¹ Mu gilumbu gia shigo, Yesu wa yile mudia mu inzo ya fumu wa afalisaye, hene afalisaye ako a khalele mu tala Yesu mwa bonga-bonga. ² Muthu mu moshi wa mago nu malu a jimba we jile mu magana gu twama dia Yesu. ³ Yesu wa hudile alongi a shigo nu afalisaye egi : " keti idi shigo ha gubelula muthu mu gilumbu gia shigo"? ⁴ A vutudile go ata mvutu. Yesu wa kwatele muthu wa gimbefu, wa mu beludile, gu nyima wa lezele muthu mwene ha guvutuga. ⁵ Yesu wa a hudile egi : " Nanyi mu katshi dienu wa jiya gu bemba munenji to ngombe yenji ya bwa mu wina dia meya mu gilumbu gia shigo; kaka mu tangwa diene mba udi mu izola mu wina ata idi mu gilumbu gia shigo? ⁶ Hene a monele go phila ya guhana mvutu. ⁷ Yesu wa monele phila athu a tamegeye ha gudia a khalele mu phona hama ha gukhala ha lukumu, hene Yesu wa a tele gingana egi : ⁸ " Gula wa tamegeya gu fete ya makwela u yigo mu khala hama ha lukumu. Mukunda mbala iko muthu wa gubalega lukumu wa jiya gu tamegeya nji gu fete yene ya makwela. ⁹ Muthu yonu wa mi tamega mba udi muza mu gu leza egi : "bemba hama haha gwa muthu yogu". Sonyi mba jidi gu gukwata mukunda mba udi muya mu khala hama ha konda lukumu. ¹⁰ Gula wa tamegeya gu fete, idi ya bonga ha gukhala hama ha konda lukumu. Mukunda tangwa muthu yonu wa mi tamega weza, mba udi mu gu leza egi :" Futa diami, nda u khale gu twama " nganyi mba udi mu zula lukumu gu meso ya athu mba akhala mudia ha mesa a moshi nu eye. ¹¹ Nzambi mba udi mu bulumwisa muthu yonu udi mu di kandwisa, mba u kandwisa muthu yonu udi mudi bulumwisa. ¹³ Uvi gula wa tshigina gu salesa fete, idi ya bonga ha gutamega athu a konda gima, athu a fwa mago nu malu, nu ifwa meso. ¹⁴ Mba udi mu vwa kiese, mukunda athu wawa mba a monyi go phila ya gu gutamega ha gu gusala giteso gi moshi. Kaka Nzambi mba udi mu gu vutudila, tangwa mba a zugisa athu a bonga wanyi a file mu lukwikilu ". ¹⁵ Muthu mu moshi mu katshi dia wanyi a khalele mudia ha mesa wa vile ndaga ya zwelele Yesu, wa zwelele egi :" Kiese gwa muthu mba udia madia mu Gifumu gia Nzambi ". ¹⁶ Yesu egi : "Muthu mu moshi wa yidigile fete ya koma, wa tamegele athu a vula. ¹⁷ Tangwa dia gudia dia lungile, wa tumile athu enji a gisalo ha gu leza athu a tamegeye egi : " Tangwa dia gudia dia kuwa izenu " ¹⁸ Konso muthu mu katshi dia athu a tamegeye wa vutudile mvutu phila imoshi egi :" phila ya guza ishi go nga buba ! Muthu wa thomo egi : " Nga katuga gu sumba gilanga, ngaya ngu gi tale nga buba a ngu lolule. ¹⁹ Muthu muko egi "nga katuga gu sumba ngombe kumi, ngaya ngu ji phage gula jidi nu ngolo jia gisalo. Nga buba a ngu lolule. ²⁰ Muthu muko nji egi : " Nga katuga gu kwela kaka ilumbu yiyi, hene phila ya guza ishi go. ²¹ Muthu wa gisalo wa vutugile mu hana mvutu gwa fumu wenji wa gisalo phila ndaga jia balegele. Khabu jia vula jia kwatele fumu wenji wa gisalo, hene a lezele muthu wa gisalo egi : " Nda mu phushi ha zando, nu mu ma bala-bala a mu dimbo, ngu batele a sugami, athu a mago nu malu a gifu; nu athu a fwa meso". ²² Muthu wa gisalo wa zogele, wa yile mu kita phila fumu wenji a mu lezele ha gu kita. Gu nyima wa lezele fumu wa gisalo egi, nga katuga gu kita ndaga phila wa tshigina uvi hama ha gukhala hadi kaka ha vula. ²³ Fumu wa lezele muthu wa gisalo egi :"Nda mu njila jia koma, nu jia zonda jia mu mwangu u bangige athu adi mwene ha guza mu zala mu inzo ya fete. ²⁴ Mukunda nga mi leza egi ata muthu mu moshi mu katshi dia athu wanyi nga tamega ha thomo, mba eji go mudia gu fete yami". ²⁵ Wa balumugile mu leza athu a vula a khalele mu mu hata egi : ²⁶ "Gula muthu wa tshigina guza gwa Eme uvi gwa tunyile go Shenji, ginenji, anenji, aphangie'nji a amala nu a akhetu nga lujingu lwenji, wa jiyile go gukhala longogi wami. ²⁷ Muthu yonu mukima wa batele go khulunji yenji ha guza gwa eme gwa jiyile go gu khala mulongogi wami. ²⁸ Nanyi mu katshi dienu gula wa tshigina gutunga gisapha gwa nu khala go ha gu yindula thalo ya gu vula gwa ima adi nayo funu ha gu ilungisa ? ²⁹ Gula wa yandiga gutunga fondasho gu nyima phila ya gu manesa inzo yene gu thugu mba udi mu leleya gwa athu ³⁰ mba a zwela egi : "phila khi muthu yogu a yandigile gutunga gisapha, uvi phila ya gu gi manesa gu thugu". ³¹ Giteso gi moshi gula gudi nu fumu wa tshigina guya mulwa ita nu fumu muko, mba gwa lombi go malongi gula mba u khala wa kuwa nu masuta enji mafunda kumi ha gulwa nu fumu yonu udi nu masuta mafunda makumi -a- yadi? ³² Gula fumu yogu wa mona egi phila ya guya mulwa ita gu thugu mba udi mu tuma ngenji ha guya mu mona fumu yonu muko tangwa adi gwa leha ha gu di visa mu phila ya gu ngidisa ngemba. ³³ Hene gula mwa tshigina gu khala alongogi ami idi mwa bonga mu tune ndaga jienu ji kima. ³⁴ Mungwa udi gima gia bonga, uvi gula wa totesa lengo phila khi ya guvutula lengo diene ? ³⁵ Mungwa wene wa nu bwa gima gia phamba mukunda nu mavu nga mukunda nu madia a mbiji. Wa nu bishidiya honze. Muthu yonu udi nu matshi a gu vila a vwe".