¹ Khinji ya mapha a konda khishi, ya nu tamegeya egi phage ya phusanele. ² Mafumu a nganga-Nzambi nu alongi a shigo a khalele mu kamba phila ya gu shiya yesu, uvi a khalele mu banga athu. ³ Satana wa ngidile mu mutshima wa yudasi isikaliote, mu moshi mu katshi dia kumi nu muyadi. ⁴ Yudasi wa yile mudi visa nu mafumu a nganga-nzambi nu fumu wa nu tala wanyi a nu bandemena ha gu tala phila ya gu a hwa yesu. ⁵ A vile kiese enji adi vishile ha gu mu hwa falanga. ⁶ Wa tshiginile hene a yandigile gu kamba phila imoshi ya bonga ha gu hana yesu konda athu a jiye. ⁷ Mu gilumbu gia khinji ya mapha a konda khishi gilumbu gia gu shiya dimeme dia phage gia lungile. ⁸ Yesu wa tumile piele nu yowani wa a lezele egi: " Gindenu mu yidige madia a phage mukunda ta mbo dia." ⁹ A mu lezele egi : "Gwi wa tshigina egi tuye tu yidige?" ¹⁰ Wa a vutudile egi: " Venu, tangwa mu ngila mu katshi dia dimbo, muthu mu moshi yonu mba ukhala wa bata bungu dia meya mba mu tagana nawo. Mu hatenu mu inzo mba aya mu ngila. ¹¹ Mba mu leza fumia inzo yene egi: " longi wa gu hula egi: " Gwi gudi sugu nga mbo dila phage nu alongogi ami? ¹² Mba udi mu mi leza sugu imoshi ya koma ya gosa yinyi idi nu ima ikima. Gwene mu yidiga ndaga jikima." ¹³ A yile a sangele ndaga mu phila mwene a alezele. Hene a yidigile madia a phage. ¹⁴ Tangwa dia lungile, wadi tumbigile nu alongogi. ¹⁵ Wa a lezele egi: " Nga tshigina ha gudia nenu madia a phage gu twama dia gumona phashi. ¹⁶ Mukunda ngu mu mi leza egi, mba ngu shi nji mudia madia wawa go ti nu mba gu ilungisama mu gifumu gia Nzambi." ¹⁷ Gu nyima, Yesu wa zudile kopho, tangwa a vutudile matondo, wa zwelele egi: " Zulenu mudi kaphele mu katshi dienu. ¹⁸ Mukunda, ngu mu mi leza egi, mba ngu shi nji mu nwa go vinu dia bundu didi, ti nu tangwa gifumu gia Nzambi mba giza." ¹⁹ Gu nyima, wa zangudile dipha, tangwa a vutudile matondo, wa di batudile mu itshidi, enji wa a hwile nu gu zwela egi: " wuwu mwila wami wa mi hwiya. Mu khala mu kita ngagi ha gu ngu tangiza." ²⁰ Giteso gi moshi, gu nyima ya gudia, wa zudile kopho wa zwelele egi: " didi kopho didi gudivisa gwa pha mu menga ami a bishidiya mukunda nu enwe. ²¹ Uvi di kebenu, yonu udi mu ngu yegula udi n'eme ha mesa. ²² Mukunda Muna Muthu udi muya mu phila ndaga ya kaneseye. Uvi phashi gwa muthu yonu wa mu yegula!" ²³ Hene a yandigile gudi hula ene nu ene gula nanyi mu katshi diawo wa jiya gu kita ndaga yene. ²⁴ Gwa zogele mu katshi diawo thembe jia vula ha gu jiya nanyi mu katshi diawo wanu zangudiya mbuta. ²⁵ Wa a lezele egi: " mafumu a maphagano a nu di monesa, wanyi adi nu giyega holu diawo a nu tamegeya egi athu a lukumu. ²⁶ Uvi mba ishi mu khala nganyi go mukunda nu enwe. Yonu udi mbuta mu katshi dienu a khale ule galenge. Enji yonu udi muthu wa lukumu a kituge ule muthu udi mu mi salela. ²⁷ Mukunda nanyi udi mbuta: yonu udi ha mesa to yonu udi mu sala? Ishi go yonu udi ha mesa? Haha, ngudi mu katshi dienu ule yonu udi mu mi salela. ²⁸ Uvi enwe mudi wanyi a kolesele nu eme mu phashi jiami. ²⁹ Nga mi hwa gifumu giami, mu phila shami a ngu hwile gifumu ³⁰ mu phila egi mu die nu gunwa ha mesa ami mu gifumu giami. Enji mukunda mudi tumbige ha ife mukunda nu gu sambesa ikanda kumi nu iyadi ya gu isalele. ³¹ Simoni, simoni,di kebe, satana wa lo,bi ha gu guzula mukunda a gu balegese ha muyingulu mu phila ya nu yingudiya khenyi jia bule. ³² Uvi eme nga gu lombela mu phila egi gukwikila gwaye gu khale gwa magana. Gu nyima ya gudi jiya longesela a phangiaye." ³³ Phetelo wa mu lezele egi: "Fumu, ngudi phembeni ha guya naye nga mu bologo nga gu lufwa." ³⁴ yesu wa zwelele egi : " Phetelo, nga gu leza egi, gu twama kolombolo di dile magino udi mu ngu tuna mbala jitatu egi u ngu jiya go." ³⁵ Wa a lezele nji egi: " Tangwa nga mi tumile ya konda gu mi hwa gima; ya konda gikuta gia ima ya gudia ndo enji ya konda saphatu , keti mwa kondele ata gima?" Ene a vutudile egi: " Ndo sha." ³⁶ Wa a lezele nji egi: " Uvi lulu ngagi, yonu udi nu gima a gi zule yonu nji udi nu gikuta a gi zule. Yonu gwa shi go nu phogo ya khusa a dige mulele a sumbe phogo ya khusa. ³⁷ Mukunda ngu mu mi leza egi, ndaga inyi ya sonegeye mukunda nu eme i feto lungisama: egi " udi wa fwanana nu muthu yonu gwa jiya shigo ndo." ³⁸ A zwelele egi: " Mwatha, tala phogo jia khusa ji yadi jiji." Mwene wa a lezele egi: " Gwa suga ." ³⁹ Gu nyima ya gudia, Yesu wa yile mu phila ya gifu gienji, gu mulundu wa mitshi ya ba olive, a longogi enji a mu hatele. ⁴⁰ Tangwa a kumile gwene, wa a lezele egi: " sambenu mukunda mule gubwa mu njila jia bola go." ⁴¹ Hene mwene a phusanele ha ga ginano ga thambo di moshi dia seso wa fugamele ha mabongo, wa sambele nu gu ⁴² zwela egi: "Tata, gula wa tshigina, katula kopho didi gu twama diami. Ishi go mu luzolo lwami, uvi lwaye lu salame." ⁴³ Hene wanjio mu moshi wa katugile gosa wa mu zogele ha gu mu hwa gikhesa. ⁴⁴ Mu phila a khalele mu tonga ha gu zenza monyo, wa sambele nu gukwikila gwa vula hene tugutshila dienji dia kitugile ule matonji a koma a menga a yandigile gu nosa hoshi mu mavu. ⁴⁵ Tangwa a manesele gisambu gienji, we jile mu vutuga gwa alongogi, wa a sangele gu tulo mukunda nu khenda jiawo ⁴⁶ wa a hudile egi: " mukunda nu khi mudi gu tulo? Zugenu mu sambe mukunda mule gubwa ndo mu ndaga jia bola." ⁴⁷ Tangwa a khalele mu zwela, tala gibuga gi moshi gie jile nu Yudasi, mu moshi mu katshi dia kumi nu muyadi we jile mu a twameza. Wa phusanele gwa yesu ha gu mu hwa beze, ⁴⁸ uvi yesu wa mu lezele egi: " Yudasi, mukunda nu beze wa yegula Muna Muthu?" ⁴⁹ Tangwa wanyi a khalele mu lwega lwa yesu a monele ndaga phila ya balegele, a zwelele egi: " Fumu, tu beta nu phogo ya khusa?" ⁵⁰ Hene mu moshi mu katshi diawo wa betele muthu wa gisalo wa fumu wa nganga-nzambi, wa mu batudile watshi wa koko dia madia. ⁵¹ Yesu wa zwelele egi : " Gwa suga, bemba!" Hene a kwatele watshi yene wa mu beludile. ⁵² Yesu wa lezele nji mafumu a nganga-nzambi, nu mafumu a inzo ya isambu nu mambuta wanyi ejile ha gu mu kwata egi: " Mweza ule ha gu kwata tabi mwenya mubulu nu phogo jia khusa nu itshidi ya mitshi? ⁵³ Tangwa nga khalele nenu ilumbu ikima mu inzo ya isambu, mwa tuphudile go koko ha gu ngu kwata. Uvi didi tangwa dienu, tangwa dinyi dia ngolo jia mu phipha." ⁵⁴ A mu kwatele, a mu batele nu gu mu twameza mu inzo ya fumu wa nganga-nzambi. Uvi phetelo wa hatele gwa leha leha. ⁵⁵ Gu nyima ya gu yiga tshiya mu katshi dia mbandanzo a di tumbigile khungiawo akima, phetelo nji we jile mudi tumbiga mu katshi diawo. ⁵⁶ Mona gisalo mu moshi wa mukhetu wa mu monele mu phila adi tumbigile gu mweji wa tshiya, wa mu nongele sha meso hene a zwelele egi :" Muthu yogu wa khalele nawo." ⁵⁷ Uvi phetelo wa tunyile nu gu zwela egi : " Mukhetu, ngu shi gami gu mu jiya go." ⁵⁸ Gu nyima, muthu muko wa mu monele wa zwelele egi: " Neye nji udi mu moshi mu katshi diawo." Uvi phetelo wa zwelele egi : " Yala, ngu shi gami nga muthu wawo go." ⁵⁹ Gwa balegele giteso gia tangwa di moshi, muthu muko wa zwelele egi: " Ya kielega, muthu yogu wa khalele nawo mukunda udi mwanya gu galileya. ⁶⁰ Phetelo wa vutudile egi : " Yala, ngu shi mu jiya go ikhi udi mu zwela." Kaka hene henyanyi, mu phila a khalele mu zwela, kolombolo dia didile. ⁶¹ Fumu, mu phila a baludile, wa telele phetelo. Hene phetelo a yindudile ndaga inyi fumu a mu lezele egi: " Gu twama kolombolo di dile magino, udi mu ngu tuna mbala jitatu." ⁶² Mu phila a zogele honze, wa didile mwa vula. ⁶³ Athu wanyi a batele yesu a yandigile gu mu lela nu gu mu beta. ⁶⁴ Gu nyima ya gu mu batega gu meso, a yandigile gu mu hula egi: " Tondolola! Nanyi wa gu beta?" ⁶⁵ A zwelele ndaga jiko jia gu mu vweza. ⁶⁶ Hene henyanyi guma gwa kiele, gibuga gia mambuta a gimvuga gia athu, nu mafumu a nganga-nzambi ,nu a longi a shigo adi bungishile. A batele yesu ha mbaji yawo hene ⁶⁷ a zwelele egi: " Gula udi wa Kilisto tu leze. " Uvi mwene wa a vutudile egi : ⁶⁸ " Gula nga mi leza, mushi mu kwikila go enji gula nga mi hula, mwa mbo hana mvutu go. ⁶⁹ Jiyenu egi, Muna Muthu mba udi tumbiga gu koko dia madia dia ngolo jia Nzambi. ⁷⁰ A zwelele khungiawo akima egi: " Udi wa Muna Nzambi?" Mwene wa a vutudile egi: " Enwe mwa zwela, ngudi nganyi." ⁷¹ Hene a zwelele egi: " Keti twa jiya nji gu kamba themwe ? Mukunda twa di vila ha khetu mu kano wenji. "