¹ Gilumbu gi moshi, mu phila yesu a khalele mu longa athu mu katshi dia inzo ya isambu, mafumu a nganga-nzambi nu alongi a shigo, nu mambuta. ² A mu lezele egi: " Tu leze, udi mu kita ndaga jiji mu giyega gia nanyi? Nga ndo nanyi wa gu hwi giyega jiene?" ³ Wa a vutudile egi: "Ngu mu mi hula mwehu. Ngu lezenu, ⁴ mbotiga ya yowani ya katugile gosa to gwa athu?" ⁵ A yindudile ene ha khawo, nu gu zwela egi: " Gula ta vutula egi: ya katugile gosa," wa mbo zwela egi:" mukunda nu ikhi mwa mu kwikile go?" ⁶ Gula twa vutula egi:" gwa athu," athu akima a mu tu shiya nu maseso, mukunda a tu lezele egi yowani wa khalele profeta." ⁷ Hene a vutudile egi ashi gawo mu jiya go gwi mbotiga yene idi mu katuga. ⁸ Yesu wa a lezele egi: " N'eme nji, ngu shi gu mu leza go mu giyega gwa nanyi ngudi mu kita ndaga jiji." ⁹ Wa yandigile gu tela athu gingana egi: " Muthu mu moshi wa kunyile vinu mu gilanga gienji, wa gi hwile athu a kunyile vinu, mwene wa katugile genji muya gu dimbo di moshi gwa leha. ¹⁰ Ha sungi ya gu katula khenyi, wa tumile muthu mu moshi wa gisalo gwa athu wanyi a nu kita gisalo mu gilanga gia vinu, ha gu mu hwa mabundu a vinu. Athu a gisalo a gilanga gia vinu a betele muthu wa tumiye, a mu kayele mago a thugu. ¹¹ Wa tumile nji muthu muko wa gisalo, a mu betele nji nu gu kita ndaga jia sonyi, a mu kayele mago a thugu. ¹² Wa tumile nji muthu wa gi tatu, a mu namesele, enji a mu kayele. ¹³ Fumu wa gilanga wa zwelele egi: " Ikhi ngu kita? Ngu mu tuma munami nga tshigina. Mbala iko a jiya gu khala nu lujitu gwa munami." ¹⁴ Uvi, tangwa athu a gisalo gia gilanga gia vinu a monele mona mwene adi zwelele mu katshi diawo egi: " Talenu fumia gifugo. Tu mu shiyenu, mukunda gifugo gitu begele." ¹⁵ A mu bishidile gonjia gilanga, hene a mu shiyile. Tangwa didi, ikhi fumia gilanga a jiya gu kita? ¹⁶ Mba uza mu shiya athu a gisalo , mba udi mu hana gilanga gwa athu ako a gisalo. Tangwa a vile ndaga yene nganyi, a zwelele egi: " Ishi nganyi go , ya jiyile go gu salama nganyi!" ¹⁷ Uvi Yesu wa a telele, wa zwelele egi: " Ikhi disongidila gia Ndaga ya sonegeye egi?" Seso dinyi dia bishidiye gwa athu a khalele mu tunga diene dia kitugile seso dia funu? ¹⁸ Yonu mukima mba ubwa holu dia seso diene mba udi mu namana, yonu seso diene mba di bwila mba udi mu sasumuga ." ¹⁹ hene, mafumu a nganga-nzambi, nu alongi a shigo a kambele phila ya gu mu kwata kaka mu tangwa diene dinyi, mukunda a khalele mu jiya egi wa zwelele gingana giene mukunda nu ene. Uvi a khalele mu vwa woma wa athu. ²⁰ A mu talele nu gu mu nonga sha mwa bonga, hene a tumile athu wanyi a khalele mu yindudiya egi athu a bonga ha guya mu hata guzwela gwenji, mu phila ya gu mu kwata gifu, mukunda nu gu mu hana gwa fumu wa dimbo. ²¹ A mu hudile egi: " Longi, tudi mu jiya egi wa nu zwela nu gu longa ndaga jia kielega, nunji wa nu zula athu akima phila imoshi, enji wa nu longa njila ya Nzambi mu masonga. ²² Keti tudi nu swa nga ndo ha gufuta gitadi gia sezare?" ²³ Uvi yesu wa jiyile ngindu jiawo jia bola wa a vutudile egi: ²⁴ " Ngu lezenu gibende gi mosgi gia falanga. Gifwanisu nu isonyi idi gugu ya nanyi?" A vutudile egi: " Ya sezare." ²⁵ Wa a lezele egi: " Hanenu gwa sezare inyi idi ya sezare, gwa Nzambi inyi idi ya Nzambi." ²⁶ A khalele nji go nu gima gia gu zwela gu twama dia athu. A khalele mu yituga gu mvutu a khalele mu hana, uvi a zwelele go ata gima. ²⁷ Tangwa a saduse wanyi a nu zwela egi gufutumuga gwa athu gu lufwa mba gu khadi go, a phusanele gwa mwene ha gu mu hula mwehu egi : ²⁸ " Longi, tala ndaga moyize a tu sonegele : Gula phangia muthu mu wa yala wa fwa wa konda gu buta nu mukhetu ata mona, phangia yala ,mwene wa feto zula mu makwela mukajia phangienji ha gu mu butisa mona." ²⁹ Uvi, gwa khalele aphangi mu sambwadi, wa somi wa zudile mukhetu, uvi wa file wa konda gu bemba ata mona, ³⁰ wa giyadi nji giteso gi moshi. Nu wa gitatu wa kwelele mukhetu mwene, ³¹ ya salamele nganyi gwa akima mu sambwadi, a konda gu bemba ata mona. ³² Gu nyima, nu mukhetu mwene wa file. ³³ Ha gu futumuga gwa athu, nanyi mu katshi diawo mba ukhala mulumia mukhetu mwene? Mukunda akima gawo mu sambwadi a mu zudile mu makwela." ³⁴ Yesu wa mu vutudile egi: " Ana a thotho yiyi adi mu kwela nu gu haneya mu makwela. ³⁵ Uvi wanyi adi mu moneya athu a bonga mu mvula jiji ha gu khala ha lufutumugu lwa lufwa mba ashi mu kwela go nga ha gu haneya mu makwela. ³⁶ Mba ashi mufwa go, mukunda mba adi mu khala giteso gi moshi nu ba wanjio, enji mba adi ana a Nzambi, mu phila adi ana a lufutumugu. ³⁷ Ata athu a fwa a futumuga, ata moyize wa jiyishile mu ndaga ya talele zenyi dia tshiya, wa mu tamegele egi Fumu Nzambi wa Abrahami, Nzambi wa Izaki, nu wa yakhobo. ³⁸ Lulu ngagi, Nzambi gwashi go Nzambi wa athu a fwa, uvi udi wa athu a monyo, mukunda akima adi mu jinga gwa mwene." ³⁹ Alongi a shigo ako, a vutudile egi: " Longi, wa zwela mwa bonga." ⁴⁰ Hene a kuyile nji go ha gu hula ata mwehu. ⁴¹ Yesu wa a lezele egi: " Phila khi idi mu zweleya egi kilisto udi muna Davidi? ⁴² Davidi mwene hakhenji wa zwelele mu mukanda wa khunga egi: " Fumu wa zwedi gwa Fumu wenji egi, "Di tumbige gu koko diami dia madia, ⁴³ ti nu di tangwa nga mbo haga mbeni jiaye goshia malu aye ha gu ji diata." ⁴⁴ Davidi udi mu tamega kilisto egi : " Fumu ", hene phila khi adi muna Davidi? ⁴⁵ Tangwa athu a khalele mu hata ndaga a khalele mu zwela, wa lezele alongogi egi: " ⁴⁶ Mu hatelela go alongi a shigo, adi mu tshigina gu wenda mu ma lopho a leha, adi mu tshigina gu hwiya mbote jia lukumu ha mbaji ya athu, adi mu kamba ha gudi tumbiga ha mafundo a thomo mu katshi dia jinzo jia isambu, nu gu khala mu mafundo a thomo hama ha wadi. ⁴⁷ Adi muya mu ngila mu jinzo jia akhetu a mifidi, adi mudi monesa athu a isambu ya ngolo. Mba adi mu sambeseya ya gubalega."