¹ Wa a tele gingana mu ndaga ya phila a feto samba tangwa di kima konda gu hwila. ² Wa zwelele egi :" gwa khalele mu dimbo di moshi, nzuji mu moshi wa khalele go mu banga Nzambi enji gwa khalele go mu banga ata muthu. ³ Lulu ngagi gwa khalele mu dimbo diene mukhetu mu moshi wa mufidi, wa khalele muya mbala jia vula gwa nzuji mwene ha gu mu leza egi : "Ngu salese batula milonga i tudi nayo mu phila egi ngu nunge mbeni wami a bele. ⁴ Nzuji yonu gwa tshiginile go gusalesa mukhetu yonu phila a khalele mu tshigina. Gu nyima nzuji yonu wa yindudile mu mutshima wenji egi :" ata nga nu banga go Nzambi, nga nu athu ako ⁵ uvi mukunda nu mufidi yogu udi mu ngu yangisa, ngudi gu mu salesa. Gula ndo mba udi mu khala muza mbala jia vula ha gu ngu hudisa !" ⁶ Hene Fumu Yesu a zwelele nji egi : vwenu ndaga jia zwelele nzuji yonu wa konda masonga, ⁷ lulu ngagi Nzambi mba a salesa nji go athu wanyi mwene a phonele, wanyi a nu mu tamega phipha nu mwanya mukunda mwene a asalese? ⁸ Eme ngudi gu mi leza egi, Mwene mba udi mu a salesa mu phushi. Uvi tangwa Muna-Muthu mba eza haha hoshia mavu, mba uza mu sanga athu nu lukwikilu? ⁹ Gu nyima wa tele gingana gwa athu wanyi a nu di monesa gifwa athu a bonga, nu gu vweza athu ako : ¹⁰ " Athu mu yadi a ngidile mu inzo-Nzambi ha gusamba (mu moshi wa khalele mu falisaye, muko wa khalele galagi ga nu futisa gitadi) ¹¹ Mu falisaye wa maganele, wa sambele ndaga mu phila yenji egi :" Nzambi, nga vutula matondo a vula mukunda ngu shi go giteso gi moshi nu athu wanyi adi nzangi, athu a luvunu, athu a uthambi mu phila ya mufutisi wa yitadi yogo ! ¹² Nga nu tuna gudia mbala ji yadi konso phoso mukunda nu gu samba,enji nga nu hana makapo a ndambu imoshi ya ima yami mu katshi dia ima kumi." ¹³ Galagi yonu mufutisi wa itadi wa maganele genji gwa leha fioti, phila ya gutala gosa ya khalele go, wa khalele mu dibunda ha mutshima ha guleza khenda jienji, wa khalele mu zwela egi :" Nzambi ngu vile khenda, eme muthu wa masumu." ¹⁴ Yesu wa zwelele nji egi, ngudi gu mi leza egi muthu yonu wa vutugile mu inzo yenji mu kiese, uvi mufalisaye yonu wa tunyiye, mukunda muthu mu kima wa nu di kandwisa, mba udi mu mu bulumwishiya, yonu mba udi bulumwisa mba udi mu kandwishiya. ¹⁵ Athu ejile mu bata ana a mitumba gwa Yesu mukunda mwene a ahage mago, uvi alongogi a monele a yandigile gu a balela. ¹⁶ Uvi Yesu wa atamegele wa a lezele egi :"Bembenu ana -a-mitumba eze gwa eme, mu a kangi go njila, mukunda Gifumu gia Nzambi gia fwanana nu athu adi a giteso gia ana-a-mitumba. ¹⁷ Mu masonga ngudi gu mi leza egi, muthu yonu mba utuna guzula Gifumu gia Nzambi mu phila ya mona mutumba mba gwa shi mu gi ngila go ata habiyo." ¹⁸ Fumu mu moshi wa ba yuda wa hudile Yesu egi: " Longi wa bonga, ikhi nga feto kita ha guzula monyo wa mvula nu mvula ?" ¹⁹ Yesu egi :mukunda nu ikhi wa ngu tamega egi longi wa bonga ? Gushi go ata muthu wa bonga, kaka Nzambi phamba. ²⁰ Eye u jiya shigo jiji : Gusala ndo uthambi; gushiya ndo muthu; gukuya ndo; guzwela ndo ndaga jia mambo; jitisa shaye nu ginaye. ²¹ Fumu yonu wa zwelele egi : "Nga nu hata shigo jiene ji kima katuga gilenge giami." ²² Tangwa Yesu a vile ndaga giene wa mu lezele egi: "Gima gi moshi gia gu konda. Nda diga ima yaye ikima, u kaphele a sugami, nganyi mba udi mu zula gimvwama gosa , gu nyima ngu hate." ²³ Tangwa mvwama a vile ndaga giene, wa bwile khenda-khenda mukunda wa khalele nu gimvwama gia vula. ²⁴ Tangwa Yesu a monele egi fumu mwene wa bwile khenda-khenda wa zwelele egi:" Idi phashi jia vula gwa athu wanyi adi nu gimvwama gia vula ha gu ngila mu Gifumu gia Nzambi ! ²⁵ Uvi ishi go ya gubalega pĥashi gwa mbiji yiyi shamo ha gubalega mu wina dia shindani uvi idi phashi gwa mvwamz ha gu ngila mu Gifumu gia Nzambi." ²⁶ Athu wanyi a vile ndaga jiene a hudile egi ;" Nanyi mba u guluga? " ²⁷ Yesu wa vutudile egi : "ndaga jidi jia phashi gwa athu ha gu sala, Nzambi wa nu gu isala ." ²⁸ Phetelo wa zwelele egi : "Tala ta bemba ima yetu ikima mukunda nu gu guhata." ²⁹ Yesu wa zwelele egi : Ngudi gu mi leza ndaga jia kielega egi gula muthu nu gubemba ndo inzo yenji, nu mukajie nji, aphangienji, nga shenji nu ginenji, to anenji mukunda nu Gifumu gia Nzambi, ³⁰ mba gwa zudi go makapo nga monyo wa mvula nu mvula mu tangwa didi nga mu tangwa didi muza." ³¹ Gu nyima dia gubungisa alongogi kumi nu muyadi phene-phene nu mwene, wa a lezele egi :" haha ngagi tu di mu kanduga ha guya gu yerusalemi, gunu ndaga ji kima mba jidi mu salama mu phila ba profeta a sonegele mukunda nu Muna-Muthu." ³² Mukunda mba u haneya gu mago a aphagano, mba adi mu mulela, mba adi mu mushingana, nu gu mu tshila mate. ³³ Gu nyima ya gu mu beta nu fimbu, mba adi mu mu shiya, gu nyima dia ilumbu itatu, mba udi mu zuga gu lufwa." ³⁴ Alongogi a bagishilego ndaga yene mukunda a khalele go mu jiya disongidila dia ndaga yene, enji a khalele go mu jiya ndaga yinyi mwene a zwelele. ³⁵ Tangwa Yesu a kumile phene-phene nu dimbo dia Yeriko, muthu mu moshi wa meso a fwa wa khalele hoshi mu khelelego ya njila, mu lomba makapo, ³⁶ wa vile makelele a gibuga gia athu a khalele mu balega, wa hudile ha gu jiya ndaga ya khalele mu balega. ³⁷ A mu lezele egi idi Yesu mwenya gu Nazareti udi mu balega. ³⁸ Hene henyanyi wa yandigile gu kabuga nu gu zwela mu ndinga ya ngolo egi :" Yesu Muna Davidi, ngu vile khenda. " ³⁹ Athu wanyi a khalele mu wenda gu twama dienji a yandigile gu mu balela nu gu mu leza ha gu kanga kano wenji. Uvi mwene wa khalele sha mu kabuga mu ngolo egi:" Muna Davidi, ngu vile khenda." ⁴⁰ Yesu wa maganele wa hanele mukwala ha guza nu muthu mwene. Tangwa muthu mwene a kumile phene-phene , Yesu wa mu hudile egi : ⁴¹ "Ikhi wa tshigina ngu gu kite ? " Wa zwelele egi:" Fumu nga tshigina ngu mone. " ⁴² Yesu wa mu lezele egi : "kangula meso u mone. Lukwikilu lwaye lwa gu belula." ⁴³ Kaka mu tangwa diene, wa monele, ebuna wa yandigile gu hata Yesu, nu gu vutula matondo gwa Nzambi. Ha gu mona ndaga yene athu a kima a yandigile gu hana lukumu gwa Nzambi