¹ Ana lemvugenu gwa a shenu mu phila ya Fumu, nganyi idi ya bonga. ² " Jitisa shaye nu ginaye"( idi shigo ya thomo ya haneye nu laji), ³ mukunda u kale mu kiese nu gu jinga mvula ja vula haha ha mavu. ⁴ Enwe ibuti mu kala go mu hwa anenu khenda, uvi kalenu mu a longa mwa bonga mu phila ya Fumu. ⁵ Enwe athu a gisalo, kalenu mu lemvuga gwa mafumienu a isalo mu phila ya gu tshigina, nu gu a vila woma, nu gu di bulumwisa gu twama diawo mu mutshima yenu mu phila ya Kilistu;, ⁶ ishi go gu meso mu phila ya gu hwa athu kiese, uvi mu phila ya athu a gisalo gia Kilistu adi mu kita mu mutshima wa bonga gisalo gia Nzambi. ⁷ Kalenu mudi salesa mwa bonga, mu phila ya Kilistu uvi ya athu ndo. ⁸ Nu gu jiya egi konso muthu ata muhiga, ata yonu gwa shi mu higa go, mba a zula gwa Fumu mu ima a kitile ya bonga. ⁹ Enwe a fumu a isalo, kalenu mudi visa nu athu enu a isalo, mu kala go mu a hwa phashi, nu gu jiya egi fumu wawo nu wenu udi gosa, gu twama dienji gwa nu katula go athu muthu. ¹⁰ Gwa enwe ako, Di hwenu gikesa mu katshi dienu nu mu ngolo jenji. ¹¹ Sudigenu mata a Nzambi, ha gu kwata ngolo gu ndaga ja mambo a diabulu. ¹² Mukunda ita tudi nayo ishi ya mwila go nga ndo ya menga, uvi idi ita ya gipheve nu ya mafumu a haha ha mavu nu gwa mafumu a mu phipha nu gwa pheve ja bola jidi gosa. ¹³ Hene, zulenu mata akima a Nzambi mukunda nu gu kwata mu gilumbu gia bola, nu ha gu kwata ngolo gu nyima ya gu manesa ndaga jikima. ¹⁴ Kwatenu ngolo, sudigenu masonga mu phila mwa nu sudiga mukaba, sudigenu mukaba wa masonga; ¹⁵ sudigenu gudi zalula mu phila mwa nu sudiga saphatu gu malu mukunda nu ndinga ya bonga ya ngemba, ¹⁶ lukwikilu lu kala gima gia gu lwila itumba, nganyi mba mudi mu jima tshiya twa nu haga mwenya mambo. ¹⁷ Sudigenu giphu gia gu guluga nu phogo ya khusa ya gi pheve idi ndinga ya Nzambi. ¹⁸ Ndaga jikima mu kala mu ji kita mu njila ya pheve nu ya isambu nu gu di vila mu katshi dienu. Kalenu mudi bumba mwa bonga, nu gu sambela athu a Nzambi akima. ¹⁹ Kalenu mu ngu sambela, mukunda nu gu ngu leza ndaga jinyi mba ngu zwela tangwa mba ngu tshigina gu zwela, nganyi mba ngu jiyise nu gikesa ndaga ja giswegi jinyi jidi mu ndinga ya bonga. ²⁰ Ngu di nga thumwa wa ndinga ya bonga. Ata ngu di gami mu bologo mu tangwa didi, kalenu mu samba Nzambi mukunda a ngu hwe gikesa ha gu jiyisa ndinga ya bonga mu phila ngu feto zwela. ²¹ Phangi'etu Tishike yonu mwa nu tshigina, yonu mwa nu hagela mutshima mukunda nu gisalo ginyi a nu salesa Fumu Yesu, mba udi mu mi jiyisa sango yami ikima mu phila egi mu ngu jiye. ²² Hene nga mu tuma mukunda mu jiye phila khi tu di, mukunda a mi hwe gikesa. ²³ Tata Nzambi nu Fumu wetu Yesu a mi hwe ngemba nu mutshima wa gudi tshigina nu lukwikilu. ²⁴ Nzambi a tale mu iso dia bonga athu wanyi akima a nu tshigina Fumu wetu Yesu mu gu tshigina gwa konda suga.