¹ Pholo,thumwa wa Kilisto Yesu mu luzolo lwa Nzambi, gwa a santu athu a Nzambi a gu efezo, nu gwa athu a gimvuga gia dibundu mu Kilisto Yesu. ² Bemba khenda ji khale n'enwe, nu ngemba idi mu katuga gwa Nzambi udi Shetu nu gwa Fumu Yesu Kilisto. ³ Nzambi udi sha Fumu wetu Yesu Kilisto a zule lukumu! Yonu wa tu sagumunile gu lusagumunu lwa gipheve udi gosa mu njila ya Kilisto. ⁴ Nzambi wa tu phonele mu njila yenji katuga ha luyandigu lwa mavu, mukunda tu khale athu a santu a konda gu moneya gifu gu meso enji. ⁵ Nzambi wa kanesele katuga mwa leha egi mba tu khala anenji mu luzolo lwenji. ⁶ Gutshigina gwa tu tshiginile gudi mukunda nu gu mu hwa lukumu mukunda nu mutshima wenji wa bonga nu luzolo lwa bonga lwa munenji a nu tu tshigina. ⁷ Mukunda nu menga a Yesu Kilisto ta katudiye mu gihiga gia masumu mu luzolo lwa khenda jenji. ⁸ Wa tu lezele egi wa tu tshiginile mwa vula tangwa a tu hwile mayele akima. ⁹ Nzambi wa tu jiyishile gikuma a swegele luzolo lwenji mu phila a tshiginile hene a i monesele mu njila ya Kilisto. ¹⁰ Mabanza enji adi egi mu tangwa diene mba di lunga mba udi mu haga Kilisto ha guzula giyega gia gukhala Fumu wa athu akima nu ima ikima idi gosa nu haha hoshia mavu. ¹¹ Mu Kilisto ta sonegeye ha gu khala enya gifugo. Ndaga yene ya kaneseye nganyi katuga ha thomo mu luzolo lwa yonu wa nu sala ima ikima, ndaga jene jia nu salama mu phila luzolo lwenji ludi mu tshigina. ¹² Nzambi wa tu sonegele ha gu khala ana a gifugo mukunda tu khale athu a gu diangela a gu haga mutshima gwa Kilisto, nganyi twa jiya gu mu hwa lukumu. ¹³ Mu Kilisto, enwe nji, tangwa mwa vile sango jia ya kielega, sango ya bonga yinyi ye jile gu mi gulusa, enwe mwa kwikile gwa mwene hene mwa hageye gidimbu, tangwa a mi hwile pheve Santu mu phila a hanele laji. ¹⁴ Pheve-Santu mwene udi mu leza egi mba tudi mu guluga, mwene mba u katula athu enji mu gihiga, tu feto gu mu hwa lukumu. ¹⁵ Mukunda nu nganyi, katuga tangwa nga vile egi mwa hagele mutshima gu lukwikilu lwa Fumu Yesu, nu phila mwa tshiginile athu akima a Nzambi. ¹⁶ Nga bembele go ha gu hwa Nzambi matondo nu gu mi lombela Nzambi. ¹⁷ Nga nu lomba egi Nzambi wa Fumu wetu Yesu Kilisto, Tata wa lukumu ha gu mi hwa Pheve ya mayele nu ha gu mi kangula ha gu mu jiya. ¹⁸ Nga nu lomba nji egi a mi kangule mayele a meso enu mukunda mu jiye ndaga a mi lezele ha gu tshigina, mukunda mu jiye egi wa tele laji dia bonga dia lukumu mukunda nu athu enji. ¹⁹ Mu isambu yami, ngu mu lomba egi mu jiye gu koma nu ngolo jia pheve gwa etwe a Kilisto. Ngolo jene jidi jia koma. ²⁰ Idi mu ngolo jene Nzambi a zugishile Yesu gu lufwa ha gu mu tumbiga hoshi gu koko dienji dia gitata gunu gosa. ²¹ Wa mu tumbigile hoshi, gunu wa mu hwile giyega gia gu tala ba wanjio, nu gu yala majina a athu. Kilisto udi mu yala mu tangwa didi, ti nu mu tangwa mba diza. ²² Nzambi wa hagele ima ikima goshia malu a Kilisto, wa mu hagele ha gu khala ha twama ya dibundu mukunda a zule giyega gia ima ikima. ²³ Dibundu diene didi mwila wa Kilisto, Kilisto yonu wa nu lungisa ndaga jikima mu khanda jikima Katuga gosa nu haha hoshi wa nu moneya mu katshi dia dibundu.