¹ Mu tangwa diene, mu phila gimvuga gia athu gia di bungishile athu ako a yandigile gu diata holu dia athu ako, wa yandigile gu leza alongogi, gu twama dia ndaga jikima egi : " Kebenu gu ndaga jia mambo jia ba falisaye. ² Gushi go nu gima gia gu swega mba gi konda gu monega. Hene, ³ ndaga jikima mba mu zwela mu phipha mba jidi mu viya mu mwania ndaga jinyi mudi mu zwela nu gu shishota gu sugu mba ji mu viya ha kangu. ⁴ Ngu mu mi leza enwe mafuta'mi egi, mu vi go woma wa athu wanyi a nu shiya mwila, gu nyima a shi mu mona go gima gia gu kita. ⁵ Uvi ngu mu mi jiyisa gu twama gu ndaga ya yonu mwa jiya guvwa woma. Vwenu woma wa yonu, gu nyima ya gu shiya, udi nu giyega gia gu mi twala gu milungi. Eya, ngu mu mi leza egi mu bangenu. ⁶ Keti tunjila tu tano twa jiyile gu digiya go gu tu ibende tu yadi twa falanga? Henyaha gushi ata ga moshi ga jiya gu jimbidiya gu meso a Nzambi. ⁷ Uvi ata sugi jia gu mutwe yenu jikima jia nu tangeya. Mu vi go woma; mwa balega tunjila gu funu ⁸ Ngu mu mi leza egi, Muthu mukima udi mu ngu tanga gu twama dia athu, Muna Muthu mba udi gu mu tanga dia ba wanjio a Nzambi, ⁹ uvi yonu udi mu ngu tuna gu twama dia athu mba udi mu tuniya gu twama dia ba wanjio a Nzambi. ¹⁰ Muthu mukima mba u zwela ndaga jia bola gwa Muna Muthu, mba udi mu viya khenda, uvi yonu mba u zweza Pheve-Santu, mba gwa viya khenda go. ¹¹ Tangwa mba mu bateya gu twama dia jinzo jia isambu, nu gwa mafumu mu monyi go phashi ha guzwela gwenu mu tangwa dia gusamba gwenu, nga gu ndaga mba mu zwela, ¹² mukunda Pheve-Santu mba udi gu mi longa mu tangwa diene ndaga mba mu zwela." ¹³ Hene Muthu mu moshi mu katshi dia gimvuga wa mu lezele egi; " Longi, leza mbutami eze tu kaphe gifugo gietu." ¹⁴ Yesu wa mu lezele egi: " Yala, nanyi wa ngu hagi nzuji nga ndo kongo mu katshi dienu? " ¹⁵ Enji wa a lezele egi ; " Di kebenu ha gu tshigina gu khala nu nzala ya gimvwama; mukunda lujingu lwa muthu lwa nu bonga go mukunda nu guvula gwa ima yenji." ¹⁶ Hene Yesu wa a tele gingana gi moshi egi; " Gilanga gia muthu mu moshi wa mvwama gia zolele mbuto ya vula, ¹⁷ wa yindudile mu mutshima wenji egi; " Ikhi nga jiya gu kita, mukunda ngu shi go nu hama ha gu haga mbuto yami." ¹⁸ Wa zwelele goshia mutshima wenji egi; " Tala gima nga mbo kita. Ngu mu phanza mikala yami ikima ha gu tunga iko ya koma, gunu mba ngu haga mbuto yami nu ima yami iko." ¹⁹ Mba ngu di zwelela eme hakhami egi: " Nga bumba ima ya vuma mukunda nu mvula jia vula. Hululuga, dia, nwa khala mu kiese." ²⁰ Uvi Nzambi wa mu lezele egi: " Eye gikata gigi, kaka mu gingweze gigi ngu mu gu lomba monyio waye, hene ima yaye ikima wa yidiga, ya mbo ya gwa nanyi? ²¹ Hene idi nganyi gwa muthu mukima udi mu swega ima mukunda nu mwene hakhenji uvi gwa shi go mvwama gu twama dia Nzambi." ²² Yesu wa lezele alongogi enji egi: " Hene ngu mu mi leza egi, mu di hwi go phashi mukunda nu lujingu lwenu gu ndaga idi mu talela gudia gwenu, gu mwila wenu, nu gu sudiga gwenu. ²³ Mukunda lujingu lwenu lwa balega ima ya gudia, mwila wa balega milele ya gu sudiga. ²⁴ Yindulenu tunjila tutu ikwanga,ya nu kuna go ya nu katula mbuto mu ilanga go. Ishi nu hama nga mikala go ya gu swegela ima, uvi Nzambi wa nu gu idisa. Enwe mudi nu funu ya balega ikwanga! ²⁵ Nanyi mu katshi dienu mu phashi jenji wa jiya gu yiga ata ga tangwa ga moshi gu lujingu lwenji? ²⁶ Gula mwa jiyile gu kita gima gia nganyi go mukunda nu ikhi mudi mu di hwa phashi gu ndaga jiko? ²⁷ Talenu phila mwangu mu tenu wa nu kula. Wa nu kita ata gisalo go wa nu di tungila milele go. Lulu ngagi, ngu mu mi leza egi ata Salomo, mu lukumu lwenji gwa sudigile go mu phila ya mwangu wene go. ²⁸ Gula Nzambi udi mu sudigisa mwangu wa mu temu udi mu jinga magino nu hamene wa bishidiya ha jigo dia tshiya, keti mudi mu jiya phila khi mba a mi sudigisa, ah yi enwe athu a lukwikilu lwa gabiyo ! ²⁹ Mu kambi go gima gia gudia, nga nu gima gia gunwa enji mu khadi go mu Khenda. ³⁰ Mukunda membo akima a mu thotho ya ha mavu adi mu kamba ima hene shenu udi mu jiya gima mudi nagio funu. ³¹ Uvi kambenu gifumu gienji, nganyi ima ikima mba idi gu mi hwiya ya vula. ³² Mu vi go woma, enwe ivwamena ya mitumba, mukunda Shenu udi nu kiese gia vula ha gu mi hwa gifumu. ³³ Digenu ima yenu mu kaphele a sugami. Dikambelenu ima inyi mba ila gu bola ndo; gimvwama gia gosa mba gila guhwa ndo, ginyi ata nzangi mba gwa phusana go ha gukuya, enji ginyi mba gila gu ngila ukelenge ndo. ³⁴ Mukunda hama hanyi hadi gimvwama gienu, hene hadi mutshima wenu. ³⁵ Malopho enu a leha adi kwate nu thenda jenu enji mwinda yenu ileme tangwa dikima; ³⁶ khalenu gifwa athu adi mu nenga guvutuga gwa yala wa makwela mukunda tangwa eza gula wa kokola, mba adi mu mu kangudila mufulo mu mbala imoshi. ³⁷ Kiese gia vula gwa athu a gisalo, gula fumu wawo weza mu vutuga mba u a sanga adi a gudi londa. Mu masonga, ngu mu mi leza egi, mba udi mu jitshiga lopho dienji dia leha ha thenga yenji, mba u a leza ha gudi tumbiga mu khelelego ya madia hene mba uza mu a hwa madia. ³⁸ Gula fumu wa gisalo weza mu vutuga ha musungidilo dia phipha, nga ndo mu tangwa dia tatu dia gusungidila enji weza mu a sanga adi a gudi londa, athu ene a gisalo mba a khala mu kiese. ³⁹ Jiyenu nji egi, gula fumu wa gisapha udi mu jiya tangwa mba diza nzangi, gwa jiyile go gu bemba gisapha jienji gi kwiyiye. ⁴⁰ Khalenu tangwa dikima mwa di londa mukunda mushi genu mu jiya go tangwa Muna Muthu adi muza." ⁴¹ Phetelo wa zwelele egi: " Fumu keti gingana gigi udi mu tu leza kaka etwe nga nu athu akima?" ⁴² Fumu wa zwelele egi: " Nanyi muthu wa gisalo wa masonga nu gingambi gula fumu wenji wa gisalo wa mu haga ha gu tala athu ako a gisalo ha gu a hwa ga ndambu ga ima ya gudia mu tangwa dia bonga? ⁴³ Kiese gwa muthu wa gisalo yonu fumu ha gu vutuga gwenji mba u mu sanga udi mu kita nganyi. ⁴⁴ Mu masonga ngu mu mi leza egi, mba udi mu mu haga gapita ha gu tala ima yenji ikima." ⁴⁵ Uvi gula muthu wa gisalo wa zwela mu mutshima wenji egi: " Fumu wa suginina ha gu vutuga ", wa yandiga genji gu beta athu a gisalo a mala nu a akhetu, mwene wa di hana genji ha gudia nu gunwa a lauge genji, ⁴⁶ fumu wa muthu yonu wa gisalo mba uza mu vutuga mu gilumbu gi moshi ginyi mwene a hagele mutshima go, mu tangwa dinyi mwene ashi mu jiya go, mba udi mu mu khesa itshidi-itshidi nu gu muhwa gifundo gi moshi mu katshi dia athu a konda masonga. ⁴⁷ Muthu yonu wa gisalo, mu phila a jiya luzolo lwa fumu wenji wa gisalo, gwa londele genji ima go mu phila ya luzolo lwa fumu wenji, mba udi mu beteya nu fimbu gia vula. ⁴⁸ Uvi yonu,gwa mu jiyile mwa bonga go, wa kita ndaga jidi mu lomba ndola, mba udi mu beteya nu fimbu ga ndambu. Mba gu lombeya ima ya vula gwa muthu udi nu ima ya vula, enji mba gu lombeya ima ya vula gwa yonu wa hwiye ima ya vula. ⁴⁹ Nge jile ha gu haga tshiya ha thotho ikima, enji nga tshigina egi tshiya twene tu lemeseye. ⁵⁰ Uvi ngu di nu mbotiga imoshi inyi ngu feto botigiya, ngu mu nengela ti nu tangwa dienji di lunge! ⁵¹ Mudi mu yindula egi nge jile mu bata ngemba haha hoshia mavu? Ndo, ngu mu mi leza egi, idi gu kapha. ⁵² Mukunda katuga lulu ngagi, athu mu tano a gisapha gi moshi mba adi kapha mu tatu khanda mu yadi khanda, nga ndo mu yadi khanda mu tatu. ⁵³ Mba adi mudi kapha, tata khanda munenji wa yala khanda, enji mona yala khanda tata khanda; mama khanda mona mukhetu khanda, nga ndo mona mukhetu khanda mama khanda; mama bokilo wa mukhetu khanda mukajia munenji wa yala khanda nga ndo mukajia munenji wa yala khanda mama bokilo khanda." ⁵⁴ Yesu wa lezele nji gimvuga gia athu egi: " Gula mwa mona tuta dia mvula dia zuga gu khanda ya matotelo a tangwa, mu mbala imoshi, mwa nu zwela egi: " Mvula imoshi i muza mu noga", ya nu salama nganyi. ⁵⁵ Gula muphephe umoshi wa gu khanda ya mbongo wa phuphula mwa nu zwela egi, gizuza gi khala gia vula, ya nu salama nganyi. ⁵⁶ Mwa enya mambo, mudi mu jiya ndaga jidi mu salama hoshia mavu nu gosa, phila khi mushi mu jiya go ndaga jidi mu salama mu tangwa didi? ⁵⁷ Mukunda nu ikhi mushi mu jiya go ndaga jia bonga jidi jenu? ⁵⁸ Tangwa udi muya mu samba gu twama dia nzuji nu mbeni waye, mu njila, sala gingolo-ngolo ha gudi visa nenji, mukunda ale gu gutwala ndo gu twama dia nzuji, nzuji a gu twale gwa galagi ga bologo, galagi ga bologo ga gumbe mu bologo. ⁵⁹ Nga gu leza egi, mba ushi mu zoga hama hene ndo gula wa futile go falanga jikima."