¹ Khalenu mu hata mbandu ya Nzambi, mukunda mudi mwa anenji a nu tshigina. ² Khalenu mu wenda mu wenda mu katshi dia gu tshigina mu phila Kilistu a tu tshiginile mu phila a hanele lujingu, mukunda nu etwe. Wa di hanele ole mabula nu gimenga gia vumba dia mananashi a bonga gwa Nzambi. ³ Nga uthambi, nga ndaga jiko jia mvindu nu waza jia jiyile go gu khala mu katshi dienu. Mu phila idi gikalulu gia athu a kwikila. ⁴ Mu monesa go ikalulu ya sonyi, nga ndo gu zwela ndaga jia uzoba, nga ndo gu zwela izwele-zwele ya gu lelesa, idi ya sonyi, ishi mu fwanana go. Uvi kitenu ndaga jidi mu hana matondo. ⁵ Mukunda mu feto jiya egi, gula muthu udi mu kita uthambi, nga ndo wa nu kita ndaga jia mvindu, nga ndo udi nu waza disongidila muthu wa nu sambela itege, mba gwa zudi go mabula mu Gifumu gia Kilisto nga ndo gia Nzambi. ⁶ Muthu gwa mi dimbi go gu ndinga jia konda funu. Mukunda khabu jia Nzambi jidi muza gwa ana a konda lujito, mukunda nu ndaga jia phila inyi. ⁷ Hene lengenu athu adi mu kita ndaga jia phila inyi. ⁸ Ha thomo mwa khalele athu a konda gu temuga, ⁹ uvi lulu ngagi mwa kituga athu a temuga, ¹⁰ mukunda nu gimvuga ginyi mudi nagio nu Fumu wetu Yesu. ¹¹ Mu kala go gu di bungisa gu ndaga ja bola ja phipha, uvi kalenu mu tuna ndaga jene. ¹² Mukunda idi sonyi ha gu zwela ngada a nu kita mu giswegi. ¹³ Uvi ndaga n ja nu tunyiya ja nu monega mu mwenya, mukunda ndaga ikima ya nu monega idi mwanya. ¹⁴ Idi mukunda nu nganyi a sonegele egi: " Zuga eye udi gu tulo, zuga mu katshi dia athu a fwa, nganyi Kilistu mba udi mu guleza mwanya. ¹⁵ Kebenu ha gu di twalesa ndo mu phila ya a mitshima ya bola, uvi mu phila ya athu a tema. ¹⁶ Ilumbu yiyi tu di idi ya bola , hene mu kala mu salela tangwa mwa bonga. ¹⁷ Hene kalenu mu jinga mu phila ya athu adi nu funu, uvi kalenu mu jiya luzolo lwa Fumu. ¹⁸ Mu kala go mu lauga matombe, idi ndaga ya bola, uvi kalenu mwa zala nu pheve santu. ¹⁹ Kalenu mudi salesa mu isambu, nu mu njila ya gu yimba khunga ja Nzambi nu gu Fumu lukumu mu mutshima wa bonga, ²⁰ kalenu mu vutula matondo gwa Nzambi Tata mvula jikima mukunda nu ima ikima mu jina dia Fumu wetu Yesu Kilistu, ²¹ nu gudi lemvugila mu katshi dienu mu katshi dia woma. ²² Enwe akhetu, kalenu mu lemvugila alumienu ole mudi mu lemvugila Fumu; ²³ mukunda yala udi fumu wa mukhetu, mu phila Kilistu adi Fumu wa dibundu, mwene udi mu gulushi. ²⁴ Mu phila dibundu dia nu lemvugila Kilistu, akhetu nji a feto lemvuga gwa alumi'awo mu ndaga jikima ²⁵ Enwe amala, kalenu mu tshigina akajenu, mu phila Kilistu a nu tshigina dibundu, enji nu phila adi hanele mukunda nu dibundu diene. ²⁶ Wa kitile nganyi mukunda dibundu di kituge gibeni dibundu dia nzambi. Kilistu wa wovele dibundu mu meya tangwa dia tshiginile Kilistu. ²⁷ Mukunda wa tshiginile gu leza dibundu diene mwene ha khenji; ya lukumu ya santu nu ya bonga, ya gu konda mvindu, mwila khanji u kola go, ata gifu giko ndo mu mwila. ²⁸ Idi mu phila yene amala a feto tshigina akajawo mu phila a nu di tshigina. Yonu u mu tshigina mukajenji u mudi tshigina mwene ha khenji. ²⁹ Mukunda gu shi nu muthu go wa konda gu tshigina mwila wenji; uvi wa nu gu u hwa ima ya gudia, mu phila Kilistu a nu kita mukunda nu dibundu, ³⁰ mukunda tudi gimvuga gia mwila wenji. ³¹ Hene, muthu mba u bemba shenji nu ginenji ha gu kangama nu mukajenji, ene muyadi mba a kituga mwila umoshi." ³² Ndaga yiyi idi ya koma, ngu mu zwela nganyi mukunda nu Kilistu enji nu dibundu. ³³ Gwa enwe ako yala mukima a tshigine mukajenji.