¹ Enwe mwa khalele ha thomo ole athu a fwa mu gipheve mukunda nu ndaga jia gu kita masumu. ² Mu tangwa diko mwa khalele mu hata shigo jene. Mwa khalele mu hata ndaga phila fumu wawo wa khalele mu mi leza. Fumu mwene udi pheve ya nu konda gu lemvugila Nzambi. ³ Ta jingile tangwa diko nganyi mu katshi dia wanyi a konda lukwikilu. Ta khalele mu kita nganyi mu phila ya luzolo lwa gi muthu gietu. Ta khalele mu salela luzolo lwa gi muthu nu ngindu. Ta khalele mu jinga ole ana a viya khabu mu phila a vile khabu gwa ana ako. ⁴ Uvi khenda jia Nzambi jia balega gu koma mukunda nu gu tshigina a tu tshiginile. ⁵ Hene ta khalele ole athu a file mukunda ta shiyile shigo, mwene wa tu hwile monio wa pha mu Kilisto. Idi mu khenda jenji ta gulugile. ⁶ Nzambi wa tu zugishile gu lufwa nu Yesu Kilisto njila imoshi, wa tu hagele gu koko dienji dia madia. ⁷ Wa kitile nganyi mukunda mu mvula jidi muza mba a tu leze gu koma gwa khenda jenji. Udi mu tu leza gu bonga gwene mu njila ya Kilisto Yesu. ⁸ Mukunda ta gulugile mu njila jia khenda nu lukwikilu lwa dile gu katuga ndo gwa enwe; idi makapho a tu hwile Nzambi. ⁹ Mu zudi go lulendo mukunda nu ndaga jenu. ¹⁰ Mukunda ta saleye mu gidimbu gia Nzambi, mu njila ya Kilisto Yesu ha gu kitila Nzambi ima ya bonga mu phila a yindudile ha gu tu kitila mambote katuga mu tangwa dikulu, enji tu khale mu wenda mu katshi dia mambote ene. ¹¹ Yindulenu egi mbala iko mwa khalele athu a masumu, mwa khalele mu tamegeya egi: " aphagano " ata mwa nu tamegeya egi mwa batudile gu mukanda, udi mukanda wa kitiye gu mago a athu. ¹² Mukunda mu tangwa diene dinyi, mwa khalele mwa di kapha nu Kilisto. Mwa khalele mwa nzenza gu ndaga ya laji dia gudi visa. Mwa khalele mu jiya ata gima go gu ndaga ya lujingu lwa gu twama. Mwa khalele nu Nzambi go. ¹³ Uvi lulu ngagi, mu njila ya Kilisto Yesu, enwe mwa khalele gwa leha nu Nzambi, mweza phene-phene nu Nzambi mu njila ya menga a Kilisto. ¹⁴ Mukunda Mwene udi ngemba yetu. Mwene wa kitile egi imvuga yinyi iyadi i kituge gimvuga gimoshi, mwene nji wa bwishile ibagi ya ha katshi-katshi yinyi ya khalele mu a kabisa. ¹⁵ Mu njila ya mwila wenji wa katudile shigo nu ndaga jiko jia sonegeye mukunda nu gu sala muthu wa pha. ¹⁶ Wa kitile nganyi mukunda nu gu visa ikanda iyadi nu Nzambi mu njila ya muthu mu moshi holo dia khulunji. Mukunda nu khulunji, wa shiyile ndaga ya gu tuna athu ako. ¹⁷ Yesu we jile ha gu mi longa ngemba, enwe mwa khalele gwa leha nu ngemba nu gwa wanyi a khalele phene-phene. ¹⁸ Mukunda nu Kilisto khungietu akima ba yuda nu wanyi a shi ba yuda go, ta jiya gu magana gu meso a Nzambi mu lusadisu lwa pheve yenji imoshi. ¹⁹ Hene enwe athu wanyi mushi go ba yuda, mushi nji mwa nzenza go uvi mudi mwa athu a dimbo di moshi nu wanyi a hageye mu khanda gwa Nzambi, athu a vumo dia Nzambi. ²⁰ Mwa tungiye holu dia fondasho* ya athumwa nu ba profeta*. Kilisto Yesu mwene hakhenji udi seso dia kunji. ²¹ Ha gudi bungisa nenji, gisapha* gia mvimba ginyi gia bungishiye mwa bonga bonga gidi mu kula mukunda nu gu kituga gisapha gia isambu ya santu ya Fumu. ²² Ha gudi bungisa nenji mudi mu tungiya mu gimvuga mukunda mu jinge hama hanyi Nzambi a jiya gu jinga mu nsadisa ya pheve.