¹ Yesu, tangwa a thuphudile meso wa monele mvwama jia khalele mu mba makapho mu mulongo. ² Wa monele nji mufidi mu moshi, wa hanele tu ibende tuyadi twa falanga. ³ Hene a zwelele egi: " Mu masonga, ngu mu mi leza egi, mukwetu yogu wa mufidi wa hanyi ya gubalega athu akima. ⁴ Wawa ako a zudi ga ndambu ha gu hana makapho. Uvi mukhetu yogu , wa mufidi wa hana yinyi ikima a khala nayo mukunda nu lujingu lwenji." ⁵ Mu phila athu ako a khalele mu zwela mu ndaga ya talele inzo ya isambu, mu phila ya shangudiye nu maseso a bonga nu makapho, a zwelele egi: ⁶ " Gu ima yiyi mudi mu mona, mu ilumbu idi muza, mba gushi mu bega go seso holo dia seso." ⁷ A mu hudile egi: " Longi tangwa khi ndaga jiene mba ji salama? Enji gidimbu khi mba gi leza tangwa ndaga jiene mba ji salama?" ⁸ Yesu wa vutudile egi: " Mu keba mu phila egi mu dimbiya go. Mukunda a vula mba eza mu jina diami, nu gu zwela egi: " Idi eme enji tangwa dia phusana, mu a hati go." ⁹ Mba mudi muvwa ndaga jia ita nu bulu-bulu, mba mu yituga go, mukunda ndaga jiji mba jidi mu diangela, uvi mba ishi mu khala go suga hene henyanyi." ¹⁰ Wa a lezele nji egi: " Dimbo mba di lwisa dimbo diko, gifumu nu gifumu giko. ¹¹ Mba gu khala nu gu nyigana gwa koma gwa mavu, mu ifundo iko ya vula, nzala mba ikhala nu gimbefu gia bola. Mba gu khala ndaga jia phila nu phila, enji idimbu ya koma mba idi mu monega gosa. ¹² Uvi, gu twama ndaga jiene ji salame, mba mudi mu hageya mago, mba mu moneseya phashi jia vula, mba mudi mu bateya mu jinzo jia isambu, mba mudi mu mbiya mu bologo, mba mudi mu bateya gu twama dia mafumu nu gwa mafumu a giziunga mukunda nu jina diami. ¹³ Nganyi mba mudi mu mona phila ya guta gi themwe giami. ¹⁴ Nganyi mba mu yindula go gu mitshima yenu ndaga jia gu nunga gwenu ¹⁵ mukunda mba ngu di gu mi hwa ungambi wa gu zwelela mu phila egi ata mbeni jienu mba ji monyi phila ya gutuna ndaga jienu. ¹⁶ Uvi, a shenu mba adi mu mi hana, nu a phangienu, nu athu a mu mbandanzo, nu mafutenu, enji mba adi mu shiya a vula mu katshi dienu. ¹⁷ Mba mudi mu yegudiya gwa athu akima mukunda nu jina diami. ¹⁸ Uvi mba gu toti go ata lusigu lu moshi gu mitwe yenu. ¹⁹ Mukunda nu gukolesela, mba mu totesa go mionio yenu. ²⁰ Tangwa mba mu mona yelusalemi ya jeteseya nu mata, jiyenu egi guphanzeya gwenji gudi phene-phene. ²¹ Hene wanyi mba akhala gu yudeya mba alenga mu milundu, wanyi mba a khala mu membo a koma mba adi mu katuga, wanyi mba a khala mu membo a phene-phene mba a ngila go. ²² Mukunda mba ikhala ilumbu ya guvutula mbela ha gulungisama gwa ndaga yinyi ya sonegeye. ²³ Khenda jia vula gwa akhetu wanyi mba a khala gu mavumo nu wanyi mba a khala mu nwisa mu ilumbu yene! Mukunda mba gu khala nu phashi jia gu balega giteso mu thotho ikima, nu khabu gwa athu. ²⁴ Mba adi mu nameneseya gu mazo a phogo, mba adi mu bateya mu gihiga mu membo ako, yelusalemi mba idi mu setudiya gu malu gwa aphagano ti nu tangwa dia aphagano mba dihwa. ²⁵ Mba gudi mu khala nu idimbu izoga gu tangwa, nu gu ngonda nu gu ji themwa. Hoshi ha mavu, mba ha khala nu phashi mu katshi dia membo mba ashi mu jiya go gima gia gusala gu makelele a muta nu gitembo gia meya. ²⁶ A mala mba adi mu fwa gu woma ha gu nenga gima ginyi mba gisalama hoshia mavu. Mukunda ngolo jia gosa mba jidi mu phanzana. ²⁷ Hene, mba tudi mu mona Muna muthu muza mu matuta nu ngolo jia khembo ya koma. ²⁸ Tangwa ndaga jiji mba ji yandiga, tuphugenu enji zugisenu mitwe yenu mukunda gukatuga gwenu mu shinga gudi phene-phene." ²⁹ Yesu wa a tele gingana egi: " talenu mutshi wa fige nu mitshi iko. ³⁰ Tangwa i mu yandiga gu zoga mayiji, mu feto jiya ha gu tala egi sungi ya gishiyo ya phusana. ³¹ Phila imoshi, gula mba mwa mona ndaga jiene jia yandiga gu salama, jiyenu egi gifumu gia Nzambi gidi phene-phene. ³² Mu masonga ngu mu mi leza egi, khukho yiyi mba ishi mu balega go gula ndaga jiji jia salamele go. ³³ Gosa nu jia hoshia mavu mba hadi mu balega, uvi ndinga yami mba ishi mu balega go. ³⁴ Di kebenu enwe hakhenu, ha gumona egi mitshima yenu ikhala go ya zala nu ndaga jia bola jia sonyi, jia gukuta matombe nu ha guvwa khenda jia ndaga jia lujingu ha gumona egi gilumbu giene gile gu mi jila ndo mu gisagumwisa, ³⁵ ule muheto. Mukunda mba gudi mujila wanyi akima adi mu jinga hoshia mavu. ³⁶ Bandemenenu tangwa dikima, khalenu mu samba ha guzula ngolo jia gu lenga ndaga jiji jikima mba jiza, enji ha gu khala mwa magana gu twama dia Muna Muthu." ³⁷ Hene, mu ilumbu yinyi yesu a khalele mu longa mu katshi dia inzo ya isambu, wa khalele muya mu swama tulo gu mulundu wa nu tamegeya egi wa mitshi ya ba olivier. ³⁸ Athu akima a khalele muza nu gikhela gi kima gwa mwene mu inzo ya isambu ha gu hata malongi.