¹ Yesu wa lezele a longogi enji egi : ndaga jinyi jia nu benda athu ha gu kita masumu jia lendele go gukonda, uvi khenda jia vula gwa muthu udi mu salela ndaga jiene. ² Idi ya bonga ha gu jitshiga muthu wa phila inyi seso mu shingo ha gu mu bishila mu muta, uvi ishi go mwa bonga gwa muthu mwene ha gu benda mano mu moshi mu katshi dia ana a mitumba ha gu sala masumu. ³ Enwe mudi keba "gula phangi'aye wa gu sala gima gia bola mu balele, gula wa balula mutshima mu lolule. ⁴ Gula wa gu sala gubola mbala ji sambwadi mu gilumbu gi moshi, enji weza mu vutuga mbala ji sambwadi ha gu gulomba khenda, u fwete gu mu lolula. ⁵ A tumwa a lezele Fumu Yesu egi : " idi wa bonga ha tu yiga lukwikilu ". ⁶ Fumu wa zwelele egi :"Gula nga mwa khala nu lukwikilu gifwa ga bundu ga mutshi wa mutarde, mwa jiya gu leza mutshi wa mire ha gu vumbumuga nu miji uye ubwe mu muta wa meya a mungwa mungwa mutshi wene mba udi gu mi lemvugila. ⁷ Ha gufwanesa, nanyi mu katshi dienu gula udi nu muthu wenji wa gisalo gia gubundula nga ginyi gia gu tala mameme, tangwa mba a katuga gu gisalo mba udi mu mu tamega ha guza mudia ha mesa tangwa muthu wa gisalo mba eza mu vutuga mu inzo ? Ndo ishi ⁸ nganyi go. Mba udi gu mu leza egi : "Ngu yidigile ima ya gudia, eye sudiga milele yekha ha gu ngu salesa tangwa ngudi mudia nu gunwa, gu nyima eye wa mbo dia nu gunwa . ⁹ Funu gu thugu gwa fumu yogu ha guvutula matondo gwa muthu wenji wa gisalo mukunda muthu wa gisalo wa salela ndaga mu phila fumu wenji wa mu lezele ha gu kita. ¹⁰ Giteso gi moshi mukunda nu enwe, gula mudi mu kita ndaga ji kima Nzambi a nu mi leza ha gu kita, mba mudi mu zwela egi " tu di twa athu a gisalo a phamba, tu di mu kita ndaga jinyi fumu a tu lezele ha gu kita ¹¹ Ha guya gu yelusalemi, Yesu wa balegele mu dimbo dia Samaliya nu mu dimbo dia Galileya. ¹² Tangwa a ngidile mu dimbo di moshi, a mala kumi a khalele nu gimbefu gia hute, ejile ha gu mu tagana, a maganele gwa leha nu Yesu, ¹³ a yandigile gu zwela mu ndinga ya gukaluluga egi :" Yesu, Longi! tu vile khenda !" ¹⁴ Tangwa Yesu a amonele wa a lezele egi :" vutugenu muye mudi monese gu twama dia nganga-Nzambi." Tangwa a khalele mu njila ha gu vutuga a monele egi a belugile. ¹⁵ Tangwa mu moshi mu katshi diawo wa monele egi wa beluga wa vutugile ha guza mu vutula matondo gwa Nzambi mu ndinga ya ngolo. ¹⁶ Wa fugamele gu malu a Yesu,ha gu mu kumisa. Wa khalele muthu wa gu samaliya. ¹⁷ Ha gu vutula Yesu wa hudile egi : " keti athu wanyi kumi a beluga a kima ?" athu uvwa ako adi gwi ? ¹⁸ Gwa khalele go nu ako a guza mu vutula lukumu gwa Nzambi kaka nzenza yogo phamba ? " ¹⁹ Hene wa mu lezele egi :"Zuga nda gaye ; lukwikilu lwaye lwa gu belula ²⁰ A falisaye a hudile Yesu ha gu jiya gilumbu gia guza gwa Gifumu gia Nzambi, Yesu wa vutudile egi : "Gifumu gia Nzambi mba gi shi go muza ha gudi monesa gu meso a athu. ²¹ Muthu mba a zwedi go egi "tala haha", nga ndo " tala hanyi !" mukunda mu feto jiya egi, Gifumu gia Nzambi gidi mu katshi dienu. " ²² Yesu wa lezele a longogi enji egi :"gilumbu gidi gwene mba mu khala nu funu ya gumona muna muthu, uvi mba mu shi mu munona go. ²³ Athu mba adi mu mi leza egi : " talenu udi gunu, to udi gugu" guya ndo mu mukamba, guya ndo mu phushi gwa athu ene. ²⁴ Gilumbu Muna Muthu mba eza mu di meza mba gikhala phila semo ya nzaji ya nu monega khanda nu khanda tangwa nzaji ya nu bwa. ²⁵ Mwene mba u mona phashi jia vula ha thomo, enji mba udi mu tunyiya gwa athu a tangwa didi. ²⁶ Ndaga jinyi jia bwile mu tangwa dia Nowe, mba jidi mu bwa giteso gi moshi gwa Muna Muthu. ²⁷ Athu a khalele mudia mu nwa mu kwela nu gu hana anawo mu makwela ti nu gilumbu ginyi Nowe a ngidile mu katshi dia masuwa; meya a zalele mwa vula mu thotho ikima, athu akima a file. ²⁸ Mba ikhala giteso gi moshi, phila ndaga jia bwile mu tangwa dia Loti ; athu a khalele mudia, mu nwa mu sumba ima, mu diga, mu kuna ilanga mu tunga jinzo. ²⁹ Uvi gilumbu ginyi Loti a katugile mu dimbo dia Sodome, Nzambi wa nogesele mvula ya tshiya twa ngolo, tshiya twa shiyile athu a kima mu dimbo. ³⁰ Mba ikhala giteso gi moshi mu gilumbu Nzambi mba a tuphula Muna Muthu gu meso a athu. ³¹ Mu gilumbu giene muthu yonu mba ukhala ha mukambo wa gisapha mba gwa tuluga go ha gu ngila monzo a zule ima yenji. Giteso gi moshi nu muthu yonu mba ukhala mu gilanga, mba a vutuga go nji. ³² Mu khala mu yibuga ndaga jinyi jia bwile mukajia Loti. ³³ Muthu yonu mba u kamba phila ya gu gulusa monyo wenji mba udi mu u totesa; uvi muthu yonu mba u totesa monyo wenji mba udi mu u gulusa. ³⁴ Ngudi gu mi leza egi mu phipha yene a mala mu yadi mba a khala a swama ha gididi gi moshi. Mu moshi mba u zudiya, mu moshi mba u bega. ³⁵ Akhetu mu yadi mba a khala mu twa phupha, mu moshi mba u zudiya mu moshi mba udi mu bega. ³⁶ ( A mala mu yadi mba a khala mu gilanga, mu moshi mba u zudiya, mu moshi mba u bega.) ³⁷ A mu hudile egi : Fumu ndaga giene mba ji bwa gwi ? Mwene wa a vutudile egi : " Tuyimbi twa nu gudi bungisa hama hanyi ha nu khala mvumbi. "