¹ Mu tangwa Yesu a khalele mu balega mu katshi dia gilanga mu gilumbu gia gu hima, alongogi enji a yandigile gu bela mabundu mudia. ² Afalisaye ako a hudile egi:" mukunda nu ikhi mudi mu kita ndaga inyi ya tunyishiye ha gu kita mu gilumbu gwa gu hima?" ³ Yesu wa vutudile egi :" mwa tangele go ndaga inyi Davidi a kitile tangwa a vile nzala mwene nu mafuta enji?" ⁴ Wa ngidile mu inzo Nzambi wa zangudile mulambu a dile, wa hwile nu mafuta enji, mapha wanyi a khalele ata muthu mu moshi gwa lendele gudia go; khuta nganga-Nzambi phamba ?" ⁵ Wa a lezele egi :" Muna-Muthu udi Fumu wa gilumbu gia gu hima." ⁶ Gilumbu giko gia gu hima, Yesu wa ngidile mi inzo ya Isambu ya bayuda wa yandigile gu longa athu. Gwa khalele yala mu moshi nu koko dia khandambwa. ⁷ Tu lagi nu afalisaye a khalele mu tala Yesu kana wa jiya gu belula Muthu yonu mu gilumbu gia gu hwima mukunda nu gu kamba phila ya gu mu funda egi wa kiti gima gia bola. ⁸ Uvi mwene wa jiyile matangi awo, wa lezele yala mwene wa khalele nu koko dia Gifu egi:"Zuga magana mu katshi dia athu wawa akima." Hene yala mwene a zugile wa maganele hene. ⁹ Yesu wa hudile gula idi ya bonga ha gu kita ndaga ya bonga mu gilumbu gia gu hima to ha gu kita gima gia bola, ha gu gulusa monyo to ha gu utotesa?" ¹⁰ Mwene wa a talele akima hene a lezele muthu mwene egi :"Sununa koko diaye ." Wa kitile nganyi hene koko diene dia belugile. ¹¹ A vile khabu, hene a yandigile gu zwela ene-nu-ene ha gu tala ikhi a jiya gu kita Yesu. ¹² Gilumbu giene Yesu wa yile gu mulundu ha gu samba, wa sambele Nzambi phipha ikima. ¹³ Gwa dile guma gwakia, wa tamegele alongogi enji wanyi mwene a phonele kumi nu muyadi, wa a hwile jina dia a thumwa. ¹⁴ Ma jina a athumwa a khalele : Simoni yonu a hwile jina dia Petelo, Andele phangia Jaki, Yona, Batolome, ¹⁵ Matayo,Thoma, Jaki muna alife, Simoni yonu muthu wadi zalula, ¹⁶ Yudasi muna Jaki, nu Yudasi isikaliote yonu wa mu digile. ¹⁷ Yesu wa bulumugile n'awo mulundu ejile mu magana hama ha konda mulundu, gunu gwa khalele gimvuga gia koma gia alongogi nu athu ako a vula a katugile gu Yudeya gu Yelusalemi nu gwa leha gu khanda ya nzadi ya mungwa mungwa phene-phene nu Tire nu Sidoni. ¹⁸ A khalele muza mu vwa malongi nu gudi belula gwa mwene. Ata athu wanyi a khalele nu pheve jia bola a belugile. ¹⁹ Gibuga gia athu a khalele mu kamba phila ya gu mu kwata mukunda ngolo ji moshi jia khalele mu zoga mu mwila wenji jia khalele mu a belula. ²⁰ Hene wa tuphudile meso gwa alongogi enji, Yesu wa a lezele egi; " Kiese gwa enwe mwa konda gima, mukunda Gifumu gia Nzambi gidi gienu. ²¹ Kiese gwa enwe mudi nu nzala, mba mudi mu kuta. kiese, enwe mudi mu dila lulu ngagi, mba mudi mu lela. ²² Kalenu nu kiese tangwa athu adi mu mi yegula, tangwa adi mu mi tuna, tangwa adi mu mi shingana nu gu mi leza ndaga jia bola mukunda nu Muna Muthu. ²³ Kalenu nu kiese mu gilumbu giene, mukunda lufutu lwenu mba ludi mu kala lwa koma gosa. Idi mu phila yene inyi a khakha jenu a kalele mu kita ba profeta. ²⁴ Uvi khenda gwa enwe mvwama! mukunda mwa zudi gale genu lufutu lwenu. ²⁵ Khenda gwa enwe mudi mwa kuta lulu ngagi! Mukunda mba mudi mu vwa nzala gu ma twama. Khenda gwa enwe mudi mu lela lulu ngagi! Mukunda mu kala mu mafwa, enji mba mudi mu dila gu ma twama. ²⁶ Keti mwa mu kala mu khenda tangwa athu a nu zwela ndaga jia bonga ji mu mi talela! Mukunda idi kaka mu phila inyi a khakha jenu a kitile ba profeta a luvunu. ²⁷ Uvi ngu mu mi leza enwe mudi mu ngu vwa egi, tshiginenu mbeni jenu, kitenu ndaga jia bonga gwa wanyi a nu mi vweza; ²⁸ sagumunenu wanyi a mu mi shinza, kalenu mu sambela wanyi a mu mi monesa phashi. ²⁹ Gula muthu wa gu hwa mbata gu butu di moshi mwa bonga u mu hwe butu diko. Gula muthu wa gu tambula mulele, mwa bonga a gu tambula nu gazau. ³⁰ Muthu mukima wa gu lomba gima mu hwe. Gula muthu mu moshi wa zula gima giaye gi moshi, u lombi go a gu vutudila nagio. ³¹ Gima u mu tshigina athu a gu salele, n'eye gi salele athu ako. ³² Gula wa nu tshigina kaka athu wanyi a nu gu tshigina, nuta khi wa nu zula mu katshi diawo? Mukunda enya masumu a nu tshigina wanyi a nu gu a tshigina. ³³ Gula wa nu kita ndaga jia bonga gwa athu wanyi a nu gu kita nganyi, nuta khi mwa nu zula mu katshi diawo? Mukunda enya masumu a nu kita nganyi. ³⁴ Gula wa nu somba ima kaka gwa athu wanyi a nu gu hagela mutshima mwa bonga a mi hwe, nuta khi mwa nu zula mu katshi diawo? Ata enya masumu a nu somba enya masumu nako a nu kinga gu zula gima nu gu vutula gima a sombele mu tangwa dia gu vutula. ³⁵ Tshiginenu mbeni jenu, kalenu mu a kitila ndaga ja bonga. A sombenu ima, konda gu di monesa phashi egi mba a mi vutudila nganyi mba mu kale nu ima ya vula. Mba mu kala ana a Fumu wa gosa,mukunda mwene wa nu leza gubonga gwa athu a bola. ³⁶ Kalenu mu vila athu khenda mu phila Shenu a nu mi vila khenda. ³⁷ Mu kala mu sambesa athu ako go nganyi mba mu sambesaya go. Mu kala go mu belesa athu ako, nganyi mba mu beleseya go. Kalenu mu vila athu ako khenda, nganyi mba mu viye khenda. ³⁸ Kalenu mu kaphela athu ako, nganyi mba mu kapheye N'enwe. Idi mu giteselo gia bonga( gia gu niema, gia gu bunda, gia zala fwafwafwa) mba mu zaleseya ima mu ginda mu nu haga milele. Mukunda kaka nu giteselo giene ginyi mwa nu salela giene mba gi saleya ha gu mi tesela ima. ³⁹ Wa a tele nji gingana giko egi: " Keti gifwa meso wa jiya gu twalesa gifwa meso giko? Gula wa kita nganyi, keti a jiyile go gubwa muyadi'awo akima nu wina? ⁴⁰ Longogi gwa balegele go longi wenji, uvi longogi mukima wa longeya mwa bonga wa nu kala ole longi wenji. ⁴¹ Mukunda nu ikhi udi mu mona mwangu udi mu diso dia phangi'aye, uvi ushi mu mona go ga lusese gadi mu diso diaye? ⁴² Phila khi wa jiya gu leza phangi'aye egi: " Phangi, magana ngu gu katule mwangu udi mu disa diaye" gula eye ushi mu mona go ga lusese gadi mu diso diaye? Enya mbamba mbalumugu! Katula thomo ga lusese gadi mu diso diaye, gu nyima u mone phila ya gu katula mwangu udi mu diso dia phangi'aye. ⁴³ Gu shi go nu mutshi wa bonga wa nu haga mabundu a bola, nga ndo mutshi wa bola u hage mabundu a bonga. ⁴⁴ Mutshi ukima wa nu jiyana gu mabundu adi enji. Mwa jiyile go gu hela manga gu mutshi wa isongesa nga ndo gu hela ndulu gu mutshi wa mabutshi. ⁴⁵ Muthu wa mutshima wa bonga, wa nu zola ima ya bonga gu mutshima wenji, yonu wa mutshima wa bola, wa nu zola ima ya bola . Mukunda ya vula ya nu zoga mu kano ya nu katuga gu mutshima. ⁴⁶ Mukunda nu ikhi mu mu ngu tamega egi: Fumu, Fumu" enji mushi genu mu kita go ndaga nga nu zwela? ⁴⁷ Muthu mu kima u mu za gwa eme, u mu vwa malongi ami, u mu a salela, ngu mu mi leza udi wa fwana nanyi. ⁴⁸ Udi wa fwana muthu mu moshi wa ka mu tunga gisapha, wa hagele wina dia leha wa jigile makunji holu dia maseso. Tangwa meya a zalele enji muphephe wa bala we jile mu bula gu gisapha giene konda gu kita ata gima gu gisapha giene, mukunda gia kalele gia gu tunga mwa bonga. ⁴⁹ Uvi yonu u mu vwa malongi ami konda gu a salela udi wa fwana muthu yonu wa tungile gisapha gienji, konda gu haga makunji. Tangwa muphephe wa budile gisapha giene mu mbala imoshi gia bwile, gia phanzanele gikima."