¹ Hene, phila Yesu a khalele wa zala nu Pheve santu, wa yile gu muta wa Yolodani mu phila Pheve ya mu twamezele mu temu dia zala fufuta ² gunu wa phageye gwa diabulu ilumbu makumi a wana. Gwa dile go ata gima mu ilumbu yene ikima, Gwa dile tangwa dia balega, wa vile nzala. ³ Diabulu wa mu lezele egi: " Gula udi wa muna Nzambi, leza maseso wawa a kituge mapha." ⁴ Yesu wa mu vutudile egi: " Ya sonegeye egi: " Muthu mba gwa jingila khuta mapha go." ⁵ Gu nyima , diabulu wa twamezele Yesu holo hama ha moshi ha leha wa mu monesele ifumu ikima ya hoshia mavu mu ga tangwa ga moshi. ⁶ Diabulu wa mu lezele egi: " Nga mbo guhwa gifumu gigi ni khembo yenji; mukunda ya ngu hwiye enji nga jiya gu i hana gwa muthu mu phila nga tshigina. ⁷ Hene, gula wa fugama ha gu ngu hwa lukumu, i mu khala yaye. ⁸ Uvi Yesu wa mu vutudile egi: " Ya sonegeye egi: " Lukumu guhwa kaka Fumu Nzambi waye, mama mwene phamba u feto salela." ¹⁰ Gu nyima diabulu wa twamezele Yesu gu Yelusalemi wa mu hagele gosa hama ha moshi ha leha holu dia inzo ya isambu wa mu lezele egi: " Gula udi wa muna Nzambi, di kwembe u bwe haha hoshi. ⁹ Mukunda ya sonegeye egi : " Mba udi mu gu hanela mukwala gwa ba yanjio ha gugu keba. ¹¹ Mba adi mu gu bata ha mago mu phila egi gidiatelo giaye gile gu khukhulula seso go." ¹² Yesu wa mu vutudile egi: " Ya sonegeye egi: " Wa jiyile go gu phaga ha gi dimba Fumu Nzambi waye." ¹³ Tangwa diabulu a manesele ha gu phaga gu dimba Yesu, wa katugile mu khudienji wa yile guma guko. ¹⁴ Gu nyima Yesu wa vutugile gu galileya, wa zala nu ngolo jia Pheve hene sango ya bonga ya mu talele ya phanzanele khanda yene ikima. ¹⁵ Hene a yandigile gu longa mu jinzo jiawo jia isambu enji wa zudile lukumu gwa athu akima. ¹⁶ Wa yile gu Nazaleti,dimbo a kudile, hene mu phila shigo, wa yile mu ngila mu inzo ya isambu mu gilumbu gia gu hima. Wa zugile ha gu tanga mu ndinga ya ngolo. ¹⁷ Wa hwiye bugu ha gu tanga mu mukanda wa profeta Yezaya. Wa kangudile bugu enji wa monele njila ya sonegeye egi : ¹⁸ "Pheve ya Fumu idi mu katshi diami, mukunda wa ngu kungudile mafuta a santu ha guya mu longa sango ya bonga gwa a sugami. Wa ngu tumile ha guya mu longa gu guluga gwa wanyi a kwateye, gwa ifwa meso a mone, ha gu kangula wanyi adi mu phashi ¹⁹ nu ha gu longa ndaga ya mvula imoshi ya khenda jia Fumu. ²⁰ Gu nyima wa kangele bugu diene, wadi vutudile gwa muthu wa gisalo hene a yile mudi tumbiga hoshi. Athu akima mu katshi dis inzo ya isambu a nongele meso ha gu mu tala mwa bonga bonga sha. ²¹ Hene wa yandigile gu a leza egi: " Magino ndaga yene idi mu salama mu phila mwa katuga gu ivwa." ²² Akima a khalele themwe jia ndaga a zwelele enji a yitugile mwa vula ha guvwa ndaga jia bonga jia khalele mu zoga mu kano wenji. A zwelele egi: " Keti yogu gwa shi muna Yozefi go?" ²³ Hene wa a lezele nji egi: " Mba mudi mu ngu tela gingana egi: " Munganga di belule eye ha khaye. Ndaga jikima ta vile egi wa khalele mu kita gu Kapelenawum, ji kite phila imoshi mu dimbo diaye wa butugile. ²⁴ Wa a lezele egi: " Mu masonga ngu mu mi leza egi, gushi nu profeta wa nu yambeya mwa bonga mu dimbo diawo a butugile. ²⁵ Uvi mu masonga, ngu mu mi leza egi gwa khalele nu akhetu a Mifidi a vula gu Izalayele mu tangwa dia Eliya gosa gwa kangeye mvula ji tatu nu ngonda sambano nzala ya vula ya ngidile mu thotho ya mvimba. ²⁶ Uvi, Eliya gwa tumiye gwa mifidi ikima go kaka gwa mufidi yonu wa gu sarepeta gu Sidoni. ²⁷ Gwa khalele nu enya hute a vula gu Izalayele mu tangwa dia profeta Eliza, uvi ata mu mushi mu katshi diiawo gwa belugile go kaka Namana mwenya gu Siriya." ²⁸ Tangwa a vile ndaga jene, wanyi akima a khalele mu inzo ya isambu a vile khabu jia vula. ²⁹ A zugile, a mu kayele nu gu mu zola gonjia dimbo enji a mu batele holu dia mulundu wa leha unu dimbo dia tungiya ha gu muluta a bwe hoshi. ³⁰ Uvi Yesu wadi wehele mu katshi diawo enji wa yile genji gu dimbo diko. ³¹ Wa bulumugile gu Kapelenawum, dimbo di moshi dia gu Galileya, wa yandigile gu longa gu ndaga ya talele gilumbu gia gu hima. ³² A khalele mu yituga gu malongi a khalele mu longa mukunda wa khalele mu zwela nu gifumu gikima. ³³ Gunu gwa khalele nu muthu mu moshi mu katshi dia inzo ya isambu wa khalele nu pheve ya bola. Wa kabugile mu ndinga ya ngolo egi: ³⁴ " Ah ! Ikhi tudi nayo nu eye, Yesu mwenia gu Nazaleti? Keti weji ha gu tu shiya? Ngu mu jiya egi udi wa Santu wa Nzambi ! " ³⁵ Yesu wa balele pheve ya bola egi: " Hena tedie, enji zoga gwa muthu yogu ! " Tangwa pheve ya bola ya bwishile muthu mwene hoshi mu katshi diawo, enji ya zogele ya konda gu mu kita ata gima dia bola. ³⁶ Akima a khalele mu yituga, enji bembele go ha gu leza athu ako egi: " Ndaga jia phila ngagi? Udi mu bala enji nu gifumu pheve jia bola, jidi mu zoga." ³⁷ Hene ndaga jia fete-fete jia gu talele yesu jia phanzanele mu khanda jikima nu mu membo a phene-phene. ³⁸ Hene Yesu a zogele mu inzo ya Isambu a yile mu ngila mu inzo ya Simoni. Gunu, bokilo wa mukhetu wa Simoni wa khalele nu gimbefu gia vula, a mu bondile ha gu kita gima gi moshi mukunda nu bokilo mwene. ³⁹ Wa shiwugile mu khulo yenji, wa hanele kumandima, hene gimbefu gia mu zogele. Kaka hene heniani wadi tuphudile wa yile mu a salesa. ⁴⁰ Mu gingweze, athu ejile mu bata gwa Yesu wanyi akima a khalele nu gimbefu gia phila nu phila. Wa a hagele mago hene a belugile. ⁴¹ Pheve jia bola jia zogele gwa a vula mu katshi diawo nu gu kabuga egi: " Udi wa muna Nzambi ! " Hene, Yesu a balele pheve jia bola enji gwa ji hwile go swa ya gu zwela; mukunda jia khalele mu jiya egi udi Kilisto. ⁴² Tangwa guma gwa kiele, wa zogele enji wa yile gu khanda ya temu dia zala fufuta. Gimvuga gia athu gia yandigile gu mu kamba enji a yile mu kuma ti nu hana mwene a khalele. A tshiginile gu mu tunyisa ha gu khala gwa leha nawo. ⁴³ Uvi mwene wa a lezele egi: " Nga feto mu longa mu membo ako sango jia bonga jia gifumu gia Nzambi; mukunda nga tumiye mukunda nu nganyi." ⁴⁴ Gu nyima, wa yile nu gu longa mu jinzo jia isambu gu Yudeya.