¹ Ya bwile tangwa Yesu a khalele mu samba hama ha moshi. Mulongogi wenji mu moshi wa zwelele egi: " Tu longe phila ya gusamba mu phila Yowani a longele a longogi enji." ² Yesu wa a lezele egi: " Tangwa mudi mu samba, zwelenu egi : " Tata, jina diaye di zule lukumu, Gifumu giaye gize. ³ Tu hwe konso gilumbu ima yetu ya gudia. ⁴ Tu file khenda gu ndaga jetu jia bola, mu phila tudi mu fila athu ako khenda. Gu tu twala ndo ha gubwa mu ndaga jia bola." ⁵ Yesu wa a lezele egi; " Nanyi mu katshi dienu mba ukhala nu futa dienji, enji mba uya mu katshi katshi dia phipha ha gu mu leza egi; " Futa, ngu sombe itshidi iyadi ya mapha, ⁶ Mukunda mu moshi mu katshi dia mafuta ami wa katuga gu ngu kumina lwenielu, enji ngu shi go ata nu gima gia gu a hwa go:" ⁷ Gu nyima yonu wa mu katshi dia inzo, mba u mu vutudila egi: " U ngu hudisa go. Mufulo nga kangi gale, enji anami n'eme hakhami tudi gale ha gididi. Ngu shi gami mu zuga go ha gu guhwa dipha." ⁸ Ngu mu mi leza egi, ata gwa jiyile gu zuga go ha gu mu hwa dipha mukunda udi wa futa dienji, mba udi mu zuga mukunda nu gu yangisa gwaye, hene mba udi mu zuga enji mba udi mu guhwa itshidi ya mapha mu phila mba ukhala nayo funu." ⁹ Ngu mu mi leza nji egi: " Lombenu enji mba mudi mu hwiya; kambenu mba mudi mu mona; kokolenu enji mba adi mu mi kangudila. ¹⁰ Mukunda muthu mukima u mu lomba mba u mu hwiya; yonu u mu kamba mba udi mu mona; enji muthu yonu wa nu kokola, wa nu kangudiya. ¹¹ Tata khi mu katshi dienu, gula munenji wa mu lomba swi, mba u mu hwa nioga ha gu mu swi? ¹² Nga ndo gula wa mu lomba diaki, mba u mu hwa ganvanga? ¹³ Hene, enwe mudi mwa athu a bala mudi mu jiya ha guhwa mabula a bonga gwa anenu, phila khi Shenu yonu udi gosa mba u hana Pheve -Santu gwa athu wanyi adi mu mu lomba?" ¹⁴ Gu nyima, Yesu wa kayele pheve imoshi ya bola ya khalele gwa gatabu. Tangwa pheve ya bola ya zogele, gatabu ga yandigile gu zwela. Gimvuga gia athu gia yitugile! ¹⁵ Uvi athu ako a zwelele egi: " Udi mu kaya pheve jia bola mu ngolo jia Belezebule, fumu wa pheve jia bola ." ¹⁶ Athu ako a mu phagele enji a mu lombele ha gu kita gidimbu gimoshi gi mu katuga gosa. ¹⁷ Uvi Yesu wa jiyile ngindu jiawo wa zwelele egi: " Gifumu gikima gia di kapha ha khagio gia nu phanzana, enji gisapha ginyi gia nu di kapha giene ha khagio gia nu bwa. ¹⁸ Gula satana wadi kapha mwene ha khenji, phila khi gifumu gienji mba gi magana? Mukunda mudi mu zwela egi ngu mu kaya pheve jia bola mu ngolo jia Belezebule. ¹⁹ Gula ngu mu kaya pheve jia bola mu ngolo jia Belezebule, mu ngolo jia nanyi alongogi enu adi mu kaya pheve jia bola? Mukunda nu nganyi, mba adi mu khala ma nzuji enu. ²⁰ Uvi gula ngu mu kaya pheve jia bola mu ngolo dia koko dia Nzambi, nganyi gifumu gia Nzambi gia mi jila. ²¹ Tangwa muthu mu moshi wa bala ngolo udi wa zala nu mata ha gu talela gisapha gienji, ima yenji ya gu keba mwa bonga. ²² Uvi gula muthu muko wa ngolo jia vula weza mu mu lwisa ebuna wa mu nunga mba udi mu mu tambula mata akima mba udi mu mu tambula nu ima yenji ikima. ²³ Yonu gwa shi go gu khanda yetu udi mbeni wetu, enji yonu gwa nu bungisa go nu eme hama ha moshi wa nu phanza. ²⁴ Gula pheve ya bola ya zoga gwa muthu mu moshi, wa nu ya mu kamba hama ha konda meya ha gu kamba hama ha gu hima. Gula ya monele go hama ha gu hima, mba idi mu zwela egi: " Ngu mu vutuga mu gisapha giami ginyi nga zogele." ²⁵ Tangwa mba i vutuga, mba idi mu sanga gisapha giene gia gu komba nu gu hageya mu ndonga. ²⁶ Hene, mba idi muya mu zula pheve jiko ji sambwadi jia gu mu balega ngolo ha guza mu ngila mu inzo mukunda nu gu jinga mwene. Nganyi lujingu lwa suga lwa muthu mwene mba lu kituga lwa bola gu balega ha luyandigu." ²⁷ Tangwa a yandigile gu zwela ndaga jene, mukhetu mu moshi wa tuphudile kano mu ndinga ya ngolo mu katshi dia gimvuga gia athu enji wa zwelele egi: " Kiese gia vula gwa mukhetu yonu wa gu batele mu vumo dienji nu gu gu nwisa mayele." ²⁸ Uvi wa zwelele egi: " Kiese gia vula gwa athu wanyi adi mu vwa ndinga ya Nzambi nu gu i hata." ²⁹ Mu phila gimvuga gia athu gie jile mudi bungisa, wa yandigile gu zwela egi: " Khukho yiyi idi khukho imoshi ya athu a bola. Adi mu kamba gidimbu gimoshi, uvi mba gu lezeya nji go gidimbu giko kaka gidimbu ginyi gia Yonashi. ³⁰ Mukunda,mu phila Yonashi a kitugile gidimbu mukunda nu athu a gu dimbo dia Niniwe, mu phila yene nji, Muna Muthu mba a kituga gidimbu mukunda nu khukho yiyi. ³¹ Fumu mukhetu wa gu khanda ya matotelo a tangwa mba udi mu zuga mu gilumbu gia gusambesa athu a khukho yiyi ha gu a funda, mukunda wa katugile gu songi ya mavu ha guza muvwa gutema gwa Salomo, uvi haha hadi nu muthu mu moshi udi wa balega Salomo. ³² Athu a gu Niniwe mba adi mu zuga mu gilumbu gia gusambeseya nu khukho yiyi ya athu ha gu a funda, mukunda a baludile mitshima tangwa a vile malongi a Yonashi, hene haha hadi nu muthu udi wa balega Yonashi. ³³ Gushi go nu muthu wa nu lemesa mwinda mukunda nu gu uswega to ha gu utshiga goshia gitunga, uvi wa nu hageya holu dia mesa mukunda wanyi a mu ngila monzo a khale mu katshi dia mweji wa tshiya. ³⁴ Diso diaye didi mwinda wa mwila waye. Gula diso diaye didi dia bonga, mwila waye ukima udi mu katshi dia mwania. Uvi gula diso diaye didi nu misongo, mwila waye ukima udi mu katshi dia phipha. ³⁵ Kebenu,mukunda mwania wenu ukituga go phipha. ³⁶ Hene gula mwila waye ukima udi mu katshi dia mwania uvi ata ga gitshidi ga mwila waye gashi go mu phipha, mwila waye ukima mba udi mu khala mu katshi dia mwania mu phila mwinda wa nu gu monesa tondolo. ³⁷ Tangwa a manesele guzwela, mufalisaye mu moshi wa mu tamegele ha guya mudia mu inzo yenji. Hene Yesu a ngidile mu inzo yenji wa yile mudi tumbiga ha mesa. ³⁸ Mufalisaye mwene wa yitugile ha gu mona egi gwa wovele go mago gu twama ya gudia. ³⁹ Uvi Fumu wa mu lezele egi: " Enwe ba falisaye, mudi mu wova makopha nu malonga kaka honze, uvi mu katshi dia mitshima yenu mudi mwa zala nu ngindu jia bola. ⁴⁰ Enwe ikata! Keti yonu wa gangele gonze idi mwene wa gangele nji mu katshi? ⁴¹ Hanenu gwa a sugami ima inyi idi mu katshi dia makopha, nganyi ima ikima i mu khala ya bonga gwa enwe. ⁴² Uvi khenda jia vula gwa enwe afalisaye, mukunda mwa nu futa ga ndambu ga moshi ga mayiji a mente nu mayiji a ruwe mu katshi dia ndambu kumi ya intuntu ya mu masamba, uvi mwa nu salela genu masonga go nu gutshigina gwa Nzambi go. Idi ya bonga ha gu kita ndaga mu masonga nu gu tshigina Nzambi, konda gu kita ndaga jekha. ⁴³ Khenda jia vula gwa enwe ba falisaye, mukunda mwa nu tshigina gu zula ifundo ya thomo mu jinzo jia isambu nu gu hwiya mbote jia lukumu ha mbaji jia athu. ⁴⁴ Khenda jia vula, mukunda mwa fwanana nu majiamo wanyi a konda gu sonegeya wanyi a nu diateya gwa athu konda gu jiya." ⁴⁵ Hene longi mu moshi wa shigo wa ba yuda wa mu hudile egi: " Longi, ndaga udi mu tu leza jidi nji mashingo." ⁴⁶ Yesu wa zwelele egi: " Khenda jenu, alongi a shigo! mukunda mwa nu hwa athu inemo ha gu tuphula, uvi enwe mwa nu kuwa go ha gu tuphula inemo yene nu mago enu hakhenu . ⁴⁷ Khenda jenu, mukunda mwa nu tungila ba profeta wanyi a shiyiye gwa khakha jenu majiamo a bonga ! ⁴⁸ Hene mudi mwa themwe enji mwa nu tshigina ndaga jia a khakha jenu, mukunda a shiyile gibeni ba profeta wanyi mudi mu tungila majiamo a bonga. ⁴⁹ Hene mukunda nu nganyi, mayele a Nzambi a zwelele egi: " Mba ngu mu a tumila ba profeta nu a thumwa mba adi mu a monesa phashi nu gu shiya ako mu katshi diawo." ⁵⁰ Hene khukho yiyi mba idi mu bata ginemo gia ndaga mukunda nu menga a ba profeta adi holu dia mitwe yenu katuga ha luyandigu lwa mavu, ⁵¹ katuga tangwa dia shiyiye Abel ti nu tangwa dia shiyiye Zakariya, wa shiyiye phene-phene nu mesa a gimenga nu hama ha shigo. Eya, ngu mu mi leza egi, khukho yiyi mba idi mu bata ginemo gia ndaga jiji. ⁵² Khenda jenu alongi a shigo jia ba yuda, mukunda mwa katudile saphi ya gu kangudila mufulo wa mayele; enwe hakhenu mwa nu ngila go enji mwa nu kangela athu wanyi a tshigina gu ngila njila." ⁵³ Tangwa Yesu a zogele mu inzo yene, alongi a shigo nu afalisaye a yandigile gu haga giphapha nu gu mu hula mihu gu ndaga jia vula, ⁵⁴ a khalele mu mu phaga nu gu mu tela miheto gu ndaga jenji a khalele mu zwela.