¹ hene, Eme muthu wa bologo mukunda nu Fumu, ngu mu mi hwa gikhesa, ngu mu mi bondila ha gu jinga mwa bonga mu phila mwa phoneye. ² Khalenu mu jinga nu gudi kulumwisa, gu khala tululu nu gu kanga mutshima. Di kwatesenu mu katshi dienu nu gudi tshigina. ³ Salenu ngolo ha gu kwata gimvuga gia pheve ya ngemba inyi ya nu mi vugisa. ⁴ Mwila udi umoshi, pheve nji idi imoshi, mu phila givuvu ginyi mwa tamegeye mu katshi dia gio gidi gimoshi! ⁵ Fumu udi mumoshi, lukwikilu lumoshi, mbotiga imoshi, ⁶ Nzambi mumoshi, Tata wa athu akima. Mwene udi holu dia athu akima, wa nu kita mu njila ya athu akima gwa athu akima. ⁷ Konso muthu mu katshi dietu wa zudile mabula a ofele mu phila Kilisto a tu kaphele nawo. ⁸ Mu phila ya sonegeye egi : "Tangwa a kandugile gosa, wa batele ahiga akima wanyi a kwateye, wa hanele makapho gwa athu." ⁹ Ikhi idi tendula ya ndaga yiyi : " Wa kandugile " idi mu tendula egi mwene wa bulumugile goshia mavu? ¹⁰ Muthu yonu wa bulumugile, mwene wa kandugile gosa gwa leha mukunda wa lungishile ndaga jikima. ¹¹ Kilisto wa kaphele makapho mu phila yiyi: ako ba thumwa, ako ba profeta, ako alongi a sango, ako ba pashitele, ako alongi. ¹² Wa kitile nganyi mukunda nu gu sungiga athu a kwikile mukunda nu gisalo gia gu salela athu ako ha gu tunga mwila wa Kilisto, ¹³ udi mu kita nganyi ti nu gunu khungi'etu akima tu khale gima gimoshi mu lukwikilu ha gu jiya mwa bonga bonga nanyi yogu Muna Nzambi, udi mu kita nganyi mukunda tu zule makalegelo a muthu yonu udi wa kula, mukunda gu kula gwetu gu khale giteso gi moshi nu gukula gwa Kilisto. ¹⁴ Hene ta jiyile go gu khala ole ana a mitumba. Ta jiyile nji go gu khala ole athu adi mu wenda ole lufunji. Ta jiyile nji go gu khala ole athu adi mu bateya gu lufunji lwa malongi a nu bata athu khanda nu khanda mu njila ya luvunu nu mayele a bola a athu. ¹⁵ Hene, tu khalenu mu zwela masonga mu katshi dia gu tshigina enji tu kule mu ndaga jikima mu gu wagana nu muthu yonu udi mutwe, disongidila Kilisto. ¹⁶ Kilisto wa vugishile mwila ukima wa athu a kwikila. Konso gitshidi gia mwila gidi gia di kwata mukunda mwila wene u kule nu gudi tunga mu katshi dia gu tshigina. ¹⁷ Hene ngu mu zwela nu gu mi sungiga mu njila ya Fumu egi : mwa jiyile nji go gu wenda mu phila aphagano a nu wenda ha gu hata ngindu jia phamba. ¹⁸ Adi mu phipha mu ngindu. Adi gwa leha gu lujingu lunu lwa nu katuga gwa Nzambi mukunda adi a konda mayele enji a shi mu kanga mutshima go. ¹⁹ A shi mu vwa gawo sonyi go. Adi hana gu ndaga jia uthambi, gu ndaga jia bola nu gu ndaga jia mvindu jia segela. ²⁰ Uvi ishi nganyi go mwa vile egi Kilisto wa khala. ²¹ Ngu mu yindula egi mwa longeye mu jina dienji, mu phila kielega idi mu katshi dia Yesu. ²² Mwa longeye ha gu bemba gikalulu gienu gikulu nu gu tuna gi muthu gienu gikulu gidi mu katshi dia gu bola mukunda nu ndaga jia phamba. ²³ Hene mu feto hata kaka ha gu khala ole athu a pha mu ngolo jinyi jia nu twalesa mabanza enu. ²⁴ Sudigenu gi muthu gia pha ginyi gia gangeye mu luzolo lwa Nzambi nu gu nunga mu masonga a kielega. ²⁵ Hene, bembenu ndaga jia luvunu. " Khalenu mudi leza masonga ", mukunda tudi itshidi ya mwila umoshi. ²⁶ " Gula mudi mu vwa khabu, mu kiti go masumu." Khabu jenu ji isa tangwa go. ²⁷ Mu hwi go diabulu njila. ²⁸ Nzangi a bembe unzangi. A kite gisalo. Gisalo giene a gi kite nu ngolo jia ha mago mukunda a zule gima gia gu kapha nu muthu yonu udi nagio funu. ²⁹ Ndaga jia bola ji zogi go mu kano dienu. Uvi khalenu mu zwela ha ma kano enu ndaga jia bonga mukunda nu gu salesa athu wanyi adi nu funu ya lusadisu, mukunda athu wanyi adi nu funu ya guvwa. ³⁰ Mu hwi go pheve Santu ya Nzambi khenda, mukunda mwa hageye gidimbu mu njila ya pheve yene, mukunda mu gilumbu ginyi mwa katudiye mu gihiga. ³¹ Katulenu mu katshi dienu ndaga jia sonyi, gimbenyi, khabu, gumana, mashingo nu ndaga jikima jia bola. ³² Monesenu gu bonga mu katshi dienu. Khalenu mu vila athu ako khenda mu mitshima yenu. Di lolulenu mu katshi dienu, mu phila Nzambi a nu mi lolula mu njila ya Kilisto.