¹ Afutisi a itadi nu athu ako a masumu ejile gwa Yesu ha gu hata malongi enji. ² Afalisaye nu alongi a shigo a khalele mu di bogutila nu gu zwela egi:" Muthu yogu udi mu yamba athu a masumu, nu gudia nawo". ³ Yesu wa tele gingana gigi egi : ⁴ " Nanyi mu katshi dienu gula udi nu mameme enji khama wa totesa dimeme di moshi, mba gwa shi mu bemba go mameme wanyi makumi uvwa nu uvwa mu temu ha guya mukamba dinyi dia totele ti nu gunu mba a di mona? ⁵ Gula wa di mona mba udi mu di bata ha phanga nu kiese. ⁶ Hene gula wa vutuga mu gisapha gienji, mba udi mu tamega mafuta enji nu athu a nu jinga nenji phene-phene ha gu a leza egi: "Gizenu tu vwe kiese mukunda nga mona dimeme diami dinyi dia totele. ⁷ Hene ngudi gu mi leza egi kiese gia vula gia nu khala gosa gula muthu mu moshi wa masumu wa balula mutshima mu katshi dia athu makumi uvwa nu uvwa a bonga a shi go nu funu ya gu balula mitshima. ⁸ To nji mukhetu khi gula udi nu ibende kumi ya mbongo, gula wa totesa gibende gi moshi, mba gwa lemesa go mwinda nu gukomba gisapha mwa bonga ti nu tangwa mba a mona gibende giene? ⁹ Tangwa mba a mona gibende giene, mba udi mu tamega mafuta enji a akhetu nu wanyi a nu jinga nenji phene-phene ha gu a leza egi: "Gizenu tu vwe kiese mukunda nga mona gibende gia mbongo nga totesa". ¹⁰ Hene ngu mu mi leza egi kiese gia vula gia nu khala gwa ba yanjio a Nzambi gula muthu mu moshi wa masumu wa balula mutshima". ¹¹ Yesu wa zwelele nji egi :"Muthu mu moshi wa khalele nu anenji a amala mu yadi, ¹² mona wa galenge wa lezele shenji egi "Tata, ngu hue kapho diami dia gimvwama giaye". Hene a kaphele gimvwama gienji gwa anenji ene. ¹³ Gwa balegele ilumbu ya vula, mona wa galenge wa yile mu dimbo dia leha nu gimvwama gienji, gunu wa manesele mbongo ji kima mu sumba ima inyi ya khalele go nu funu, nu gu manesa mbongo mu lujingu lwa bola. ¹⁴ Tangwa a manesele ima ikima,nzala ya vula ya ngidile mu dimbo diene, ebuna wa yandigile gu khala nu funu ya ima. ¹⁵ Wa yile mu di ngidisa gu gisalo gwa muthu mu moshi wa mu dimbo diene, hene a mu tumile ha gudisa ngulu mu ilanga. ¹⁶ Wa khalele nu funu ya gudia madia a ngulu mukunda ata muthu go wa khalele mu muhwa ima ya gudia. ¹⁷ Tangwa mona yala mwene a yindudile mu mutshima wenji, wa zwelele egi: "Athu a gisalo gia tata adi nu ima ya vula ya gudia, uvi eme ngu mu fwa gu nzala ! ¹⁸ Ngu mu vutuga mu gisapha gia tata, ngu muya ha gu mu leza egi ; " Tata nga salele masumu gu twama dia gosa nu gu twama diaye. ¹⁹ Ngu shi nji go nu phila ya gu tamegeya nga munaye; ngu zule muthu waye wa gisalo". ²⁰ Tangwa diene mona yala wa katugile mu dimbo diene ha guvutuga gwa shenji. Tangwa a khalele gwa leha nu gisapha, shenji wa mu monele ebuna wa vile khenda jia vula wa zudile phushi muya mu mu bwila ha shingo nu gu mu yamba. ²¹ Mona yala wa lezele shenji egi : " Tata nga salele masumu gu twama dia gosa nu gu twama diaye. Ngu shi nji go nu phila ya gutamegeya nga munaye". ²² Shenji wa lezele athu enji a gisalo egi : "Ngu batelenu mu phushi mvwela ya bonga mu mu sudige, enji mu sudigenu luphete gu munwe, nu maphapha gu malu. ²³ Batenu muna ngombe ya mafuta mu shiye, tu die tu sale fete. ²⁴ Mukunda munami yogu wa khalele wa fwa, henyaha wa vutuga mu lujingu. Wa khalele wa gu tota henyaha wa monega". A yandigile gu sala fete ²⁵ Mu tangwa diene a khalele mu sale fete, mbutenji wa khalele gu gilanga. Tangwa a khalele muza mu vutuga wa kumile phene-phene nu inzo, wa vile makelele a ngoma nu athu a khalele mu kina. ²⁶ Wa tamegele muthu mu moshi wa gisalo wa mu hudile gikuma gia ndaga jia khalele mu balega. ²⁷ Muthu wa gisalo wa mu lezele egi : " Phangiaye weza mu vutuga mu inzo hene shaye a shiya muna ngombe ya mafuta mukunda phangiaye weza mu vutuga konda gima gu mwila ". ²⁸ Mona wa mbuta wa vile khabu jia vula wa tunyile nu ha gu ngila mu inzo, uvi shenji wa zogele ha gu mu zonza. ²⁹ Mona wa mbuta wa vutudile gwa shenji egi :Tala gwa balega mvula jia vula nga nu gu salela gisalo, khanji ngu tuna go shigo yaye ata mbala imoshi, uvi khanji wa zudile go ngindu jia gu ngu hwa muna khombo ngu shiye tudie nu mafuta ami, ³⁰ uvi munaye yogu wa manesele ima yaye ikima nu akhetu a ndumbu weza mu vutuga eye wa shiya muna ngombe ya mafuta mukunda nu mwene. ³¹ Shenji wa mu vutudile egi : " Munami, ta nu khala n'aye haha ilumbu ikima ima yami ikima idi yaye. ³² Ya khala nu funu ha gusala fete nu guvwa kiese mukunda phangi'aye yogu wa file uvi henyaha wa vutuga mu lujingu; wa totele henyaha wa monega".