¹ Gilumbu gi moshi athu a kalele mu za gwa Yesu ha gu vwa ndinga ya Nzambi. A kalele gu khanda ya gijiba gia Jenezareti, ² gunu wa monele ma wato muyadi mu khelelego ya gijiba. Enya gu lowa a kalele mu wova wanda wawo wa gu lowela. ³ Wa ngidile mu wato umoshi wa Simoni enji wa mu lezele ha gu phusa ga ndambu , wa di tumbigile mu wato wene, hene a yandigile gu longa athu. ⁴ Tangwa a manesele gu longa, wa lezele Simoni egi : " phusa wato mu katshi katshi dia kiawo kwemba wanda ha gu lowa." ⁵ Simoni wa vutudile egi : " Longi, ta sala gisalo phipha ikima nu gu kwata ata gima go. uvi mukunda nu ndinga yaye, ngu mu mba wanda mu kiawo. ⁶ Wa mbile wanda enji wa kwatele jiswi ja vula, wanda wa kalele wa zala phembeni u tawuge. ⁷ A kitile gidimbu ha gu tamega aphangi'awo ako a kalele nu wato ha gu za mu a salesa. Athu ene ejile nu wato a zalesele ma wato akima muyadi nu giswi enji mu phila a zalele a kalele mu tshigina gu shuwuga mu kiawo. ⁸ Uvi Simoni, tangwa a monele nganyi wa bwile mu malu a Yesu, nu gu zwela egi: " U ngu phusana go, mukunda ngu di nga mwenya masumu." ⁹ Wa yitugile nu athu a kalele nawo ha gu mona gu lowa gwa nganyi. ¹⁰ A kalele Jake nu Yowani ana a Zebedeyo nu Simoni. Hene Yesu a lezele Simoni egi : " Uvi woma go mukunda ngu mu gu kitula mulobi wa athu. ¹¹ Hene; a bembele ima ikima; a hatele Yesu. ¹² Wa ngidile mu dimbo di moshi hene muthu mu moshi wa gimbefu gia hute we jile mu zoga. Ha gu mona Yesu, wa bwile wa tshiga meso mu mavu wa mu lezele egi: " Fumu, gula wa tshigina, ngu belule gu gimbefu gigi." ¹³ Yesu wa sununile koko, wa mu kwatele nu gu zwela egi: " Nga tshigina beluga. Kaka hene henyanyi hute dia katugile. ¹⁴ Hene Yesu wa mu hwile shigo ha gu konda gu leza ata muthu. Wa mu lezele egi : " Inda gwa nganga nzambi, u hane makapho a gu di wova mu phila moyize a zwelele, nganyi ya mbo kala gi temwe giawo. ¹⁵ Ndaga yenji ya kalele mu zweleya tangwa dikima, imvuga ya athu ya kalele mu di bungisa ha gu hata malongi enji nu gu za mu beluga gu misongo. ¹⁶ Uvi mwene wa katugile ha guya mu temu mukunda nu gu samba. ¹⁷ Gilumbu gi moshi, wa kalele mu longa. Afalisaye nu a longi a shigo a kalele adi tumbiga, ejile mu membo a gu Galileya, gu Yudeya, nu gu Yelusalemi, enji ngolo ja Fumu ja kalele mu katshi dienji mukunda nu gu belula. ¹⁸ Gu nyima gwe jile athu a bata holu dia gitanda muthu mu moshi wa gimbefu gia Khanda- khafu, a kalele mu kamba phila ya gu ngidisa monzo ha gu mu haga gu twama dia Yesu. ¹⁹ A monele go phila ya gu mu ngidisa mukunda nu gu vula gwa athu, hene a kandugile ha mukambo wa gisapha enji a katudile mwangu a mu bulumwishile nu gitanda, mu katshi dia gimvuga gu twama dia Yesu. ²⁰ Ha gu mona lukwikilu lwawo, wa a lezele egi: " Masumu aye nga a lolula." A falisaye nu a longi a shigo a yandigile gu zwela egi: " Udi nanyi, muthu , u mu zwela ndaga ja mashingo ?" ²¹ Nanyi wa jiya gu lolula masumu gula ishi go Nzambi kaka? ²² Uvi Yesu wa jiyile ngindu jawo wa a hudile egi: " Ngindu khi mudi mu yindula ?" ²³ Ikhi idi phashi ha gu zwela egi : " Nga gu lolula masumu aye" nga ndo " zuga inda gaye?" ²⁴ Hene, jiyenu egi Muna muthu udi nu giyega haha ha mavu ha gu lolula masumu, "Nga zwela egi, zuga, zula gitanda giaye vutuga mu gisapha giaye." ²⁵ Kaka hene henyanyi, muthu mwene wa zugile gu twama diawo, wa zudile gitanda gienji wa vutugile mu inzo yenji nu gu kumisa Nzambi. ²⁶ Athu akima a yitugile, nu gu kumisa Nzambi, nu guvwa woma, a kalele mu zwela egi : " Magino ta mona ndaga ja gu yituga. " ²⁷ Gu nyima, wa zogele wa monele mufutisi wa itadi jina dienji Levi, wa di tumbiga mu bilo dienji , wa mu lezele egi : " Levi ngu hate." ²⁸ Levi wa zugile wa bembele ima ikima, wa mu hatele. ²⁹ Levi wa tamegele Yesu mu inzo yenji wa mu hwile ima ya gudia, gwa kalele nu athu a vula Afutisi a itadi nu athu ako a kalele ha mesa nu Yesu. ³⁰ A falisaye nu a longi a shigo a yandigile gu di niema nu gu leza alongogi a yesu egi: " Mukunda nu ikhi mudi nu nwa nu gudia nu afutisi a itadi nu enya masumu? " ³¹ Yesu wa zwelele egi: " Ishi go athu a konda misongo adi nu funu ya munganga, uvi enya misongo. ³² Nge jile mu tamega go athu a mitshima ya bonga, uvi enya masumu mukunda a balule mitshima." ³³ A vutudile egi: "A longogi a Yowani a kalele mu tuna gudia mukunda nu isambu, ata wanyi a afalisaye a nu kita nganyi, uvi wawa aye a mu dia nu gunwa." ³⁴ Yesu egi : " Keti mwa jiya gu tunyisa mafuta a muthu u kwela tangwa muthu mwene wa kwela adi hene? ³⁵ Ilumbu idi muza muthu mwene yonu wa kwela mba a katuga, hene mba a tuna gudia." ³⁶ Wa a tele nji gingana giko egi : " Gushi nu muthu go wa nu taula gitemba gia mulele wa pha ha gu u namiga gu mulele u kulu. Gula wa kita nganyi mba u mu taula mulele wa pha, gitemba gia mulele wa pha mba gi shi muya gu khanda ya mulele u kulu go. ³⁷ Gu shi nu muthu wa nu fungisa matombe a bonga mu katshi dia mbinda idi nu mutungu u kulu go, gula wa kita nganyi mutungu u kulu wa feto bolesa matombe. ³⁸ Nganyi, idi ya bonga ha gu fungisa matombe a bonga nu mutungu wa bonga. ³⁹ Gu shi nu muthu go gu nyima ya gunwa matombe a milala, wa jiya gu vwa egi matombe a pha adi a bonga, mukunda mba u zwela egi: " matombe a milala adi a bonga