¹ Yesu wa ngidile nu gu balega mu njila ya yeriko. ² Gwa khalele nu muthu mu moshi , jina dienji Zashe. Wa khalele fumu wa afutisi a itadi, wa khalele mvwama. ³ Wa khalele mu kamba phila ya gu jiya yesu, uvi ha gu mona guvula gwa athu, mukunda wa khalele muthu wa gitala gia hihia. ⁴ Wa zudile phushi wa yile gu twama dia athu, wa ngidile gosa mutshi umoshi sikomore ha gu mu mona, mukunda yesu wa khalele nu ya gu balegela hene. ⁵ Tangwa yesu a kumile hama hene, wa tuphudile meso gosa wa mu lezele egi: " Zashe tuluga mu phushi, mukunda ngu feto ya jinga mu inzo yaye magino." ⁶ Wa tulugile mu phushi, enji wa mu yambele nu kiese. ⁷ Ha gu mona nganyi, athu akima a yandigile gu boguta nu gu zwela egi:" wayi mu tala muthu wa masumu." ⁸ Zashe wa maganele gu twama dia Fumu, wa mu lezele egi: " Tala, Fumu, nga hwa a sugami gitshidi gia ima yami, gula nga kitile gu bola gu ndaga imoshi gwa muthu, mba ngu mu vutudila mbala jiwana." ⁹ Yesu wa mu vutudile egi: " gu guluga gwa ngila magino mu inzo yiyi, mukunda yogu udi muna Abrahami. ¹⁰ Mukunda muna muthu we jile mu kamba nu gu gulusa wanyi a khalele a tota." ¹¹ Mu phila a khalele mu hata ndaga jiene wa yandigile gu zwela nu gu a tela gingana mukunda a khalele phene-phene nu yelusalemi, enji a khalele mu kwikila egi Gifumu gia Nzambi gidi muza kaka henyanyi. ¹² Wa zwelele nji egi: " Muthu mu moshi wa lujingu lwa bonga wa yile gu dimbo di moshi dia gwa leha ha gu zula mwene ha khenji gifumu gi moshi nu ha guza mu vutuga. ¹³ Wa tamegele athu enji kumi a gisalo, wa a hwile ibende ya falanga kumi, wa a lezele egi: " kitenu ha gu ji vudisa ti nu ha guza gwami". ¹⁴ Uvi athu ene a mu yegudile, hene a tumile ngenji ha guya mu mu leza egi: " Ta tshiginile go muthu yogu a zule giyega holu dietu." ¹⁵ Ha gu vutuga gwenji, gu nyima ya gu zula gifumu, wa hudile athu a gisalo wanyi a hwile falanga, mukunda ha gu jiya phila konso yonu a kitile ha gu zula nuta gu isalo yenji. ¹⁶ Muthu wa thomo we jile gu twama dienji wa zwelele egi: " Fumu, phata yaye ya falanga gia buti phata jiko kumi holu." ¹⁷ Muthu wa lujingu lwa bonga wa mu lezele egi: " Idi ya bonga, wa muthu wa gisalo wa bonga. Mukunda wa leza luzolo lwa bonga gu ga ndaga ga gibibila, ngu mu guhwa giyega gia gu tala membo kumi". ¹⁸ Muthu wa giyadi we jile, wa zwelele egi: " Fumu,phata yaye ya falanga ya buti phata jiko jitano." ¹⁹ Muthu wa lujingu lwa bonga wa mu lezele egi: " Zula giyega gia membo a tano." ²⁰ Muthu muko we jile, wa zwelele egi: " Fumu, tala phata yaye ya falanga nga yile mu iswega ha katshi dia mulele umoshi, ²¹ nga vile woma, mukunda udi wa muthu wa phashi. Wa nu zula gima wa dile gu tulula ndo, wa nu hala khenyi hama wa dile gu kuna ndo." ²² Muthu wa lujingu lwa bonga wa mu lezele egi: " ngu mu gu sambesa gu ndaga ji wa zwela, udi wa muthu wa gisalo wa khu. Wa jiyile egi nga muthu wa phashi, nga nu zula gima nga dile gu tulula ndo, nga nu hala khenyi hama nga dile gu kuna ndo. ²³ Mukunda nu ikhi wa dile gu haga ndo falanga jiami mu inzo ya gubumba falanga, mukunda ha gu vutuga gwami ngu ji zule nu nuta?" ²⁴ Gu nyima muthu wa lujingu lwa bonga wa lezele athu wanyi a maganele hene egi: " Mu tambulenu phata ya falanga ihanenu gwa yonu udi najio kumi." ²⁵ A mu lezele egi:" Fumu, udi gale nu phata kumi." ²⁶ Nga mi leza egi, yonu udi nu gima mba udi mu hwiya ima iko, uvi yonu gwa shi go nu gima mba utambudiya nu gama ganyi adi nago. ²⁷ Lulu ngagi, batenu haha mbeni jiami, wanyi a tshiginile go eme ngu zule giyega holu diawo, a shiyenu gu twama diami." ²⁸ Gu nyima ya guzwela ndaga jiene, wa yile gu khanda ya gu yelusalemi. ²⁹ Tangwa a kumile phene-phene nu betefaze nu gu betania, gu khanda ya mulundu wa nu tamegeya egi wa ba olive, wa tumile alongogi muyadi, wa a lezele egi: " ³⁰ Gindenu gu dimbo dia phene-phene. Tangwa mwa mbo ngila mu dimbo,mu mu sanga muna phunda imoshi khanji iwendeya go. Jitululenu phunda yene ngu batelenu nayo. ³¹ Gula muthu mu moshi wa mi hula egi , "mukunda nu ikhi mudi mu jitulula phanda yiyi?" Zwelenu egi:" Fumu udi nayo funu". ³² Wanyi a tumiye a yile, a sangele muna phunda mu phila yesu a zwelele. ³³ Mu phila a khalele mu jitulula muna phunda, fumia nayo wa a hudile egi: " mukunda nu ikhi mudi mu jitulula phunda yiyi?" ³⁴ A vutudile egi: " Fumu udi nayo funu." ³⁵ A batele muna phunda yene gwa yesu, a bambele milele holu dia muna phunda, a tumbigile yesu holu diayo. ³⁶ Tangwa a khalele muya a bambele milele yawo mu njila. ³⁷ Tangwa a kumile phene-phene ha gu bulumuga mulundu ya mitshi ya ba olive, gibuga gia alongogi a yandigile guvwa kiese nu gu kumisa Nzambi mu ndinga ya ngolo mukunda nu ndaga jia koma a monele, ³⁸ hene a zwelele egi: " lusagumunu lu khale gwa Fumu yonu udi muza mu jina dia Fumu! Ngemba ikhale gosa, lukumu lu khale gosa gwa leha!" ³⁹ Afalisaye ako, mu katshi dia athu a mu hudile egi:" Longi, henesa alongogi aye." ⁴⁰ Yesu wa a vutudile egi: " Ngu mu mi leza egi, gula a hena tedie, maseso a mu kabuga!" ⁴¹ Mu phila Yesu a phusanele gu dimbo, wa didile mukunda nu dimbo diene, wa zwelele egi: ⁴² " Gula nga wa jiyile mu ilumbu yiyi ndaga jidi mu talela ngemba yaye ! Uvi lulu ngagi idi ya gu swega gu meso aye. ⁴³ Mukunda, mba igujila ilumbu iko, mbeni jiaye mba ji gu hagela ibunji, mba ji gu junga ha gu gu seya khanda nu khanda. ⁴⁴ Mba a gu phanza eye nu anaye. mba ashi mu gu bembela go seso holu dia seso, Mukunda wa jiyile go tangwa dinyi Nzambi a phagele ha gu gu gulusa." ⁴⁵ Yesu wa ngidile mu inzo ya isambu, wa yandigile gu kaya athu wanyi a khalele mu diga, ⁴⁶ enji wa a lezele egi: " Ya sonegeye egi, " Inzo yami idi inzo ya isambu", uvi enwe, mwa ikitula ngando ya nzangi." ⁴⁷ Yesu wa khalele mu longa ilumbu ikima mu inzo ya isambu. Mafumu a nganga-nzambi nu alongogi a shigo nu mambuta a gimvuga gia athu a yandigile gu kamba phila ya gu mu shiya, ⁴⁸ uvi a jiyile go phila ya gu kita ndaga yene, mukunda gimvuga gia athu a khalele mu hata ndaga jienji mwa bonga.