¹ Mu tangwa dinyi, athu ako ejile mu leza Yesu ndaga jia bwile gwa athu a gu Galileya wanyi Pilato a shiyile tangwa a khalele mu hana makapo gwa Nzambi. ² Yesu wa a lezele egi : "Mudi mu yindula egi gula athu a gu Galileya a file nganyi, idi mu leza egi a khalele athu a masumu a gubalega athu akima a gu galileya ? ³ Ndo ! Ngudi gu mi leza egi, gula mwa baludile go mitshima yenu, mba mudi mufwa giteso gi moshi. ⁴ Tala mukunda nu athu kumi-nu-nana wanyi a file tangwa dia bwile inzo ya leha inyi ya khalele phene-phene nu gijiba gia silowe ? Mudi mu yindula egi athu ene a khalele athu a gubalega gubola mu katshi dia athu ako a gu Yelusalemi ? ⁵ Ndo ! Ngudi gu mi leza egi, gula mwa baludile go mitshima yenu, mba mudi mufwa giteso gi moshi. ⁶ Yesu wa zwelele mu gingana egi ; " Gwa khalele muthu mu moshi nu mutshi wenji wa mabundu a fige mu gilanga. Mu tangwa dia gukatula mabundu, mwene we jile ha gukatula mabundu uvi gwa monele go ata gima. ⁷ Fumu wa gilanga wa lezele muthu wenji wa gisalo egi :" gwa balega mvula ji tatu nga nu za ha guzula mabundu a mutshi wuwu, uvi nga nu mona go ata gima. Khesa mutshi wene ! mukunda udi mu katshi dia gilanga phamba-phamba? ⁸ Muthu wa gisalo wa vutudile egi :" Tu bembe mutshi wene mu mvula yiyi, mukunda ngu hage wina mu khelelego, ngu mbe mvindu. ⁹ Gula mutshi wene wa buta mabundu mu mvula idi muza mba ikhala gima gia bonga, uvi gula wene nu gu haga ndo mabundu, mba tudi mu ukhesa. ¹⁰ Gilumbu gi moshi yesu wa khalele mu longa mu inzo ya isambu ya ba yuda, ya khalele mu gilumbu gia shigo. ¹¹ Mukhetu mu moshi wa mbefu wa khalele hene. Mukhetu mwene wa jingile nu gimbefu giene mvula kumi-nu-nana. Gimbefu giene gia katugile gu pheve ya bola, mukhetu mwene gwa khalele go mu mona phila ya gudi maganesa, mukunda gimbefu giene gia mu zolele khumba. ¹² Tangwa Yesu a monele mukhetu mwene, wa mu tamegele, wa mu lezele egi :" Mukhetu eye gimbefu giaye gia beluga. ¹³ Yesu wa mu hagele mago, mu tangwa diene, khumba ya mukhetu mwene ya katugile, enji mukongo wenji wa di tuphudile, wa yandigile gu kumisa Nzambi. ¹⁴ Fumu wa inzo ya isambu wa vile khabu jia vula mukunda nu gu beluga gwa mukhetu yonu mu gilumbu gia shigo. Hene fumu wa inzo ya isambu a vutudile mvutu gwa athu egi:" Gudi nu ilumbu isambano ya gusala gisalo, nu ha guza mu zula gubeluga gwenu uvi mu gilumbu gia shigo ndo " ¹⁵ Fumu Yesu wa hudile fumu wa inzo ya isambu egi : Tala eye muthu wa mbala ji yadi, eye muthu wa mambo ! Mu gilumbu gia shigo, nanyi mu katshi dienu gwa nu zola go ngombe nga phunda yenji mu gizo ha gu itwala gu muta inwe meya ? ¹⁶ Mukhetu yogo, udi Muna Abrami; satana wa mu jitshigile gwa balega mvula kumi -nu-nana, ishigo nu funu ha gu mu jitulula mu shinga jia satana mu gilumbu gia shigo ? ¹⁷ Mbeni jia Yesu jia vile sonyi jia vula mukunda nu mvutu ya hanele Yesu, uvi athu ako a vile kiese ha gumona Yesu mu kita ndaga ya guyituga. ¹⁸ Yesu wa zwelele egi : " Gifumu gia Nzambi gia fwanegesa nu ikhi, enji nga jiya gu fwanegesa Gifumu giene nu ikhi? ¹⁹ Gifumu gia Nzambi gia fwanana nu ga bundu ga mutshi wa mutarde, ga kunyile muthu mu gilanga gienji. Bundu diene dia kitugile mutshi wa koma, tunjila twa tungile yanzu mu thango jia mutshi wene. ²⁰ Yesu wa zwelele nji egi : "Nu ikhi nga jiya gu fwanesa nji Gifumu gia Nzambi? ²¹ Gifumu gia Nzambi gia fwanana nu khishi dia mapha dia nu mba mukhetu ha gu jimbisa phupha ya mapha ya makumi a yadi nu a tano a gilo gu nyima a bembe phupha ivule. ²² Mu njila ya Yelusalemi, Yesu wa khalele mu longa mu membo a koma nu mu membo a gabibila. ²³ Muthu mu moshi wa hudile Yesu egi :" kaka athu gabiyo mba a guluga ?" Yesu wa vutudile egi : ²⁴ Mu haga gingolo-ngolo ha gungila ha mufulo wa zonda mukunda athu a vula mba adi mu phaga ha gungila; uvi mba ashi mu kuwa go. ²⁵ Fumu wa gisapha mba uza ha gu kanga mufulo, mu tangwa diene athu ako mba a batugila honze ; enji mba a yandiga gu kokola ha mufulo nu guzwela egi: " Fumu, Fumu kangula mufulo tu ngile " tangwa didi fumu mba udi mu vutula egi :"ngu shi mu jiya go guma mwa katuga"! ²⁶ Hene mba a vutula egi : ta khalele mudia nu gunwa n'aye hama ha moshi tangwa we jile mu dimbo dietu ha gu tu longa. ²⁷ Mwene mba udi mu vutula egi : " Ngu shi mu jiya go guma mwa katuga ! Katugenu phene-phene nu Eme, enwe athu adi mu kita ndaga jia bola " ²⁸ Mba mu khala mu dila nu gudi sumana ha mazo; tangwa mba mu mona egi Abrami, Izaki, Yakobo nu ba profeta akima mu Gifumu gia Nzambi, uvi enwe mba mudi mu bega honze. ²⁹ Athu mba a katuga gu khanda ya nu zoga tangwa,gu weste, gu norde nu gu sude mba eza mu khala ha mesa a Gifumu gia Nzambi ³⁰ . Mu khala mu jiya egi : athu a suga mba a khala athu a thomo, athu a thomo mba a bwa athu a suga. ³¹ Mu tangwa diene a falisaye ako ejile mu leza Yesu egi :" katuga haha mu dimbo dietu, nda guma gwekha mukunda Elode udi nu ngindu jia gu gushiya ". ³² Yesu egi : "muya mu leze mbwa mukenge inyi egi " mu gilumbu gia magino nu hamene ngudi nu gisalo gia gu kaya pheve jia bola nu gu belula athu, mu gilumbu gia tatu mba ngudi mu manesa gisalo giami " ³³ uvi magino, hamene nu gilumbu gia gu hata hamene mba ngudi mu hata njila yami mukunda idi ya bonga gwa profeta wa Nzambi ha gufwa mu dimbo dia Yelusalemi uvi mu dimbo diko ndo. ³⁴ Yelusalemi, Yelusalemi eye wa nu shiya ba profeta, nu gu sonona athu wanyi a nu tumiya gwa Nzambi maseso ! mbala jia vula nga yindudile ha gu haga athu aye hama ha moshi, mu phila suswa ya nu swega anenji mu maphaphu enji uvi wa tshiginile go ! ³⁵ Tangwa didi dimbo dienu mba di bega hakhadio. Nga mi leza egi mba mu shi mu ngu mona go, ti nu gilumbu ginyi mba mu zwela egi : " Fumu Nzambi a sagumune Muthu yonu udi muza mu jina dia Fumu.