¹ Bakasika kumbali kwegungwa , munyika yeGelasenesi. ² Jesu pakabebhuda mulubwato, kwakezha kunayiye unhulume wakabeli nompepo umbi evha kumakumbu. ³ Unhulume yoyu wakabegala kumakumbu. Apana unhu wakabetubula kunsunga, kana neketani. ⁴ Wakabasungwa tunji nozusungo nama ketani. Wakadumula maketani nokuzusungo zose. Koga apana wakabeli nesimba lokunzunda. ⁵ Busiku bose nama sikati kumakumbu nokumatunhu, wakabelila ezuchekacheka namabwe alopiza. ⁶ Pakabona Jesu nechekule, wakandabukila akakotama mbeli kukwe. ⁷ Wakalila newhi lipo pezhulu eti, ''Nditeni namwi, Jesu, mwananhulumyana waMwali unkulwana? Ndakombelela nawi nokuna Mwali nokukwe, nchenche musundishupe.'' ⁸ Wakabegala eti kunayiye, ''Bhuda kunhu, iwi mipepo mibi.'' ⁹ Wakombhuza, ''Ndiwani zina lilyo?'' Wakonshandula, ''Izina lyangu ndowhi Ligiyoni, nokuti tibanji.'' ¹⁰ Wakankombeleja kuti esubatatamile muguta. ¹¹ Noyu nshaji ingulube jinji jakabe cheja mudunhu, ¹² bakonkombeleja, beti, '' titume tingwine mungulube; tiumile tingwine munayijo. ¹³ Wakabavumila; mipepo mibi yakabhuda ikangwina mungulube, jimwe jakenda kudunhu nomugungwa, jimwe jinoswika mawhulu mabili jakanwila muvula. ¹⁴ Yabo bakabe cheja ingulube bakatizha bekano nyewula zwakaba tikana muguta nomunyika, akale bakabebhuda benda kunobona zwakabatikana. ¹⁵ Bakozha kuna Jesu bakabona unhulume wakabeli namadmoni, yoyo wakabeli wakabhatwa nemipepo yaLigiyoni eligele ekambajikwa eline ndangalilo mbuya; bakabeli nolutyo. ¹⁶ Yabo bakababona zwakabatikana kunhulume wakabeli nemipepo mibi bakabalungulila zose, akale nezwe ngulube. ¹⁷ Bakatanga kunkombeleja kuti ebhude muguta lyabo. ¹⁸ Pakabe ngwina mubwato, unhulume wakabeli kabhatwa nedimoni wakankombeleja kuti ngana waba naye. ¹⁹ Koga Jesu ajako mvumila, asi wakati kunayiye, ''Inda kumba nokubanhu babo unobabuja zwawatilwa naMwali, watondejela chini ishe.'' ²⁰ Wakabhuda akenda akatanga kupupula muDekapolisi nozunhu zukwalana zwakabatilwa naJesu, bose bakachenama. ²¹ Pakalepo Jesu pakaba taluka akale kunda kunelimwe bhazu mubwato, igubungano lyako mbunganila elikumbali kwegungwa. ²² Umwe wakatungamili bama Sinagogi wakabewhi Jayirasi wakezha, pakambona wakambwelela pamakumbo awe. ²³ Wakankombeleja kasa kasa, eti, ''Mwana nhukajana wabulofa. Ndakumbila ndikombelela, izhani munamatile ebe zubuyanana elulame.'' ²⁴ Pakalepo wakenda naye, lumbwembwembwe lwabanhu lwakontobela bensundamija. ²⁵ Pakalepo kwakabeli nonhukaji wakabeli nobulwaji boku kunga ilopa kwamakole makumi namabili. ²⁶ Wakabashupeka kasa ekasika kubalaphi banji, wakabeli ashingisa zose zwakabeli nazo koga bulwaji bwakalamba bupapilatu. ²⁷ Pakawha nozwa Jesu, wakezha kushule kukwe mulumbwembwembwe lwabanhu kabhata umpetelelo wengubo jije. ²⁸ Nokuti wakati, ''Ndikabhata ingubo jije, ndichachijwa.'' ²⁹ Pakombhata, ilopa lyakavha lyama, wakawha mumbili uwe kuti wapola mukulwala kukwe. ³⁰ Pakalepo Jesu wakawha kuti kunesimba lyabhuda muna yiye. Wakachingunuka mukati molumbwembwembwe akati, ''Ndiani waguma ingubo jangu?'' ³¹ Balayijwa babe bakati kunayiye, '' Mulumbwene lumbwembwembwe lulo ndikombeleja na, namwi muti, 'Ndiani wandibhata?''' ³² Koga Jesu wakalinga kose kuti ebone kuti ndiani wazuta. ³³ Unhukaji yoyu, aziba zwakabatikana kunayiye, wakaba nolutyo eteketa. Wakezha akambwelela panayiye akombuja ichokomende lyose. ³⁴ Wakati kunayiye, '' Mwana nsichana, kudimbwa kuko kwakuchijisa. Inda mulunyalalo uchijiswe munjabulo jijo.'' ³⁵ Echinolebeleka, kwakezha bamwe banhu bevha kuntungamili wokuSinagogi, beti, ''Mwana nsichana uwo wafa.Muchinonshupilani undayiji?'' ³⁶ Koga Jesu paka whisikija undayijo wakaba lebelekwa wakati nkutungamili weSinagogi, ''Musutye. Koga mudimbwe.'' ³⁷ Hajakavumila ose unhu kuti empelekeje kuzhe kwa Petulo, Jakobe naJohane, unkulu waJakobe. ³⁸ Bakezha kungumba yontungamili weSinagogi akabona banhu bezha belinoluzha; bakabe kwila kasa kasa. ³⁹ Pakangwina mumba wakati kwabali, ''Ini mukanyema nokulila? Mwana hajilofa koga ulele''. ⁴⁰ Bakatanga kunseka. Koga wakabasengela pazhe akanotola dade namayi bomwana nabo bose bakabeli naye, akangwina mwakabeli nomwana. ⁴¹ Wakatola luboko lomwana nsichana akati kunayiye, ''Talita, kumu!'' zunotolikwa zuwhi, ''Mwana nsichana, ndinoti kwawuli, muka.'' ⁴² Pakalepo mwana wakanyamuka akakwenda(wakabeli namakole makumi nabili okuzwalwa). Yozu zwakaba shantisa kasa kasa. ⁴³ Wakabalayila zune simba kuti kusube nonhu uchaziba nechitiko yecho.Wakababuja kuti bepe mwana nsichana chokulya.