¹ Hene eme Pholo, muthu wa bologo wa Yesu Kilisto mukunda nu enwe athu wanyi a shi ba yuda go. ² Ngu mu yindula egi mwa vile sango jia gisalo gia khenda gia ngu hwiye gwa Nzambi mukunda nu enwe. ³ Ngu mu sonega mu phila monele gu gimona meso. Nga mi sonegele mukanda mukunda nu ndaga jia masonga jinyi jia swegeye. ⁴ Hene gula mwa tanga mukanda wene mwa lenda gu jiya ngindu jiami mu ndaga jinyi jia swegeye jidi mu talela Kilisto. ⁵ Mu khukho jia mwa leha, ndaga jene jia masonga, jia moneseye go gwa athu akima. Uvi lulu ngagi, jidi mu moneseya gwa a thumwa nu gwa ba profeta* mu njila ya pheve yenji. ⁶ Masonga ene a swegeye adi egi athu wanyi a shi go ba yuda, adi mu kituga nu ene ana a gifugo nu gu khala athu mu gimvuga gia mwila umoshi nu ba yuda. Adi mu vugana nu ba yuda mu katshi dia laji dinyi mba a hwiya mu njila ya Kilisto Yesu mu phila adi mu longeya mu sango ya bonga. ⁷ Nga nu kita gisalo gia gu longa sango ya bonga mukunda nu mabula wanyi nga hwiye gwa Nzambi mu mutshima wenji wa bonga, mu lusadisu lwa ngolo jenji. ⁸ Ba Kilisto akima a ngu balega gu funu. Uvi Nzambi wa ngu hwile mabula wawa a gu longa sango ya bonga gwa athu wanyi a shi ba yuda go mukunda nu gimvwama gia konda suga gia Kilisto. ⁹ Nga feto jiyisa athu akima gu ndaga ya giswegi gia Nzambi, giswegi giene mu phila Nzambi a kitile ndaga katuga mu mvula gia balegele. ¹⁰ Nganyi lulu ngagi mu njila ya gimvuga gia dibundu, a twadisi nu mafumu wanyi adi gosa a jiye mayele a Nzambi wanyi adi mu monana mu njila jia phila nu phila. ¹¹ Ya salamele nganyi mu phila ya khalele mabanza enji a mvula nu mvula mu phila a di vishile nu Fumu wetu Kilisto yesu. ¹² Mu njila ya Kilisto tudi nu ngolo nu gu haga mutshima gwa mwene mukunda nu lukwikilu lwetu. ¹³ Hene, ngu mu mi lomba ha gula gu hwila ndo mukunda nu phashi ngudi mu mona mukunda nenu mukunda nu lukumu lwenu. ¹⁴ Hene mukunda nu nganyi nga nu fugama ha mabongo gu twama dia Tata ha gu mu sambela, ¹⁵ mwene wa nu hana jina gwa ikanda ikima idi gosa nu haha hoshia mavu. ¹⁶ Nga nu mu lomba egi, mu lukumu lwenji lwa koma a mi hwe pheve yenji mukunda mu zule gikhesa mu mitshima yenu. ¹⁷ Ngu mu lomba egi Kilisto a khale mu mitshima yenu mukunda nu lukwikilu lwenu. Ngu mu lomba nji egi mu khale mu katshi dia gu tshigina gwenji. ¹⁸ Mu khale mu jinga mu katshi dia gu tshigina gwenji mukunda mu mone phila ya gu jiya egi gu tshigina gwa nu tu tshigina Kilisto gudi gwa koma enji gwa konda suga. ¹⁹ Nga nu lomba nji egi mu jiye mwa bonga sha egi gu koma gwa gu tshigina gwa Kilisto, gwa balega gu jiya gukima. Mwa jiya gu kita nganyi, mukunda mu khale mwa zala nu gutshigina gwa Nzambi. ²⁰ Lulu ngagi, yonu udi nu giyega gia gu kita ndaga jikima jinyi ta nu lomba nu jinyi ta nu yindula, wa nu gu ji kita mu ngolo jenji jidi mu katshi dietu, ²¹ gwa mwene gu khale lukumu mu katshi dia Dibundu nu gwa Kilisto Yesu mu mvula nu mvula. Amen*