¹ Mu gilumbu gia thomo gia phoso, akhetu a yile gu majiamo nu gikhela gikhela, a batele mafuta wanyi a londele. ² A sangele seso dia hungudiye gu twama dia majiamo. ³ Tangwa a ngidile, a monele go mwila wa Fumu Yesu. ⁴ A bwile tunga tunga ha gu mona ndaga yene hene mu gisagumwisa, amala muyadi a maganele mu khulo yawo nu milele ya phelegeta. ⁵ Mu phila akhetu a khalele nu woma, a shiwudile meso hoshi, hene a a lezele egi: " Mukunda nu khi mudi mu kamba muthu wa monio mu katshi dia athu a fwa? ⁶ Gwa shi go haha, uvi wa futumuga. Indulenu phila a khalele gu mi leza, tangwa a khalele gu Galileya, ⁷ wa mi lezele egi: " Muna muthu mba u haneya ha mago a athu a masumu,ha gu hageya ha khulunji, mba u futumuga mu gilumbu gia gitatu." ⁸ Akhetu a yindudile ndaga jene, hene a katugile gu majiamo. ⁹ A yile mu ta ndaga yene gwa alongogi kumi nu mu moshi nu gwa athu ako. ¹⁰ Wanyi a tele ndaga yene gwa alongogi a khalele Mariya mwenia gu Magadala, jeanne, Mariya gina Zake, nu akhetu ako a khalele nawo. ¹¹ Uvi ndaga yene ya khalele ule ya mambo gwa alongogi, hene a kwikile go akhetu. ¹² Uvi Phetelo wa zugile, wa yile mu phushi gu majiamo. Wa fugamele ha gutala, wa monele mwene hakhenji milele ya lino. Phetelo wa vutugile gumbo dienji, nu gudi hula ndaga phila ya salamele. ¹³ Tala hene heniani,mu gilumbu giene, muyadi mu katshi diawo a khalele muya gu dimbo di moshi dia nu tamegeya egi Emmausu, ha gitaminu gia makumi a sambano a ilometelo nu Yelusalemi. ¹⁴ A khalele muya mu solula gu ndaga ya bwile. ¹⁵ Mu phila a khalele muya mu solula nu gudi hula mihu, Yesu mwene hakhenji wa a phusanele hene a yandigile guya nawo njila imoshi. ¹⁶ Uvi meso awo a asalesele go ha gu mu jiya. ¹⁷ Yesu wa a hudile egi: " Ndaga khi mudi mu zwela enwe muyadi mu njila?" A maganele mu molu nu khenda jikima. ¹⁸ Mu moshi mu katshi diawo, jina dienji Kilofase, wa mu vutudile egi: " Udi eye hakhaye, udi mu jinga gu Yelusalemi ushi mu jiya go ndaga ya balega ilumbu yiyi ?" ¹⁹ " Ndaga khi ?" mu phila yesu a a hudile. A mu vutudile egi: " Ndaga jidi mu talela Yesu mwenia gu Nazareti, yonu wa khalele profeta wa ngolo mu idimbu nu mu ndinga gu twama dia Nzambi nu gu twama dia athu, ²⁰ ha gu mona phila mafumu a nganga-nzambi nu mambuta a mu hanele ha gu shiyiya hene a mu hagele ha khulunji. ²¹ Ta khalele mu yindula egi mwene mba u gulusa Isalele. Eya, enji mu khanda ya ima yiyi ikima, magino gilumbu gia gitatu katuga ndaga jene jia balegele. ²² Uvi nji akhetu ako a mu katshi dietu, a tu yitugisa, mu tangwa a yile nu gikhela gikhela gu majiamo. ²³ Mu phila a monele go mwila wa yesu, ejile mu zwela egi ma wanjio a azogela mu gisagumwisa hene a zwedi egi udi nu monio. ²⁴ Athu ako a mu katshi dietu a yile gu majiamo, hene a monele ndaga mu phila akhetu a zwelele. Uvi mwene, a mu monele go." ²⁵ Hene Yesu a alezele egi: " Enwe mala a konda ngangu,enji mutshima ushi go mu kwikila mu phushi ndaga jia zwelele ba profeta! ²⁶ Ya khalele ya bonga Kilisto a mone phashi, ha gu ngila mu khembo ?" ²⁷ Hene yandiga gwa Moyize nu gwa ba profeta akima, wa yandigile gu a tendudila ndaga jia sonegeye gu ndaga ya mu talele. ²⁸ Tangwa a kumile phene-phene nu dimbo khalele muya, Yesu wa kitile masunga ha gumona egi wa tshigina guya ha leha ²⁹ . Uvi a mu sasugishile nu gu zwela egi: " Bega netwe, mukunda gingweze giabwa phembeni gilumbu gidi ha suga." Hene Yesu a ngidile ha gubega nawo. ³⁰ Tangwa a khalele nawo ha mesa, wa zudile dipha gu nyima ya gu hana matondo, wadi khesele wa a hwile nadio. ³¹ Hene meso awo a kangugile enji a mu jiyile, uvi wa totele gu twama diawo. ³² Hene adi zwelele ene nu ene egi; " Mutshima wetu wa khalele mu phanzana go mu katshi diawo tangwa ta khala mu solula nenji mu njila mu phila a khala mu tu tendudila ndaga jia sonegeye?" ³³ Tangwa a zugile kaka hene heniani a vutugile gu Yelusalemi, enji a sangele kumi nu mumoshi, nu wanyi adi bungishile nawo ³⁴ a zwelele egi: " Fumu wa futumuga ya makhidia enji wadi monesa gwa Simoni." ³⁵ Hene a tele ndaga mu phila ya balegele mu njila, nu phila Yesu adi monesele tangwa a khesele dipha gitshidi gitshidi. ³⁶ Mu phila a khalele mu zwela mukunda nu ndaga yene, yesu mwene hakhenji wadi monesele mu katshi diawo, wa a lezele egi: " Ngemba ikhale mu katshi dienu!" ³⁷ Uvi a khalele a zala nu woma, mukunda a yindudile egi a monyi pheve. ³⁸ Yesu wa a lezele egi: " Mukunda nu khi mudi mudi yangisa, enji mukunda nu khi mihu idi mu zuga yene ha khayo mu mitshima yenu? ³⁹ Talenu mago ami nu malu ami, yogu udi eme gibeni. Ngu kwatenu mu mone. Pheve ya nu khala nu musunyi go nga nu mukuwa go, mu phila mudi mu ngu mona nayo." ⁴⁰ Hene ha gu zwela nganyi, wa a lezele mago enji nu malu ⁴¹ Tangwa a khalele a konda lukwikilu uvi mu kiese nu gudi hula, yesu wa a lezele egi: " Keti mudi nu gima gia gudia?" ⁴² A mu hwile jiswi jia gu kalanga. ⁴³ Yesu wa zudile hene a dile gu twama diawo. ⁴⁴ Wa a lezele egi: " Jiji ndaga nga khalele gu mi leza, tangwa nga khalele nenu, nga mi lezele egi ndaga jiji jikima mba jidi mu salama mu phila ya sonegeye gu mukanda wa shigo wa Moyize, nu mu mikanda ya ba profeta nu mu mikanda ya khunga." ⁴⁵ Hene wa a kangudile mabanza, mu phila egi a bagise ndaga jia sonegeye gu mikanda. ⁴⁶ Wa a lezele egi: " Ndaga jinyi jia sonegeye gu mukunda egi Kilisto mba udi mu mona phashi, gu nyima mba u futumuga gu lufwa mu gilumbu gia tatu. ⁴⁷ Gu nyima gubalula gwa mitshima nu gu lomba khenda jia masumu mba gudi mu longeya mu gifutshi gikima, yandiga gu Yelusalemi. ⁴⁸ Mudi mwa themwe jia ndaga jiji. ⁴⁹ Eme hakhami mba ngu mu mi tumila gima ginyi Shami a hanele laji ha gu mihwa. Uvi enwe, mu bega mu dimbo tii nu gunu mba mu zula ngolo mba ji Katuga Gosa." ⁵⁰ Gu nyima Yesu wa a batele gu khanda ya mulundu wa gu Betaniya. Mu phila a tuphudile mago gosa, wa a sagumunile. ⁵¹ Tangwa a khalele mu a sagumuna, wa a bembele ebuna wa kandwishiye gosa. ⁵² Hene gu nyima ya gu mu hwa lukumu, a vutugile gu Yelusalemi nu kiese gia vula. ⁵³ A khalele mu bega mu inzo ya isambu ilumbu ikima, ha guhwa Nzambi lukumu.