¹ A zugile khungiawo akima, hene a mu batele gwa Pilato. ² A yandigile gu mu funda, egi: " Ta sangi muthu yogu mu bata mavanga mu dimbo dietu, udi mu tunyisa athu ha gufuta gitadi gia sezare, enji wa khalele mu zwela mwene hakhenji egi udi Kilisto, fumu." ³ Pilato wa mu hudile egi: " Keti udi wa fumu wa ba yuda?" Yesu wa vutudile egi: " Eye udi mu zwela." ⁴ Pilato wa lezele mafumu a nganga-nzambi nu gimvuga gia athu egi: " Ngu shi gami mu mona gwa muthu yogu gima gia bola." ⁵ Uvi a shishigishile egi: " Udi mu bata mavanga mu katshi dia athu, nu gu longa malongi mu yudeya ikima, katuga gu Galileya, gunu a yandigile ti nu haha." ⁶ Tangwa pilato a vile nganyi, wa hudile gula muthu mwene udi mwenya gu Galileya. ⁷ Ha guvwa egi udi muthu wa mu mavu a Elode, wa mu tumile gwa Elode, wa khalele nu mwene gu Yelusalemi mu ilumbu yene. ⁸ Tangwa Elode a monele Yesu,wa vile kiese gia vula, mukunda katuga mwa leha, wa khalele nu funu ya gu mu mona, mukunda nu ndaga jia vula a vile mukunda nu mwene, enji wa khalele mu yindula ha gu mona mu kita ndambu jia idimbu ya khumbwa. ⁹ Wa mu hudile mihu ya vula, uvi yesu gwa mu vutudile go ata gima. ¹⁰ Mafumu a nganga-nzambi nu alongi a shigo a maganele hene, enji a khalele gu mu funda nu gingolongolo gikima. ¹¹ Elode nu masut'enji, a mu shinganele, hene gu nyima ya gu mu lela nu gu mu sudiga mulele umoshi wa banga, a mu tumile gwa Pilato. ¹² Elode nu Pilato a bwile gilumbu giene ginyi mafuta,(mukunda gu twama a khalele mbeni). ¹³ Pilato, wa bungishile mafumu, nu ma nzuji, nu athu, ¹⁴ wa a lezele egi: " Mwa ngu batela muthu yogu egi wanu bata mavanga mu katshi dia athu. Lulu ngagi nga mu hula mihu gu twama dienu, nga mu monele go ata nu gifu mu ndaga mudi mu mu fundila. ¹⁵ Elode nji gwa monele go ata gima gia bola gi mudi gu mu fundila ha gu mu kwatesa a shiyiye. ¹⁶ Hene ngu mu mu hwa ndola gu nyima ngu mu bembe." ¹⁷ (Pilato wa khadi nu ya gu bembela ba yuda mwenya bologo mu moshi mukunda nu khinji). ¹⁸ Uvi a kabugile khungiawo akima mu ngololo egi: " Tu bembele muthu yogu, tu zolele Balanabasi." ¹⁹ Balanabasi wa khalele muthu mu moshi wa mbiye mu bologo mukunda nu mubulu a zolele mu katshi dia dimbo, nu phila a shiyile athu. ²⁰ Pilato wa a lezele nji mu ngindu jia gu bemba Yesu. ²¹ Hene a kabugile mu ngololo egi: " Mu hage holo dia mutshi! holo dia mutshi !" ²² Wa a hudile mu mbala ya gitatu egi : " Gima khi gia bola a kiti? Nga monele go ata gia bola gia feto fila. Ngu mu mu bemba, gu nyima ya gu mu hwa ndola." ²³ Uvi a shishigishile mu ngololo, nu gu lomba egi a hageye holo dia khulunji. Hene gukabuga gwawo gwa balegele giteso. ²⁴ Pilato wa zudile lukhanu ha gu lungisa ndaga a khalele mu tshigina. ²⁵ Wa bembele yonu wa mbiye mu bologo mukunda nu mubulu nu phila a shiyile athu, mu phila a lombele. Hene a hanele Yesu mu phila ya luzolo lwawo. ²⁶ Mu phila a khalele mu mu bata, a kwatele Simoni muthu wa gu sirenia, wa katugile gu gilanga, hene a mu bangigile ha gubata khulunji, gu nyima dia yesu. ²⁷ Gibuga gia vula gia athu gia khalele mu hata enji akhetu a khalele mu dila nu gu boguta mukunda nu mwene. ²⁸ Yesu wa balumugile gu nyima diawo wa zwelele egi: " Akhetu a gu yelusalemi, mu ngu didi go, uvi dilenu mukunda nu enwe nu anenu. ²⁹ Mukunda , ilumbu idi muza mba a zwela egi: " Kiese gia vula gwa akhetu wanyi adi ikunia, nu wanyi khanji a buta gale go, nu wanyi khanji a nwisa gale ana mayele go! " ³⁰ Hene mba adi mu yandiga gu leza milundu egi: " Tu bwilenu " gwa twana tu milundu egi: " Tu tshigenu " ³¹ Mukunda, gula ndaga ya nganyi ya kitiya gu mutshi wa gibisu, ikhi mba i kitiya gu mutshi wa uma?" ³² Athu ako, matabi muyadi a bateye ha gu shiyiya. ³³ Tangwa a kumile hama hanyi ha nu tamegeya egi ha" gifwa gia ha mbombo", a mu hagele hene ha khulunji nu matabi muyadi, mu moshi gu koko dia madia muko gu koko dia gikhetu. ³⁴ Yesu wa zwelele egi: " Tata, a file khenda, mukunda a shi mu jiya go ikhi adi mu kita." A kaphele milele yenji, gu nyima ya guta ubwadi. ³⁵ Athu a maganele hene, nu gutala mu phila ma nzuji a khalele mu mu lela, nu gu zwela egi: " Wa gulushile athu ako. Gula udi mesiya wa katugile gwa Nzambi, muthu wa phoneye gwa Nzambi, adi guluse mwene hakhenji." ³⁶ Nu masuta a khalele mu mu lela, nu gu phusana phene-phene nenji ha gu muhwa vinu dia khadi- khadi, ³⁷ a khalele mu zwela egi: " Gula udi wa fumu wa ba yuda, di guluse eye ha khaye." ³⁸ Hene, holo dia mutwe wenji a sonegele egi; " Yogu udi fumu wa ba yuda." ³⁹ Tabi mu moshi wa hageya ha khulunji wa khalele mu shingana nu gu zwela egi: " Keti ushi go wa Kilisto? Di guluse eye ha khaye, u tu guluse netwe." ⁴⁰ Uvi yonu muko wa mu bolomwele nu gu zwela egi: " Ushi mu banga go Nzambi, eye wa zula ndola ya giteso gi moshi? ⁴¹ Mukunda netwe, idi masonga, mukunda ta zula ndola ya gubola gwetu. Uvi muthu yogu gwa kitile go ata gima gia bola." ⁴² Hene wa lezele yesu egi: " Ngu tangize, tangwa mba uza mu vutuga mu gifumu giaye." ⁴³ Yesu wa mu vutudile egi: " Ngu mu gu leza mu masonga egi magino, u mu khala N'eme gu phaladisu." ⁴⁴ Ya khalele mu tangwa dia sambano, phipha ya bwile mu thotho ikima; ti nu mu tangwa dia uvwa, ⁴⁵ tangwa dia bwile fefete, enji mulele wa mu inzo nzambi wa taugile ha katshi-katshi. ⁴⁶ Yesu wa kabugile mu ndinga ya ngolo egi: " Tata, nga vutula monio wami ha mago aye." Gu nyima ya gu zwela nganyi, wa batudile monio. ⁴⁷ Suta wa khalele mu langidila, ha gumona nganyi, wa hanele lukumu gwa Nzambi, enji wa zwelele egi: " Ya kielega, muthu yogu udi wa hamakhidia." ⁴⁸ Athu wanyi akima a khalele hene, ha gu mona nganyi, adi zungile, nu gudi tuta ha mutshima. ⁴⁹ Athu wanyi a khalele mu jiya yesu, nu akhetu wanyi a mu hatele katuga gu galileya, a maganele gwa leha mu tala ndaga jene. ⁵⁰ Gwa, khalele nu muthu mu moshi jina dienji Yozefi wa khalele muthu wa gimvuga giawo, muthu wa masonga, ⁵¹ ( gwa tshiginile genji go lukhanu lwawo nu ndaga gia athu ako), wa khalele mwenia gu Arimateya, dimbo dia ba yuda, wa khalele mu nenga Gifumu gia Nzambi. ⁵² Muthu mwene wa yile gwa Pilato, wa mu lombele mwila wa yesu. ⁵³ Wa u bulumwishile, wa u langele ha mulele wa lino, enji wa u fundule gu majiamo a hageye mu katshi dia seso, gunu ata muthu gwa fundiye go. ⁵⁴ Ya khalele mu gilumbu gia gudi londa, mukunda gilumbu gia gu hima gia yandigile. ⁵⁵ Akhetu ejile gu Galileya nu yesu a hatele Yozefi, a monele majiamo nu phila mwila wa yesu wa tumbigiye, ⁵⁶ ha gu vutuga gwawo, a londele mafuta nu mananashi. Hene a hululugile mu gilumbu gia gu hima mu phila ya shigo.