¹ Gu nyima dia ndaga jene, Fumu wa phonele ako makumi a sambwadi, wa a tumile muyadi muyadi mu membo nu muma munu mukima a tshiginile guya mwene hakhenji. ² Wa a lezele egi: " Gilanga gidi gia koma, uvi athu a gisalo ga ndambu. Sambenu Fumu nu ngolo mu phila egi fumia gilanga, a tume athu a gisalo a vula mu gilanga. ³ Gindenu ! Tala, ngu mu mi tuma ole twana twa ma mameme mu katshi dia miyegu. ⁴ Mu zudi go falanga, nga sagi ya gu wendela, nga saphatu, gu hana lumene ndo gwa muthu mu njila. ⁵ Mu jinzo jiko mba mu ngila, zwelenu thomo egi: " Ngemba ikhale mu inzo yiyi." ⁶ Gula muthu mu moshi wa ngemba udi mu inzo yene, ngemba yenu mba idi mu mu begela, uvi gula ndo mba idi mu mi vutugila. ⁷ Begenu mu inzo yene, dienu nwenu ima ikima mba mu hwiya, mukunda muthu wa gisalo udi ne ya gu hwiya lufutu lwenji. Guya ndo inzo nu inzo. ⁸ Gula mwa ngila mu dimbo di moshi, a mi yamba, dienu ima mba mu hwiya, ⁹ enji belulenu enya gimbefu mba mu sanga. A lezenu egi: " Gifumu gia Nzambi gidi phene-phene nu enwe. ¹⁰ Uvi mu dimbo dinyi mba mu ngila a tuna gu mi yamba, gindenu mu ma bala-bala zwelenu egi: ¹¹ " Ta phuphula fuphi ya dimbo dienu idi gu malu etu ! Uvi jiyenu egi gifumu gia Nzambi gia phusana." ¹² Ngu mu mi leza egi mu gilumbu gia gu sambesa athu, dimbo dia Sodome mba di viya khenda uvi dimbo dinyi ndo. ¹³ Khenda gwa eye, Korazimi ! Khenda gwa eye, Betesayida! Gula nga idimbu ya ngolo mwa monele nga ya salamele mu dimbo dia tire nu dia sidoni, nga membo wawa a balumwile mitshima nu gu phaga ha gusudiga sagi nu gudi kungula fuphi ya mbonza ya tshiya. ¹⁴ Hene membo a tire nu sidoni mba adi mu viya khenda mu gilumbu gia gu sambeseya kansi enwe ndo. ¹⁵ Eye Kapernawum, keti udi mu yindula egi mba u kandwishiya gosa? Ndo, mba udi mu bulumwishiya gu galunga ga mvumbi. ¹⁶ Yonu udi mu mi vwa udi mu ngu vwa, enji yonu udi mu mi tuna udi mu ngu tuna; enji yonu udi mu ngu tuna udi mu tuna yonu wa ngu tumile." ¹⁷ Makumi sambwadi ejile mu vutuga nu kiese gia vula nu gu zwela egi: Fumu, nu pheve gia bola jia khalele mu lemvuga mu jina diaye." ¹⁸ Yesu wa a lezele egi: " Nga mona satana wa katuga gosa wa bwa ule zenyi. ¹⁹ Tala, nga mi hwi giyega gia gu diata holo dia nioga, nu tunvwanga nu holo dia ngolo jikima jia mbeni, hene gushi ata gima gia jiya gu mi kita gubola. ²⁰ Ata nganyi, mu vi go kiese mukunda pheve jia mi lemvugila, uvi khalenu nu kiese mukunda majina enu a sonegeya gosa." ²¹ Kaka hene henyanyi, Yesu Wa vile kiese gia vula mu katshi dia Pheve-Santu hene a zwelele egi: " Nga gu hwa lukumu, Eye Tata, Fumu wa gosa nu wa hoshia mavu, mukunda wa swegele ndaga jiji gwa ngambi nu gwa athu a tema, enji wa ji monesele gwa wanyi adi nu ga ndambu ga ngangu, ole ana mitumba. Eya, Tata, mukunda idi wa bonga gu meso aye." ²² Ima yiyi ikima ya ngu hwiye gwa Shami, enji gushi ata muthu go udi mu jiya nanyi yogu Mona gula ishi Tata go ; enji gushi ata muthu go udi mu jiya nanyi yogu Mona gula ishi go Tata, enji yonu mukima Mona adi mu tshigina gu mu monesa." ²³ Wa balumugile gwa a longogi, wa a lezele mu giswegi egi: " Kiese gwa wanyi adi mu mona ndaga mudi mu mona. ²⁴ Ngu mu mi leza egi ba profeta a vula nu ma fumu a tshiginile gu mona ndaga jiji ji mudi mu mona uvi a ji monele go, nu guvwa ndaga mudi muvwa uvi a ji vile go." ²⁵ Muyuda mu moshi longi wa shigo wa zugile wa maganele molu wa mu phagele nu gu hula egi: " Longi, ikhi nga jiya gu kita ha gu zula monio wa mvula nu mvula?" ²⁶ Yesu wa mu lezele egi: " Ikhi idi ya gu sonega gu mukanda wa shigo? Ikhi mwa nu tanga?" ²⁷ Wa vutudile egi: " Wa feto tshigina Fumu Nzambi waye mu mutshima waye ukima, mu monio waye ukima, mu ngolo jiaye jikima, nu mu mabanza aye akima, enji wa feto tshigina phangiaye phila wanu di tshigina eye hakhaye." ²⁸ Yesu wa mu lezele egi: " Wa vutula mvutu mwa bonga, kita nganyi mba u jinge. ²⁹ Uvi longi wa shigo wa hudile yesu egi: " Nanyi udi phangiaye?" ³⁰ Ha gu vutula Yesu wa zwelele egi: "Muthu mu moshi wa katugile gu Yelusalemi ha guya gu Yeriko mu njila wa taganele nu athu a bola a mu tambudile ima ikima, a mu betele ha gu mu bemba gu lufwa. ³¹ Nganga-nzambi mu moshi wa bulumugile mu njila yene, wa mu monele tangwa a mu monele, wa balegele genji. ³² Phila imoshi muthu mu moshi wa gikanda gia ba levi we jile mu kuma hama hene, tangwa a mu monele, wa balegele genji. ³³ Uvi mwenia gu Samaliya mu moshi we jile mu balega mu njila yene, wa kumile hama hene. Tangwa a mu monele wa vile khenda. ³⁴ Wa phusanele hene a mu lalele itemba ya milele mu phuta jenji, nu gu mu kungula mafuta mu phuta jene. Wa mu hagele holu dia phunda yenji, wa mu twamezele gu inzo ya nzenza ha gu mu sadisa. ³⁵ Mu gilumbu gia hatele, wa futile falanga ibende iyadi gwa fumu wa inzo ya nzenza wa mu lezele egi: " Mu salese mwa bonga ti nu tangwa mba ngu za mu vutuga, gula wa zola falanga jiaye mba ngudi mu gu vutudila." ³⁶ Nanyi mu katshi dia athu wawa mu tatu, phila mudi mu yindula, udi phangia muthu yonu wa beteye gwa ma bandi? ³⁷ Longi wa vutudile egi: " Yonu wa lezele khenda gwa muthu mwene." Yesu wa mu lezele egi: " Nda n'eye kita nganyi." ³⁸ Lulu ngagi mu phila a kalele muya mu njila, wa ngidile mu dimbo di moshi, mukhetu mu moshi mu jina dia Marta wa mu yambele mu gisapha gienji. ³⁹ Wa kalele nu phangi'enji wa mukhetu mu jina dia Mariya we jile genji mu di tumbiga mu malu a Fumu mu hata genji malongi. ⁴⁰ Marta wa kalele mu londa ima ya gudia ha guza mu a hwa. We jile gwa Yesu wa mu lezele egi: " Fumu, keti ishi mu gu sala ata gima go mu phila phangi'ami wa ngu bemba ha khami ha gu mi londela madia? Mu leze eze a ngu kwatese." ⁴¹ Uvi Yesu wa mu vutudile egi: " Marta, Marta, udi mudi monesa phashi gu ndaga ja vula, ⁴² uvi ndaga imoshi idi ya funu idi, Mariya wa phona gima, mba gila gu mu katudiya ndo."