisaye nu wanyi a longugile mwa bonga shigo ja ba yuda a tunyile ndaga mu phila Nzambi a londele mukunda nu ene mukunda a zudile gawo mbotiga ya Yowani go. ³¹ Gu ikhi nga jiya gu fwanesa athu a khukho yiyi? Adi a fwanana nu ikhi ? ³² Adi a fwanana nu ana a mu kena ha mbaji, adi mu phaga ha gu di tamega mu katshi diawo nu gu zwela egi : " Ta kala mu bula ngoma uvi enwe mwa kinile go. Ta yimbisa khunga ya mafwa, enwe mwa didile go." ³³ Mukunda Yowani mubotigi we jile, gwa kalele mudia musa go, nga ndo gunwa matombe, uvi mu di mu zwela egi : " Udi nu diabulu." ³⁴ Muna Muthu we jile, mudia nu gunwa enwe mwa zwelele egi: " Tala mwenya waza wa nu lauga matombe, futa dia afutisi a itadi nu enya ndaga ja bola." ³⁵ Uvi gutema gu mu jiyana gwa ana akima." ³⁶ Mu falisaye mu moshi wa mu tamegele ha guya mudia nenji. Hene, tangwa Yesu a ngidile mu inzo ya mufalisaye mwene wa di tumbigile gu mesa, ³⁷ gwe jile mukhetu mu moshi wa mu dimbo wa kalele ndumbu, tangwa a vile egi Yesu udi mu inzo ya mufalisaye. Mukhetu mwene we jile nu mulangi wa mananashi a vumba dia bonga. ³⁸ Mu phila a yile mu kala gu kunda dia Yesu, phene phene nu malu a Yesu, wa yandigile gu tebesa malu a Yesu nu masoji, wa kalele mu humuna masoji ene nu sugi jenji, nu gu lenza, gugu nu gu mu kungula mananashi. ³⁹ Tangwa mufalisaye yonu wa tamegele Yesu wa monele nganyi, wa di zwelele mu mutshima wenji egi: " Nga muthu yogu udi profeta wa bolo jiya mukhetu yogu udi mu mu kwata udi nanyi, mukunda udi mukhetu wanu kita ndaga ja bola." ⁴⁰ Yesu wa mu lezele egi : " Simoni, ngu di nu gima gia gui gu leza." Wa vutudile egi: " Longi, ngu leze." ⁴¹ Yesu egi : " Muthu mu moshi wa kalele nu athu muyadi wa a sombele falanga. Mu moshi wa kalele u feto vutula lukhama lwa falanga, muko makumi a tano a falanga. ⁴² Mu phila a monele go phila ya gu vutula falanga, wa a vile khenda, muyadi'awo akima. hene nanyi mu katshi diawo wa feto gu mu tshigina mwa vula ? " ⁴³ Simoni wa vutudile egi : " Ngu mu yindula egi yonu udi nu fuga ya gu balega." Yesu egi : " Wa yindula mwa bonga ." ⁴⁴ Yesu wa balumugile gwa mukhetu, wa lezele Simoni egi : " U mu mona mukhetu yogu, nga ngila mu gisapha giaye, wa ngu wovele malu go, uvi mukhetu yogu wa ngu betesa malu nu masoji enji, wa ngu humuna nu sugi jenji. ⁴⁵ Wa ngu sunyile go ludimi, uvi mwene katuga gu ngila gwami mu gisapha giaye, udi mu ngu sunia malu. ⁴⁶ Wa ngu kungudile go mafuta gu mutwe, uvi mwene wa ngu kungula mafuta gu malu. ⁴⁷ Hene, ngu mu gu leza egi , masumu enji akima nga a lolula, mukunda wa leza gu tshigina. Uvi yonu wa nu loluleya ga ndambu wa nu tshigina nji ga ndambu." ⁴⁸ Gu nyima wa wa mu lezele egi : " Masumu aye nga a lolula." ⁴⁹ Wanyi a kalele nenji ha mesa a zwelele mu mitshima yawo egi : " Muthu yogu udi wa phila khi u mu lolula nu masumu ?" ⁵⁰ Uvi Yesu wa lezele mukhetu mwene egi : " Lukwikilu lwaye lwa gu gulusa, inda mu ngemba."